1 Tiimootee 1

Kugbɔmpeepeekaau kun Pɔɔl ŋmàn̄ ki tīī

Tiimooteeyee

Ijaam

1 Man Pɔɔl, un sá Yeesu Kriisitoo kpambal din Unimbɔti ti-Fiiliu nì Yeesu Kriisitoo un pu ti mákée túnnée di ŋmàn̄ kugbɔŋu nee.

2 M ŋmàn̄-ku kí tīī sii Tiimootee^a un sá m-ba bindi pu jipɔɔn a nín fōō Yeesu Kriisitoo ki kííyee puee ní. Ti-Baa Unimbɔti nì ti-Dindaan Yeesu Kriisitoo ń ŋá-si tiŋan, kí sɔ̄ a-saai, kí tīī-si ŋgbansɔŋfi.

Á nīn nyí nì a-ba nì nnyimɔn dakaŋ

3 Ŋyunti ŋun m làá nìn yīkì kí nīn cá Maseeduwaanee, m nìn tùkū-si yii á nīn kā Eefeesi^b kí pìin̄ bin bí niin ki dàkà tinyimɔmbɔtee nsan bí taa ti dàkà. Á nīn ŋáań míǹ, 4 ki dàkà-bi bí taa nín̄ kā ki máafí mmaam ki kàaǹ atiŋkpikiyin^c ŋin kaa dóotée. An cāabìń kunikpɔŋkpɔkɔu, kaa tútúǹ unil ń béé Unimbɔti nín yóoǹ puee: an dàkà yii tí fōō-u kí kíí. 5 Kun pu ní a kpáafí-bi mimmee di sá a là bí nīn cáá dineendi din nyēeń dipɔɔnyaandinee ní, bi-landɔkɔjaatiŋu ń nīn sá mmɔnti bi-fookiiu ń nīn bá ki pɔ̄ɔ̄. 6 Biba dū an saŋŋuee ki fá, ní ki cūtìi kɔ́ tibɔfan tin kaa cáá taapuee ni. 7 Bi bàà là kí nīn dàkà binib Unimbɔti marab, ama nì min kɔkɔ bi dàkà nì mpɔnee, bíǹ biba kaa gbìl̀aaa, kaa nyí tibɔti tin bi sòoǹee taapu.

8 Ti nyí yii marab sá tiwammɔntiil ní, a yaa dū marab gbanti ki ŋá min sá á dūú ŋée. 9 Ti nyí yii an kaa sá binimɔntiibi pu ní bi yóoǹ marab, an sá bin gáatèe, nì bin yiliŋ pɔ̄ɔ̄yee, nì bin kaa tɔ́ Unimbɔtee, nì bikpitiŋaliibi, nì binib bin kaa là Unimbɔtee, nì bin bíiĺ Unimbɔti wantee, nì bin kù bi-baabi nì bi-nabee, nì binikpɔliibi, 10 nì bin ŋáań tilaakpaalee, nì bin dɔ̀ nì bi-ninjajutiibee, nì bin nyáfí binibee, nì binyimɔndambi, nì bin pùtī fám fámee, nì bin kɔkɔ ŋáań tin jáà nì ibaamɔn bɔti tin bi dàkà-tee pu ní bi yóoǹ marab. 11 Tinyool Nimbɔtiu un bí mmɔnnee Bɔmɔntiiti tin u dūu ŋá m-ŋaanee poon ní tin m sòon̄ ki tīī-ni nee kā.

Pɔɔl jáaḿ Unimbɔti u-ŋanti pu

12 M jáaḿ ti-Dindaan Yeesu Kriisitoo un di tīī-mi mpɔn ki cáá m-pu dimákal yii ḿ tɔ̄ u-tundee. 13 Nì min kɔkɔ m nìn sòoǹ u-pu min kaa kítèe ki sàantí u-yab ki wɔ́b̀-bee, Unimbɔti súń m-saai, kun puee maa nìn fōō Yeesu ki kíí, kaa nìn nyí yii m bíi yìntī^d. 14 Ti-Dindaan ŋá-mi tiŋan tikpil ki yāntì m fōō ki kíí, ní ki tīī-mi dineendi din nyēeń Yeesu Kriisitoo ceeyee. 15 Tibɔti nee sá mbaamɔn ní ki máaǹ báà ŋma ń fōō-tì kí kíí mmɔntiimin. Di sá yii Yeesu Kriisitoo dɔ́miń duulinya nee ni kí fīī binikpitib, binikpitibee kansikinee man di sá unikpitikpaan. 16 Ama ní Unimbɔti súń m-saai ki yāntì Yeesu Kriisitoo dī man unikpitikpaan pu ki dàkā u-mɔtiiki nín wīikí min bulifee, án nīn sá kudaaŋŋu kí tīī bin làá dāá fōō-u kí kíí foolboon kí ká dimaŋfal din kaa kúntée. 17 An puee, bí tīī Unimbɔti un bí talku, kaa kúù, baa wālifí-uee jilma nì tinyool. Úǹ baba di sá Unimbɔti, kí nīn cá abin abin! Ameeni.

18 Sii m-biki Tiimootee, m dū tibɔti nee ki ŋá a-ŋaan. Kii tibɔti tin bi nìn fōō Unimbɔti cee a-pu dooooyee ki dūu nāatèe, á tɔ́kɔń tibɔtee pu kí já kujamɔntiiu. 19 Á nīn gbíntìi ŋúb́ tin a nìn fōō ki kííyee kí nīn cáá nlandɔkɔmɔnti. Biba fá nlandɔkɔmɔnti ní bi-fookiiu ŋá fám. 20 Ti kāntí binib gbanti kansikinee Imeenee nì Aleekisandir, bin m dū ki líiǹ Sitaan^e, án nín làá ŋá pu án cíiǹ-bi bí béé kí taa nín̄ gíti sòoǹ ki bíiĺ Unimbɔtee.