Yoowaneesi 6

Yeesu kpíiǹ binib kutukub biŋmoo

(Kpèè Maat 14.13-21, Maar 6.30-44, Luuki 9.10-17)

1 Míǹ boonee ní Yeesu dūtì Galiilee mɔɔgbandi lapu pu - bi gíti yíì dimɔɔlee yii Tiibeeriyaadi mɔɔl. - 2 Kunipaau nín kántì u ŋáaǹ maamaacib bin ki cáaǹ bibunliibee puee ní bi nìn nóó-u. 3 Ní u nì u-boonnooliibi jɔ́m̀ digbantandi diba pu ki kāl̀. 4 Juuda yab jiŋaaliu un bi yíì Dilákatil jiŋaaliuee nìn tóobiń. 5 Yeesu kpēēyee, kunipaau di dòoń u-ceeyee, ní u bí Fiiliipi yii: «La ní ti làá ká tijin kí dā kí tīī bin kɔkɔ bí nee ń jī dee?» 6 - Ama Yeesu nìn nyí min ní u làá ŋée, u nìn pée lī míǹ kí kpèè yii Fiiliipi làá kíí-u yii ba ní. - 7 Ní Fiiliipi kíí-u yii: «Báà ti yaa dū animbil jitɔmbi^a alaataa ali ki dá kpɔnɔb, an kaa làá bà bi-kɔkɔ kikatii kikatii gba.» 8 Ní u-boonnooliibi kansikin ubɔ, Siimɔn Peetroo naal un bi yíì Andreeyee, bí-u yii: 9 «Kinaacimpɔmbiki kiba bí doo ki cáań ɔɔji yim kpɔnɔb biŋmoo nì ijɔm ili. An kaa nín ŋūǹ kí ŋá kunipaau nee tiba ní^b.» 10 Ní Yeesu bí-bi yii: «Yàntīmaan binib ń kàl̄!» Kumɔsɔŋu kubɔ nìn bí niin tikpil, ní bi kāl̀ ku-pu. Bi nìn bàn̄ kii kutukub biŋmoo nyɔkɔm. 11 Ní Yeesu yōoǹ kpɔnɔbee ki jáam̀ Unimbɔti an pu ki wāatì ní ki dūu yākatì-bi, ní ki tí yākatì ijɔm mun, min báà ŋma lèe. 12 Bi jíń ki díkée, ní u bí u-boonnooliibi yii: «Tòòmaan akati ŋin kíǹee, tiba ń taa bīil̀!» 13 Bi kóoǹ kpɔnɔb biŋmooyee katiŋi ŋin bi nìn ŋmɔ́ ki kíǹee, ki gbéeǹ tikabiti saalaa nì tili. 14 Yeesu ŋá maamaaci gbanti samaa kée, ní bi bí yii: «Tilafuŋman, kijapaai nee di sá Unimbɔti bɔnaatiliibi un máaǹ kí dāan̄ duulinyanee.» 15 Yeesu béè yii bi làá cúú-u mpɔn kí kàan̄ dibeelee, ní u fātìi tí nín jɔ́ḿ digbantandi pu u-baba.

Yeesu tɔ́kɔ́ǹ nnyim pu ki cōom̀

(Kpèè Maat 14.22-27, Maar 6.45-52)

16 Kujoou jóotèe ní Yeesu boonnooliibi nín sìntī dimɔɔlin 17 ki kɔ́ buŋalimbu ki fātìi nín cá Kapeernayum watil. Kunyeeu mun nìn mɔ́ Yeesu kaa láá bāań bi-cee. 18 Kubuŋkpaaŋŋu kubɔ kíĺ ki bíi jītí ki yòontí tinyiŋgban. 19 Bi nín ŋàal̄ ki bàn̄ ataŋkpee aŋmoo kii aluu nyɔkɔmee, ní ki ká Yeesu nín tɔ́kɔń nnyim pu ki còomìń ki dòoń buŋalimbu ceeyee, ní bi fāŋkì. 20 Ní Yeesu bí-bi yii: «Taa fàŋkìmaan, an sá man!» 21 Niinee ní bi bí yii bí kpáaǹ-u, kpalaayee, buŋalimbu mun pūtì dūu sāā dimɔɔgbandi laakin bi cée.

Kunipaau bíi nyàab̀ Yeesu

22 Kutaa wúntèe, kunipaau gbíntìi kā dimɔɔgbandi lapu pu. Bi nìn ká yii buŋalimbaantiibu di yú niin, ní Yeesu kaa kɔ́ buŋalimbu gbanti, u-boonnooliibi ŋmaniŋma di kɔ́ ki búntì. 23 Ama iŋaliŋfi iba nìn nyánní Tiibeeriyaadi tiŋkin ki bāań laakin ti-Dindaan nìn mēē ki pàkā Unimbɔti ki wāatì ní bi nín ŋmɔ́ kpɔnɔbee caŋin. 24 Kunipaauee nín kaa ká Yeesu kaa ká u-boonnooliibi muee ní bi kɔ́ iŋaliŋfee ki búntì Kapeernayum kí nyàab̀ Yeesu.

