1 Tiimootee 3

Bikpilib bin kpòotī Kriisitoo nikitilee

1 Tibɔti tin m làá sòoǹee sá ibaamɔn ní: di sá yii unil un là kí nīn kpòotī Kriisitoo nikitilee lēē ditummɔntiil. 2 An máaǹ bí taa ká un kpòotī Kriisitoo nikitilee pu tikpitil tiba. Ú nīn cáá unimpubaanti, kí ŋúb́ u-ba, kí nīn cáá iciin, kí nīn sá unimɔnti, kí nīn fòol̄ binicambi, kí nīn ŋūǹ ki dàkà binib Unimbɔti bɔti. 3 Ú taa nín̄ sá udanyɔl nì kílkil niliu, ama ú nīn sá unil un mɔ̄ee, kí taa nín̄ cáá kunikpɔŋkpɔkɔu, kí taa nín̄ néeń animbil. 4 U máaǹ kí ŋmā kí kpòotī u-ba dicaŋku tiŋan, kí yàntī u-biyaamu ń nīn tɔ́-u nì tibulcin. 5 Di sá yii unil yaa kaa ŋūǹ kí kpòotī u-ba dicaŋku tiŋanee, mana ní u làá ŋmā kí kpòotī Unimbɔti nikitil? 6 Udaan ń taa nín̄ sá un fōō Yeesu ki kíí mpɔmee. An yaa sá fám, u dù kí ŋá dilambil, ní kí kɔ́ Unimbɔti bɔtin kii Sitaan nín kɔ́ puee. 7 Bin kaa nóó Unimbɔtee mun máaǹ kí nīn nyí udaan pu yii u sá unimɔnti, án nín làá ŋá pu bí taa nín̄ kpèé-u fám, ú dāá jēetí Sitaan talintinee^a.

Kriisitoo nikitil kpilib

8 Míǹ mbaantiimin, Kriisitoo nikitil kpilib máaǹ kí nīn cáá mbimbimɔntiim, kí taa nín̄ bí mili mili, kí taa nín̄ gbéè ndaam, kí taa dī isaŋkpiti pu kí nyàab̀ animbil. 9 Bi máaǹ kí nīn ŋúb́ Unimbɔti saŋŋu ŋun nìn bí dibalin u nyántì ki dàkā-tee nì dipɔɔbaantiil. 10 Kí wàatī bí lēē-bee, bí cɔ̄ŋkì kí kpèè bi-bimbim nín bí puee. Bi yaa kaa ká bi-pu tibee, ní bí ŋmā kí nīn sá bin tūǹ Kriisitoo nikitil kansikin ditundee. 11 Míǹ mbaantiim, binimpoobi mun máaǹ kí nīn cáá mbimbimɔntiim, kí taa nín̄ sòoǹ ki bíiĺ binib, kí nīn ŋúb́ bi-ba, kí nīn bí deedee tikɔkɔ nì tikɔkɔ poon. 12 Bin tūǹ Kriisitoo nikitil kansikin ditundee máaǹ kí nīn cáá unimpu ubɔ ubɔ, ní kí ŋmā kí kpòotī bi-biyaamu nì bi-dicaŋŋi mmɔntiimin. 13 Bi yaa tūǹ bi-tuuŋŋi mmɔntiiminee, binib tɔ́-bi ní, ní bi sòoǹ Yeesu Kriisitoo bɔti, kaa gùgufī kpataaa.

Tiwan tin nìn bí dibalinee

14 M dá láá ŋmàn̄-si kugbɔŋu nee ki máká yii an kaa làá ti yúntí, m làá dāan̄ a-cee. 15 M yaa kaa tí ŋúń ki dɔ́miń malaayaaa, kugbɔŋu nee ŋūǹ kí tūtuǹ-si á béé a nín máaǹ kí nīn bí min Unimbɔti dicaŋku poonee, an dàkà yii Unimbɔti un kaa kúùyee nikitil din sá kii jaantalkub ki tíkí ibaamɔnee. 16 Tiŋman, dinimbɔtinool bɔti tin nìn bí dibalin Unimbɔti nyántì ki dàkā-tee sá tiwaŋkpaandi ní!

Yeesu kpántì unil ní ki dɔ́miń ti-cee,

Circir Fam dàkā yii u sá deedeedaan^b,

Unimbɔti tuuŋyi ká-u.

Bi sòon̄ u-pu atimbun kɔkɔn,

kitiŋ pu nib fōō-u ki kíí

ní Unimbɔti yōoǹ-u ki jɔ́m̀ yilpu tinyool laŋki.