Yoowaneesi 4

Yeesu nì Usamaariinimpu ubɔ bɔti

1 Yeesu béè yii Fariisab gbìl̄ yii u kíǹ ki fùul̀ binib tikpil Unimbɔti nyim ki jítiǹ Yoowaneesi ní bi kpántí u-boonnooliibee, 2 - ama an kaa nìn sá Yeesu u-ba di nìn fùul̀-bi nnyim, an sá u-boonnooliibi di nìn fùul̀-bi. - 3 Ní u yíkì Juudee ki nín gítí Galiilee. 4 Kí wàatī kí nín bà Galiileeyee, see ú dī Samaarii watil pú. 5 Ní u dūu bàn̄ Samaarii tiŋki kin bi yíì Siikaar, kì pìlīǹ Jaakɔb saaku kun u nìn tīī u-jipɔɔn Jooseefee^a. 6 Niin ní Jaakɔb lɔkɔu bí. Yeesu cōom̀ ki gīīyee, ki kāl̀ lɔkɔee nyɔɔgbandi pu. An nìn ŋmāntì awinsaan.

7 U kēe ní Usamaariinimpu ubɔ dɔ́miń kí lúń nnyim, ní Yeesu bí-u yii: «Pɔ̄-mi nnyim ḿ nyɔ̀.» 8 - Di sá yii u-boonnooliibi nìn búntì kitiŋin kí nyàabìń tijin. - 9 Ní unimpuee kíí-u yii: «Sii sá Ujuudaja ní, ba pu ní a mèé man un sá Usamaariinimpuee nnyim?» - Di sá yii Juuda yab nì Samaarii yab kaa nìn kpí^b. - 10 Ní Yeesu bí-u yii: «A yaa bàà nyí Unimbɔti pɔ̄tam nì man un mèé-si nnyimee, sii gba di bàà làá mèè man nnyim, ní man ń bàà tīī-si nnyim min tìì dimaŋfalee.» 11 Ní unimpuee bí-u yii: «Ukpil, aa cáá guuka, lɔkɔ mun di nyóòyee, kin a làá ŋá mana kí kánní nnyim min tìì dimaŋfalee gbanti? 12 Ti-naanja Jaakɔb di nìn gbìn̄-ti lɔkɔ nee, ki nyùn̄ u-ba lɔkɔ gbanti nyim, ki kpáaǹ u-biyaamu nì u-waŋkuti. Mimmee, sii dàkafī yii a jítiǹ Jaakɔbaaa?» 13 Ní Yeesu fātìi kíí-u yii: «Un sá kamaa yaa nyùn̄ nnyim neeyee, nnyinnyoo làá gíti cúú udaan. 14 Ama un yaa nyùn̄ nnyim min man tììyee, nnyinnyoo kaa ti cútí udaan jaanjaan, kun puee nnyim min man tììyee kpántí nnyimbul u-pɔbilin, ní ki kíǹ ki pùub̀ ki tìì-u dimaŋfal din kaa cáá dikúntilee^c.» 15 Ní unimpuee bí-u yii: «Ukpil, yaa sée tīī-mi a-nyim gbanti ḿ nyɔ̀, nnyinnyoo ń taa ti cúú-mi, ḿ taa nín̄ gíti dòoń doo ki lúù nnyim.»

16 Ní Yeesu bí-u yii: «Cùú yíiń a-cal kí fàtīí gítiń doo!» 17 Ní u kíí-u yii: «Maa cáá cal.» Ní Yeesu bí-u yii: «A cáá nsan kí lì yii saa cáá cal, 18 kun puee a mɔ́ǹ bininjab biŋmoo dee ki yíkì, ní un cee a bí kɔŋkɔnnee mun kaa tí sá a-cal. Míǹ puee, a sòon̄ a-baamɔŋyi ní.» 19 Ní unimpuee bí yii: «Ukpil, kɔŋkɔnnee m ká yii a baasii sá Unimbɔti bɔnaatiliu ní. 20 Di sá ti-naanjab nìn jáaḿ Unimbɔti dijool nee pu ní, ní nimbi Juuda yab bí yii Jeerusaleem ní bi máaǹ kí cùú jāam̀ ti-Baa Unimbɔti.» 21 Ní Yeesu bí-u yii: «Unimpuee, á pīlifiǹ-mi! Ŋyunti ŋubɔ dòoń an kaa dāa gíti bàlifī yii unil ń cù dijool nee puɔɔɔ, Jeerusaleem ní kí jāam̀ Unimbɔti. 22 Nimbi Samaarii yab, naa nyí kun ni jáaḿee, ama timbee ti nyí un ti jáaḿee, kun puee Unimbɔti dū difiil ki dīń Juuda yab pu ní^d. 23 Kɔŋkɔnnee, ŋyunti ŋubɔ dòoń, ŋu bāań gba, ŋun ni ní bin jáaḿ ti-Baa Unimbɔti mmɔntiiminee làá nīn jáaḿ-u nì Ŋfamin nì ibaamɔn. Kun puee bin jáaḿ-u mimmee ní ti-Baa Unimbɔti nyàab̀. 24 Unimbɔti sá Ŋfam ní: míǹ puee, bin jáaḿ-uee máaǹ kí jāam̀-u nì ŋfamin nì ibaamɔn.» 25 Ní unimpuee bí-u yii: «M nyí yii Meesiya - an dàkà yii Kriisitoo - làá dāan̄. Úǹ yaa láa bāańee, ní u làá tùkù-ti tikɔkɔ.» 26 Ní Yeesu bí-u yii: «An sá man un bíi sòoǹ nì si nee di sá Kriisitoo.»

27 Niinee ní Yeesu boonnooliibi bāań, ní an ŋá-bi bitii bi nín ká u nì unimpu bíi sòoǹee, ama baa bālifì yii: «A là ba u-cee?» àá «A sòoǹ nì u tilati?» 28 Niinee ní unimpuee yāntì u-nyimbool ki fātìi nín gítí kitiŋin ki tùkū binib yii: 29 «Dāá kpèèmaan uninja ubɔ bīitì m-bɔɔŋŋi pu! An kaa kalin sá Meesiya?» 30 Ní bi yíkìń kitiŋin ki nín dòoń Yeesu cee.

31 Unimpuee búntèe, ní u-boonnooliibi bíi lì yii: «Ukpil, dāá jī tijin!» 32 Ní u bí-bi yii: «Man cáá tijin tin nimbi kaa nyée.» 33 Niinee ní u-boonnooliibi kíǹ ki bíi bàlifī tɔb yii: «Ubɔ kalin cáań-u tijin níii?» 34 Ní Yeesu bí-bi yii: «M-jinti di sá ḿ ŋá un túnní-mee nín là puee, kí tɔ̄ u-tundi. 35 Kéè, ni cáá yii an kíǹ iŋmal inaa dee, kudiceeuaa! Ama man tùkù-ni yii ní wáaǹ kí kpèè, tijin kūń ki ŋmāntì dical. 36 Kii un cēēyee nín kōontí ki kpáfí ki fòol̄ u-paati puee, míǹ mbaantiim ni mun cáaḿmaan binib m-cee ḿ tīī-bi dimaŋfal din kaa cáá dikúntilee. Ní án mɔ̄ɔkiǹ un búĺee nì un cáńee kɔkɔ. 37 Kun puee dilaŋkpandi din lì yii: <Ubɔ būul̀ ní ubɔ ń dāá cēe> sá tiŋman ní. 38 Míǹ puee, m tú-ni ní cùú cā laakin biba búĺee ní, nimbi ń páatí bíǹ gìńdi pu.»

39 Unimpuee nín tùkū-bi yii Yeesu bīitì u-bɔɔŋŋi puee, ní Samaarii yab bin kóò kitiŋ gbantinee tikpil fōō Yeesu ki kíí. 40 Samaarii yab gbanti nín dāa bāań ki ká-uee, ní bi mēē-u yii ú kàl̄ bi-cee, ní u lafun kāl̀ iwiin ili. 41 Binib tikpil nìn gíti fōō-u ki kíí tin u nìn sòon̄ nì bee pu. 42 Ní binibee lī unimpuee yii: «Ti nín fōō ki kíí nee, an kaa ti sá sii nín lī puee ŋmaniŋma pu. U sòon̄ ti mun ti-ba gbìl̄ ki béè yii, ibaamɔn, u sá duulinya kɔkɔ Fiiliu.»

Yeesu cáaǹ ukàlinjakpaan ubɔ biki

43 Iwiin ili gbanti boonee, Yeesu yíkì niin ki nín cá Galiilee. 44 Kun puee úǹ u-ba nìn lī yii: «Unimbɔti bɔnaatiliu dumpu yab kaa tɔ́-u^e.» 45 U nín bàn̄ Galiileeyee, niin yab fōō-u tiŋan, kun puee bi nìn cūtì Jeerusaleem ki ká u nín nìn ŋá tin kɔkɔ jiŋaalinee.

46 Ní u fātìi gítì Kana, Galiilee timbiliiki, laakin u nìn dū nnyim ki kpántì ndaamee. Gɔmina kàlinjakpaaŋwu ubɔ nìn bí Kapeernayum u-jipɔɔn būǹ. 47 U nín gbìl̄ yii Yeesu nyánní Juudee ki dɔ́miń Galiileeyee, ní u dɔ́miń u-cee ki gbāam̀-u ú cù Kapeernayum kí cáaǹ u-jipɔɔn un būǹ ki làá kpúee. 48 Ní Yeesu bí-u yii: «Ni yaa kaa ká maamaacib nì tidaandi, naa fòol̄ kí kíí!» 49 Ní ukàlinjakpaanee bí-u yii: «Ukpil, dāan̄ tí cù malaa, m-biki ń taa kpú!» 50 Ní Yeesu kíí-u yii: «Nín̄ cá, a-jipɔɔn pɔ́ɔkì.» Uninjee fōō Yeesu nín lī puee ní ki nín cá. 51 U bí nsanni ki fàtīi kùǹee, ní u-tɔntɔnliibi biba túŋkìń-u ki tùkū-u yii: «A-jipɔɔn pɔ́ɔkì.» 52 Ní u bālifì-bi yii: «Ŋyunti ŋulɔŋu ní an yāntì-u?» Ní bi kíí-u yii: «Fool, wiŋkpooti kukúluu kubɔ, ní an cāntì-u, u-wunti kaa ti tùm̀.» 53 Niinee ní u béè yii kukúluu gbanti deedee ní Yeesu tùkū-u yii: «A-jipɔɔn pɔ́ɔkì». Ní u nì u-dicaŋku kɔkɔ fōō Yeesu ki kíí^f. 54 Yeesu nín yíkì Juudee ki fātì Galiileeyee, maamaacililiiti un u ŋée dee.