Yeesu di sá tijin tin tìì dimaŋfalee

25 Bi bàn̄ niin ki ká-uee, ní ki bí yii: «Ukpil, ŋyunti ŋulɔŋu ní a bāań doo ní?» 26 Ní Yeesu bí-bi yii: «Ibaamɔn, ibaamɔn ní m tùkù-ni, ni nín ŋmɔ́ kpɔnɔb ki díkée pu ní ni nyàab̀-mi, kaa sá maamaacib bin dàkā-ni m nín sá uŋyee pu. 27 Ní taa nín̄ tūǹ ditundi tijin tin kaa yúntée pu, nín̄ tūm̀maan tijin tin yúntí ki tìì dimaŋfal din kaa cáá dikúntilee pu. Tijin gbantee, man Kinibiki di làá tīī-ni tíǹ, di sá yii man ní m-Baa Unimbɔti tīī an pɔŋŋu daaŋku.» 28 Niinee ní bi bālifì-u yii: «Ti máaǹ kí ŋá mana ní án nīn sá min Unimbɔti lèe ní?» 29 Ní Yeesu kíí-bi yii: «Unimbɔti nín là miŋyee di sá ní fōō man un u túnnée kí kíí.» 30 Ní bi bí-u yii: «Maamaaci ulɔu ní a làá dàkà-ti kí wàatī ní tí nín fōō-si kí kíí ní? Àá kudaaŋŋu kulɔkɔ ní a làá ŋá tí ká? 31 Ti-naanjab nìn jīǹ tijin tin bi yíì maanee kuteeun, kii an nín ŋmàn̄ Unimbɔti gbɔŋku poon puee, yii: <U nìn tìì-bi tijin tin nyēeń yilpuee ní bi jīǹ^c.>» 32 Niinee ní Yeesu kíí-bi yii: «Ibaamɔn, ibaamɔn ní m tùkù-ni, an kaa sá Mooyiisi di tīī-ni tijin tin nyēeń yilpuee, m-Baa di tìì tijimmɔntiil tin nyēeń yilpuee. 33 Tijin tin Unimbɔti tììyee di sá un nyánní yilpu ki tìì binib kɔkɔ dimaŋfalee.» 34 Ní bi bí-u yii: «Ukpil, nín̄ pée tìì-ti tijinee baabadal!»

35 Ní Yeesu bí-bi yii: «Man di sá tijin tin tìì dimaŋfalee. Un yaa dɔ́miń m-ceeyee, ŋkùm kaa ti cútí udaan jaanjaan, míǹ ní un yaa tí fōō-mi ki kííyee, nnyinnyoo kaa ti cútí udaan jaanjaan. 36 Ama, m pée tùkū-ni: ni-nimbiliŋ ká tin m ŋée ní naa fōō-mi ki kíí. 37 Bin bin m-Baa tīī-mee kɔkɔ làá dāan̄ m-cee. Un di yaa dɔ́miń m-ceeyee, maa làá fá udaan, 38 kun puee m nyánní yilpu ki dɔ́miń kí ŋá un túnní-mee nín là puee ní, an kaa sá man m-ba nín là puee. 39 Un túnní-mee nín là puee di sá ḿ taa fá bin u tīī-mee kansikin báà ubɔ kí dāá fìkitī bi-kɔkɔ ŋwinjoolkaa dal. 40 M-Baa nín là min miŋyee sèé, yii un sá kamaa yaa ká man u-Jipɔɔn ki fōō-mi ki kííyee ń ká dimaŋfal din kaa cáá dikúntilee, ní man ń dāá fìkitī-u ŋwinjoolkaa dal.»

41 Yeesu nín lī yii úǹ di sá tijin tin nyánní yilpuee pu ní Juuda yab bíi gbùkum̄ u-pu 42 ki lì yii: «An kaa sá Yeesu, Jooseefi jipɔɔn un timbi nyí u-baa nì u-neeee^d? Kin an ŋá mana ní u gíti lì yii úǹ di nyánní yilpu ní?» 43 Ní Yeesu kíí-bi yii: «Ní taa nín̄ gbùkum̄ ni-ŋmaniŋma míǹ! 44 Ubɔ kaa ŋūǹ kí dāan̄ m-cee an yaa kaa sá m-Baa un túnní-mee di cáań udaan, kí wàatī ní man ń nín fìkitī-u ŋwinjoolkaa dal. 45 Kii Unimbɔti bɔnaatiliibi nín ŋmàn̄ puee yii: <Unimbɔti làá dàkà bi-kɔkɔ bí béé-u^e.> Mimmee, bin kɔkɔ yaa pílifì m-Baa ki fōō u nín dàkà puee dòoń man cee ní. 46 Báà ubɔ kaa ká m-Baa Unimbɔti, asee man un nyánní u-ceeyee, man baba di ká-u. 47 «Ibaamɔn, ibaamɔn ní m tùkù-ni, un yaa fōō-mi ki kííyee cáá dimaŋfal din kaa cáá dikúntilee. 48 Man di sá tijin tin tìì dimaŋfalee. 49 Nì min kɔkɔ ni-naanjab nìn ŋmɔ́ maana kuteeunee, boonee bi dāa kpíì. 50 Ama tijin tin nyánní yilpuee, un yaa jíń tintee kaa ti kúù jaanjaan. 51 Man di sá tijin tin nyánní yilpu ki cáá dimaŋfalee. Un yaa jíń tijin gbantee làá nīn bí kí nīn cá jaanjaan. Tijin tin m làá tīī binib kɔkɔ ń nīn cáá dimaŋfalee di sá m-wunti.»

