1 Tiimootee 2

Ŋwimmeem bɔti

1 Tibɔpeepeekaal tin m kpáafí bí ŋée di sá bí nīn mèé ki gbàam̄ ki jáaḿ Unimbɔti binib kɔkɔ pu. 2 Bí nīn mèé bibɔtiibi nì biyidambi kɔkɔ pu, án nín làá ŋá pu tiba ń taa páb́-ti, tí nīn bí nsɔŋfin kí nīn nóó Unimbɔti mmɔntiimin kí lafun nín̄ sá binimɔntiibee. 3 Á mèè kí tīī binibee ŋān̄ Unimbɔti ti-Fiiliu cee, 4 kun puee u là yii binib kɔkɔ ń ká difiil^a kí béé ibaamɔn. 5 Di sá yii Unimbɔti sá ubaanti, ní ugbaamil un yú timbi binib nì Unimbɔti kansikinee mun sá ubaanti, úǹ di sá Yeesu Kriisitoo un kpántì unilee. 6 U dū u-ba ki tīī ki pàn̄ ti-kɔkɔ pu ki fōō-ti ki líì^b. U ŋá míǹ ki dàkā yii Unimbɔti là binib kɔkɔ ń ká difiil ŋyunti ŋun u síiǹee ní. 7 Ní Unimbɔti dū-mi ki ŋá un sòoǹ u-bɔtee nì u-kpambal^c, ḿ nīn dàkà bin kaa sá Juuda yabee u-bɔti tin sá ibaamɔnee bí fōō kí kíí. Tin m lì nee sá ibaamɔn ní, maa mɔ́ntí.

8 An puee, m là yii, báà laakiŋyee, bininjab ń yòon̄ bi-ŋalii yilpu^d kí nīn mèé, bi-pɔbiliŋ poon ń nīn bí circir, bí taa nín̄ cáá diŋuul nì kunikpɔŋkpɔkɔu.

9 M là yii binimpoobi mun ń nīn pèentí tiwan min kítèe, kí taa nín̄ nyāantí bi-ba ki gíti lákatí, kí taa nín̄ dàkà bi-ba, bi-yikpibóobitam ń taa nín̄ nyēē mbamin. Bí taa nín̄ cáá sindaariya nì abeedimbil wanti ki nyāantí bi-ba, kí taa nín̄ pèentí tiwan tin pɔ̄ɔ̄ kudaauee^e. 10 Ama bí nīn tūǹ atummɔnti ŋin máaǹ binimpoobi bin bí yii bi nóó Unimbɔtee tuuŋŋee. 11 Bi yaa bíi dàkà Unimbɔti bɔtee, binimpoobi ń sìntī bi-ba taapu kí nīn ŋmí. 12 Maa pūǹ nsan yii binimpoobi ń nīn dàkà bininjab, kí taa nín̄ wɔ́b̀ bininjab, bi máaǹ kí nīn kā soooo ní. 13 Di sá yii Adam ní Unimbɔti péé péé ki náań, boonee ní ki nín náań Awa mun. 14 An kaa tí sá Adam ní Sitaan ŋmātiǹ, u-nimpuu ní Sitaan ŋmātiǹ, ní u yīntì Unimbɔti marau^f. 15 Ama ní u-maaliŋu puee, u yaa gbíntì ki pɔ̄ɔntí u-fookiiu poon nì dineendi kí nīn bí circir kí taa nín̄ dàkà u-bee, u làá dāá ká difiil.