Yoowaneesi 3

Yeesu nì Niikoodeem

1 Uninja ubɔ nìn bí, bi yíì-u Niikoodeem. U nìn bí Fariisab jandi pú ní ki sá Juuda yab kpiliu ubɔ. 2 Ukpilee nìn dɔ́miń Yeesu cee kunyeeu kubɔ ní ki bí-u yii: «Ukpil, ti nyí yii Unimbɔti di túnní-si á dāan̄ kí dàkà-ti. Di sá yii, Unimbɔti yaa kaa bí unil cee, waa ŋūǹ kí ŋá maamaacib kii bin a ŋáań nee.» 3 Ní Yeesu kíí-u yii: «Ibaamɔn ní m tùkù-si, Unimbɔti yaa kaa fātìi màl̄ unil mpɔm, u kpá kí ká Unimbɔti Beel.» 4 Ní Niikoodeem bālifì-u yii: «Mimmee, mana ní bi gíti ŋūǹ kí màal̀ unil un púĺee mpɔm? Unil ŋūǹ kí fàtīí gíti kɔ́ u-na poon bí màal̀-uaaa?» 5 Ní Yeesu gíti bí-u yii: «Ibaamɔn, ibaamɔn ní m tùkù-si, ubɔ kaa ŋūǹ kí kɔ́ Unimbɔti Beelin bi yaa kaa fātìi màl̄ udaan mpɔm nì nnyim nì Unimbɔti Famin. 6 Bin binib màal̀ee di sá nnibiyaamu, ní bin Unimbɔti Fam màal̀ee mun sá ŋfam. 7 M nín bí yii: <Ni-kɔkɔ máaǹ Unimbɔti ń fàtīí màal̀-ni mpɔmee>, án taa bàkatīǹ-si. 8 Kubuŋu jītí ki cá laakin pú ku yaa lèe, ní a gbìl̀ ku-wooku pu ní kaa nyí laakin pú ku nyáńeeyaaa, kaa nyí laakin pú ku cée mun, míǹ ní an ŋáań bin kɔkɔ Unimbɔti Fam màal̀ee.»

9 Ní Niikoodeem bí-u yii: «Mana ní an ŋūǹ kí ŋá míǹ?» 10 Ní Yeesu fātìi kíí-u yii: «Sii un sá udakakpaan ki dàkà Isirayeel yabee di kaa nyí tin bí neeee? 11 Ibaamɔn, Ibaamɔn ní m tùkù-si nee, ti sòoǹ nì ni tin ti nyée nì tin ti kée, ní naa là kí fōō tin ti lèe. 12 M sòon̄ nì ni taapu doo bɔti tin báà ŋma nyée, ní naa là kí fōō kí kíí, kin m yaa láa póotì ki bíi sòoǹ yilpu bɔti tin naa wāĺee, ni dāa ŋáań mana kí fōō tíǹ kí kíí? 13 Báà ubɔ kaa láá pée jɔ́m̀ yilpu, asee man Kinibiki kin nyánní yilpu ki sīntìńee^a. 14 «Kii Mooyiisi nín nìn lúntì kukoonaŋu ndɔ pu kuteeun^b binib kpèé ki pɔ́ɔkée, míǹ mbaantiim ní bi làá dāá dū man Kinibiki kí lúntí yilpu, 15 án nín làá ŋá pu un sá kamaa yaa láa fōō-mi ki kííyee ń dāá ká dimaŋfal din kaa cáá dikúntilee. 16 Kun puee Unimbɔti néeń kitiŋ pu nib kɔkɔ tikpil, míