Yoowaneesi 5

Yeesu cáaǹ ufaliŋfaan ubɔ

1 Boonee ní Yeesu nín jɔ́ḿ Jeerusaleem kun puee Juuda yab nìn cáá jiŋaal ubɔ. 2 Dinyimbɔbil diba nìn bí Jeerusaleem, kadantikub biŋmoo māntìi tú-dì, bi yíì-dì eebru sooŋyin yii Beeteesda, di bí ki nákáǹ kipunyɔkɔ kin bi yíì ipii punyɔkɔkee. 3 Bijɔfub nì bideembi nì bifaliŋfaambi nì bibunliibi tikpil nìn dɔ̄ kadantikub taapu. [Bi nìn cí ŋyunti ŋun Unimbɔti tuuŋŋu làá dāan̄ kí gbàtī nnyimee. 4 Di sá ntuunee nìn dòoń ŋyunti ŋyunti ki gbàtī nnyim. Ŋu yaa gbātì míǹ, ní un yaa péé péé ki kɔ́ee kāntí dicáaǹdi, báà an yaa yāntì ki sá iween iŋyee^a.] 5 Uninja ubɔ nìn bí niin ki būǹ doooo abin ali kpá imuŋku ili. 6 Yeesu ká u dɔ̄ee, ní ki béè yii u būǹee an yúntì, ní u bālifì-u yii: «A là kí pɔ̄ɔkàaa?» 7 Ní ubunlee kíí-u yii: «Ukpil, bi yaa gbātì nnyimee, maa cáá ubɔ ń yòon̄-mi kí tɔ̄ niin. Ŋyunti ŋun m bíi pɔ̄ɔntí ki cée ní ubɔ ń péeǹ-mi kí cùú jēetí.» 8 Niinee ní Yeesu bí-u yii: «Yīkìí yūĺ kí yòon̄ a-kampeeku kí còom̀!» 9 Kpalaa niinee ní uninjee pɔ́ɔkì ki yōoǹ u-kampeeku ki kíǹ ki bíi còom̄. An nìn sá ŋwiŋŋuŋfikaa dal ní. 10 Míǹ pu ní Juuda yab kpilib nìn bí uninja un ká dicáaǹdee yii: «Díǹ di sá ŋwiŋŋuŋfikaa dal. Aa cáá nsan kí bùkun̄ a-kampeeku^b.» 11 Ní u kíí-bi yii: «Un cáaǹ-mee di bí-mi yii ḿ yòon̄ m-kampeeku kí nīn còom̄.» 12 Ní bi bālifì-u yii: «Ŋma di bí-si yii á yòon̄ a-kampeeku kí nīn còom̄aaa?» 13 Uninjee kaa nìn nyí un di cáaǹ-uee, di sá yii Yeesu nìn nyáń kunipaau kansikin ki búntì.

14 Boonee ní Yeesu dāa ká uninjee kunimbɔtidiin ní ki bí-u yii: «A nín pɔ́ɔkì pu nee, á taa ti ŋá ikpiti, án nín làá ŋá pu tiba ń taa láa gíti bàń-si kí jītíǹ tin bí neeyee!» 15 Niinee, uninjee cūtìi tùkū Juuda yab kpilib yii an sá Yeesu di cáaǹ-u. 16 Míǹ pu ní Juuda yab nìn nyáń Yeesu pu u nín ŋá míǹ ŋwiŋŋuŋfikaa dalee pu. 17 Ní Yeesu kíí-bi yii: «M-Baa tūǹ ditundi baabadal, míǹ ní ma mun tūǹ.» 18 Tibɔti tin u lēe puee, Juuda yab kpilib mɔ̄tìi bíi nyàab̀ kí kpɔ̀-u. An kaa sá u nín yīntì mara un sá bí taa tɔ̄ ditundi ŋwiŋŋuŋfikaayee ŋmaniŋma pu, an sá u nín lī yii Unimbɔti di sá u-Baayee, ki cáá u-ba ki ŋmàntīǹ Unimbɔtee pu.

Unimbɔti Jipɔɔn pɔŋŋu

19 Niinee ní Yeesu bí-bi yii: «Ibaamɔn, ibaamɔn ní m sòoǹ nì ni, tin Ubaati ŋáańee ní u-Jipɔɔn kāntí ki ŋáań. An yaa sá fám, waa ŋūǹ kí ŋá tiba u-ba pu. Tin kɔkɔ Ubaati ŋáańee, u-Jipɔɔn mun ŋáań míǹ mbaantiim ní. 20 Kun puee Ubaati néeń u-Jipɔɔn, ní ki dàkà-u tin kɔkɔwoooo u ŋáańee. U làá dāá gíti dàkà-u tin jítiǹ tin bí neeyee gba, án làá ŋá-ni maamaaci. 21 Kii Ubaati nín fìkitī bitaŋkpiibi ki tìì-bi dimaŋfal puee, míǹ mbaantiim ní u-Jipɔɔn mun tìì un un u yaa lèe dimaŋfal. 22 Ubaati kaa sòoǹ báà ubɔ bɔti. U dū ibɔsoon kɔkɔ ki ŋá u-Jipɔɔn ŋaan ní, 23 án nín làá ŋá pu binib kɔkɔ ń nīn tìì-u jilma kii bi nín tìì Ubaati puee. Un kaa tīī Ubaati Jipɔɔn jilmee kaa tīī Ubaati un túnní-uee mun jilma dee.

