Kooloosi 4

1 Nimbi bin cáá iyumbuee, ní nīn ŋúb́-i mmɔntiimin, kí nīn ŋáań-i tiŋan, kí nīn nyí yii ni mun cáá ukpil ubɔ u bí yilpu.

Tibɔkpaafikaal

2 Ní nīn mèé múlmul kí taa gbèen̄, kí nīn wálifì kí nīn jáaḿ Unimbɔti u-ŋanti pu. 3 Ni yaa bíi mèéyee, ní nīn mèé ki tìì ti mun, yii Unimbɔti ń pìitī-ti nsan tí ŋmā kí sòoǹ u-bɔti kí bìitī tibɔbalkaal tin sá Kriisitoo yatee. Tibɔti gbanti pu ní m bí sarkan nee. 4 Ní nīn mèé yii ḿ ŋmā kí nīn sòoǹ ki cántí-tì kii an nín máaǹ puee.

5 Ni-bimbiminee, ní nīn cáá iciin bin kaa láá fōō ki kííyee cee, kí taa dū iyunti in ni kāntí bi-ceeyee kí bīil̀. 6 Ní nīn sòoǹ anyɔɔbummɔɔn ŋí nīn cáá taapu, kí nīn nyí min ní ni làá nīn kíikí báà ŋma án nīn kítèe.

Ijaam in Pɔɔl dūu kúntèe

7 An yaa sá m-bɔtee, ti-nabineeŋkaaki Tiisiiki^a, un sá ti-tɔntɔnjuti ki tūǹ ditundi mmɔntiim ki tìì ti-Dindaanee, làá sòoǹ nì ni tin kɔkɔ m cááyee. 8 An pu ní m túnní-u ni-cee ní béé ti-gbampɔŋŋu pu kí ká kunyannyaau. 9 Úǹ nì ti-nabineeŋkaaki Ooneesiim^b un yú deedee ki sá ni-yɔu ubɔee làá dāá nīn táań, kí dāá tùkù-ni tin kɔkɔ bíi jītí dooyee.

10 Ariistaarki man nì un bí sarkan dooyee jáamiń-ni, ní Maarki Baarnaabaasi^c naal mun tīiń-ni ijaam. Dooooyee, bi tùkū-ni Maarki gbanti bɔti ki yóoǹ. Mimmee, u yaa láa bāań ni-ceeyee, ní dāá fōō-u mmɔntiim. 11 Yeesu un bi yíì Justuusee mun jáamiń-ni. Juuda yab kansikinee, binib bita nee baba di sá man nì bin tūǹ ditundi Unimbɔti Beel ń cù nyɔkɔpuee. Bíǹ di tìì-mi kunyannyaau.

12 Ni-yɔu Eepafrasi, Yeesu Kriisitoo tɔntɔnliuee, mun tīiń-ni ijaam. U mèé ni-pu tikpil ŋyunti sá kamaa, kaa gbèentí, yii ní nīn gbíntìi ŋúb́ Yeesu Kriisitoo bɔti mmɔntiim kí wíiǹ kí kpántí biniŋmambi, kí ŋmā kí ŋá tin kɔkɔ Unimbɔti là ní ŋée. 13 Mama m-ba ŋūǹ kí lì u-pu yii u gì nimbi nì Lawoodiisee yab nì Eerapooliisi yab pu digìńdi. 14 Luuki, ti-nabineeŋkaaki un sá dɔkɔtee, nì Deemasi jáamiń-ni^d.

15 Ní jāam̀ nnabiyaamu mun bí Lawoodiiseeyee, nì Niŋfasi, kí kpáaǹ Kriisitoo nikitil din kpáfí u-dumpuee. 16 Ni yaa kàan̄ kugbɔŋu nee ki tīī ni-yab ki dóòyee, ní dūú tīī Kriisitoo nikitil din bí Lawoodiiseeyee mun ń kàaǹ. Míǹ ní Lawoodiisee yab yaa tīiń-ni bi-yɔkuee ní kàaǹ ku mun. 17 Ní tùkù Arkiipi^e yii ú kpèè soooo kí tɔ̄ ditundi din ti-Dindaan tīī-uee tiŋan.

18 Man Pɔɔl di dū m-ŋal ki ŋmàn̄ anyɔɔbun nee ki jáaḿ-ni. - Taa súntímaan yii m bí sarkan. - Unimbɔti ŋanti ń nīn bí ni-pu.