52 Niinee ní Juuda yab bíi kpákà bi-ŋmaniŋma tikpil yii: «Nì mana ní u ŋūǹ kí tīī-ti u-wunti tí ŋmɔ́ míǹ?» 53 Ní Yeesu fātìi bí-bi yii: «Ibaamɔn, ibaamɔn ní m tùkù-ni, ni yaa kaa ŋmɔ́ man Kinibiki wunti, kaa nyùn̄ m-fatikuu muee, naa làá ká dimaŋfal. 54 Ama sii un yaa ŋmɔ́ m-wunti ki nyùn̄ m-fatikuuee ká dimaŋfal din kaa cáá dikúntilee, ní ḿ dāá fìkitī-si ŋwinjoolkaa dal. 55 Kun puee m-wunti di sá tijimmɔntiil ní m-fatikuu mun sá tinyɔkaal tin sá timɔntiilee. 56 Un yaa ŋmɔ́ m-wunti ki nyùn̄ m-fatikuuee bí m-ni ní ma mun bí udaan ni. 57 M-Baa un túnní-mee nín cáá dimaŋfal puee ní u-puee ma mun cáá dimaŋfal. Míǹ ní un yaa fōō-mi ki jíńee mun kāntí dimaŋfal man pu. 58 Tijin tin nyánní yilpuee nín bí puee dee. Tíǹ kaa bí kii tin ni-naanjab nìn jíń, boonee ki dāa kpíìyee. Sii un di yaa jíń tijin gbantee làá nīn kíǹ ki bí kí nīn cá jaanjaan.» 59 Tin tin Yeesu nìn sòon̄ Kapeernayum kpafidiikun ki dàkā binibee dee.

Yeesu di cáá tibɔti tin tìì dimaŋfalee

60 Yeesu boonnooliibi tikpil nín gbìl̄ tibɔti gbantee, ní bi bíi lì yii: «Tibɔti nee pɔ̄ɔ̄ tikpil! Ŋma di ŋūǹ kí pīlifì-tì?» 61 Yeesu béè yii u-boonnooliibi bíi gbùkum̄ tibɔti gbanti puee ní u bālifì-bi yii: «Tibɔti gbanti páb́-ni níii? 62 Mimmee, ni yaa láa ká man Kinibiki fātìi jɔ́ḿ laakin m nìn pée bíńee fáà^f? 63 Unil nì u-pɔ́ɔǹtam kɔkɔ sá fám ní, see Ŋfam di tìì dimaŋfal din kaa cáá dikúntilee. Míǹ ní m-bɔti tin m sòon̄ nì nee sá Unimbɔti Fam ní ki sá dimaŋfal. 64 Ama ni-kansikin biba bí, kaa fōō ki kíí.» Kun di yì-tì Yeesu sòon̄ mimmee di sá u nìn pée nyí bin kaa fōō ki kííyee doooo ŋkilkaamin, nì un làá dāá dū-u kí tīī binannanliibee. 65 Ní u lī-bi yii: «Míǹ pu ní m tùkū-ni yii ubɔ kaa ŋūǹ kí dāan̄ m-cee an yaa kaa tin sá m-Baa Unimbɔti di cáań-u.»

66 Ki yōoǹ an yuntiŋu ní Yeesu boonnooliibi tikpil yíì, kaa ti nóó-u. 67 Niinee ní Yeesu bí u-kpambaliŋ saalaa nì alee yii: «Kin nimbi fáà, ni mun kaa làá nīn cáaa?» 68 Ní Peetroo kíí-u yii: «Ti-Dindaan, sii di cáá tibɔti tin tìì dimaŋfal din kaa cáá dikúntilee. Ŋma cee ní ti làá gíti cù? 69 Timbi fōō sii ní ki kíí, ní ki nyí yii sii di sá Circirdaan un nyánní Unimbɔti ceeyee^g.» 70 Niinee ní Yeesu bí yii: «Man di kaa nìn lēē-ni binib saalaa nì bilaaa? Ama ni-kansikinee, ubɔ sá Sitaan ní!» 71 Juudasi un sá Siimɔn Isikaariyɔti jipɔɔnee pu ní u nìn sòon̄ míǹ. Di sá yii nì min kɔkɔ Juudasi mun nìn sá u-kpambaliŋ saalaa nì alee kansikin dibee, úǹ di làá dū-u kí ŋúbíǹ binannanliibi.