24 «Ibaamɔn, ibaamɔn ní m tùkù-ni, un yaa pílifì m-bɔti ki fōō un túnní-mee ki kííyee kāntí dimaŋfal din kaa cáá dikúntilee. Udaan kaa dāa gíti bí ibɔsoon ni, u nyáń ŋkúmin ki póotì dimaŋfalin. 25 Ibaamɔn, ibaamɔn ní m tùkù-ni, ŋyunti ŋubɔ dòoń, ŋu bāań gba, ŋun ni bitaŋkpiibi làá gbìl̄ Unimbɔti Jipɔɔn neenee, ní bin yaa láa gbìl̄ u-neen gbantee dāa kāntí dimaŋfal. 26 Ubaati nín cáá mpɔn kí tīī dimaŋfal puee, míǹ ní u tīī u-Jipɔɔn mpɔn u mun ń nīn tìì dimaŋfal, 27 ní ki tīī-u mpɔn ú nīn sá ubɔsoonli kun puee u sá Kinibiki. 28 Tin bí nee kɔkɔ ń taa bàkatīǹ-ni, kun puee ŋyunti ŋubɔ dòoń ní bin kɔkɔ dɔ̄ akaakul poonee làá dāá gbìl̄ u-neen pu 29 kí nyānní. Bin yaa ŋá tiŋanee ń fìkitī kí ká dimaŋfal, ní bin yaa ŋá ikpitee ń fìkitī kí kɔ́ ibɔsoon ni^c. 30 Maa ŋūǹ kí ŋá tiba m-ba. M-bɔsooŋyi nóó nì un túnní-mee nín tùkù-mi puee ní. M sòoǹ tibɔti deedee kun puee maa nyàab̀ kí ŋá min man m-ba lèe, see un túnní-mee nín là puee.

Unimbɔti di lèekī Yeesu pu seera

31 M yaa sòon̄ tiba m-ba pu, an kaa ŋūǹ kí dàkà ibaamɔn, 32 ama ubɔ di lèekī m-pu seera, ní m nyí yii tin u sòoǹ m-puee sá ibaamɔn. 33 Ni nìn tú binib Yoowaneesi cee ní u sòon̄-ni ibaamɔn m-pu. 34 Kun pu m lì mimmee di sá m là ní ká difiil, an yaa sá fám, maa nyàab̀ ubɔ ń lēē m-pu seera. 35 Yoowaneesi nìn sá fitila ní ki ŋmíntí nyáka nyaka, ní ni nìn kíí ki nóó u-walifiŋu gbanti ŋyunti ŋubɔ poon, ní an mɔ̄ǹ-ni. 36 Ama m cáá kun lèekī m-pu seera ki jítiǹ Yoowaneesee: di sá yii atuun ŋin m-Baa tīī-mi ḿ tɔ̄ m bíi tūnnèe sòoǹ ki dàkà m-pu yii m-Baa di lafun túnní-mi. 37 Ní m-Baa un túnní-mee mun u-ba lèekī seera m-pu. Naa láá pée gbìl̄ u-neen pu dalba, kaa láá ká u-nimbiin dalba, 38 kaa kpáafí u-bɔti mun ni-ni, kun puee naa fōō un u túnnée ki kíí. 39 Ni bífí Unimbɔti gbɔŋku poon ki dàkafī yii niin ní ni ŋūǹ kí ká dimaŋfal din kaa cáá dikúntilee. An sá man pu ní kugbɔŋuee sòoǹ, 40 ama naa là kí dāan̄ man cee kí ká dimaŋfal.

41 «Man kaa nyàab̀ binib pampakaku, 42 di sá yii m nyí-ni, naa cáá Unimbɔti neendi ni-ni. 43 M-Baa di túnní-mi, ní naa là kí fōō-mi, ama bin dòoń bi-ba puee, ni fòol̄ bíǹ. 44 Mana ní ni ŋūǹ kí fōō kí kíí, nimbi bin néeń ni-jutiibi ń nīn pàkà-nee, kaa nyàab̀ kupampakau kun Unimbɔtibaanti tììyee? 45 Ní taa dàkafì yii man làá dāá bàlifì-ni tibɔti m-Baa nimbiin. An sá Mooyiisi di làá dāá bàlifì-ni tibɔti^d, úǹ un pu ni dū ni-mákal ki ŋée. 46 Ni yaa bàà fōō Mooyiisi ki kííyee, ni bàà tí fòol̄ ma mun ní kí kíí, di sá yii man bɔti ní Mooyiisi nìn ŋmàn̄^e. 47 Ni nín kaa fōō tin Mooyiisi nìn ŋmàn̄ee ki kííyee, ni làá ŋá mana kí fōō man bɔti kí kíí?»