Kugbɔmpeepeekaau kun Pɔɔl ŋmàn̄ ki tīī
Tiimooteeyee
Tibɔkilkaal
Tiimootee na nìn sá kijuudabiki ní u-baa sá ugreekija. U-na nìn fōō Kriisitoo ki kíí. Pɔɔl nín cōom̀ nsanliliiti ki túń Unimbɔti tundee poon ní u ká-u mpeepeekaamin Liistir, Asii tiŋkin (Atuun. 16.1-3). Liistir tiŋki gbanti bí Tuurkii tiŋkin díǹ nee. Kí yòon̄ ŋyunti gbanti ní Tiimootee dūu kpántì u-tɔntɔnjuti un pu u mákée. Tiimootee nìn céeǹ Pɔɔl u nín cōom̀ asaŋkin ŋin ki túń Unimbɔti tundee tikpil poon. Kriisitoo nikitil din poon ní agìń yaa nìn bée, Tiimootee ní Pɔɔl nìn tūǹ ú cùú ŋāŋkì. An pu ní ti gbìl̀ u-yindi pu Atuun gbɔŋkun kii 17.14-15, 18.5, 19.22 nì tigbɔn tin Pɔɔl ŋmàn̄ ki tīī Kriisitoo nikitiŋee poon kii 1 Kɔra 4.17, 16.10-11, Fiii 2.19-24, 1 Teesa 3.2-6 nì ajan aba mun poon. Bi yíiń tigbɔn tili tin Pɔɔl ŋmàn̄ ki tīī Tiimootee nì kun u ŋmàn̄ ki tīī Tiitee yii «bin kpòotī Kriisitoo nikitiŋee gbɔnti» ki nóó nì tin ŋmàn̄ tigbɔn gbantinee. Di sá yii bíǹ pu ní an sòoǹ tikpil.
Tiimootee gbɔmpeekaaku sòoǹ abɔjal ata pu ní:
- Mpeekaaminee, ku kpáafí Kriisitoo nikitil yab inyimɔn dakaŋ ŋin bi cáá Juuda yab landɔkɔi nì iwaatooti yai ki ŋmàlintí ki dàkèe pu. Inyimɔn dakaŋ gbanti lì yii duulinya un ti wāĺ nee kaa ŋān̄. An puee kí wàatī unil ń ká difiilee, see ú nīn cáá dinyil din bí dibalin bi dūu cóoĺ-uee ní. Kí kūtèe, bi nìn gíti cáá akoobil ŋin sá yii unil kaa máaǹ kí jī tijin tiba, àá kí cáá unimpu àá kí mɔ̄ǹee.
- Kugbɔŋu nee gíti tìì isaŋki bi nín máaǹ kí nīn jáaḿ Unimbɔti puee nì bi nín máaǹ kí bɔ́ntí Kriisitoo nikitil puee nì Kriisitoo nikitiŋ kpootiliibi nín máaǹ kí nīn cáá mbimbim miŋyee.
- Kí kúntée, Pɔɔl tīī Tiimootee u-ba isaŋki u nín máaǹ kí tɔ̄ u-tundi puee nì u nín máaǹ kí nīn kpèé Kriisitoo yab kitiŋi nín bí pu a-ba a-ba puee. Mimmee u làá nīn sá «Yeesu Kriisitoo tɔntɔmmɔntiu» (4.6).
Kugbɔŋu nee yākatì ajancukukpaan ali ní: didàkal din sá ki tīī Kriisitoo nikitil kɔkɔ nì di-kpootiliibee (ayil 1–3), nì tibɔkpaafikaal tin sá ki tīī Tiimootee u-ba tundi puee (ayil 4–6).
Kriisitoo nikitil nì di-kpootiliibi ń nīn tɔ́ Unimbɔtee bɔti páb́, ama bi máaǹ kí dū bi-ba kí sú kí nyɔ̄ŋkì ní kí jāam̀ Yeesu Kriisitoo ti-Fiiliu (2.3-6).