2 Teesalooniiki 1

Kugbɔnliliitiiu kun Pɔɔl ŋmàn̄ ki tīī

Teesalooniiki

yabee

Ijaam

1 Man Pɔɔl nì Siilasi nì Tiimootee di ŋmàn̄ kugbɔŋu nee.

Ti ŋmàn̄-ku kí tīī nimbi Kriisitoo nikitil din bí Teesalooniiki^a ki sá ti-Baa Unimbɔti nì ti-Dindaan Yeesu Kriisitoo yabee ní. 2 Unimbɔti ti-Baa nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi.

Ibɔsoon in dāa bí Kriisitoo gítintam dalee

3 Nnabiyaamu, ti ŋmāntì kí nīn jáaḿ Unimbɔti ni-pu múlmul. An lafun máaǹ míǹ, kun puee ni-fookiiu mɔ̀tīi wīintí ki cá, ní dineendi din ni cáá tɔb puee mun mɔ̀tīi wīintí. 4 Nimbi pu ní timbi mɔ̀ɔǹ Unimbɔti nikitiŋ cee, ni nín gbíntìi pɔ̄ɔntí ki ŋúb́ ni-fookiiu falaabi kɔkɔ nì agìń ŋin poon ni bée.

5 Míǹ di dàkà Unimbɔti bɔsooŋyi nín bí deedee miŋyee, kun puee an di làá yàntī ní ŋmā kí kɔ́ Unimbɔti Beel din pu ni bí ki jīǹ falaayee. 6 Kun puee Unimbɔti sá deedeedaan ní, falaa ní u làá dāá gíiǹ kí téeǹ bin yàntī ni jīǹ falaayee. 7 U làá dāá kàan̄ nimbi bin jíń falaayee nì timbi nsɔŋfin ŋyunti ŋun ti-Dindaan Yeesu yaa láa nyánní yilpu nì u-tuuŋyi ipɔndambee. 8 U làá dāan̄ nì ŋŋmi kí dáaĺ bin kaa nyí Unimbɔti^b, kaa fōō ti-Dindaan Yeesu Bɔmɔntiitee ki kííyee tafal. 9 Bi-tafadaaldi di dāa sá bí nàan̄-bi kí nīn cá jaanjaan, bí taa nín̄ dàbiǹ ti-Dindaan nì u-nyooti nì u-pɔŋŋu^c. 10 Daliŋkin u yaa láa gítìń bin sá u-yabee nì bin kɔkɔ fōō-u ki kííyee cee bí tīī-u tinyoolee kí pàkà-uee, ni mun dāa bí niin, kun puee ni fōō ti-bɔti tin ti sòon̄ nì nee ki kíí.

11 An puee ti mèé Unimbɔti ni-pu baabadal ki bàlifī yii ú yàntī ní nīn sá binib bin máaǹ dimaŋfal din pu u yíiń-nee. Ti gíti mèé-u yii u-pɔŋŋu ń yàntī ní ŋmā kí ŋá tiŋan tin ni dàkafī kí ŋée, kí yàntī ni-fookiiu tuuŋŋi ń còom̀ mmɔntiim. 12 Mimmee, ni-puee ti-Dindaan Yeesu Kriisitoo yindi làá ká tinyool, ní u mun puee ni mun ń ká tinyool nì ti-Nimbɔtiu nì ti-Dindaan Yeesu Kriisitoo ŋanti pu.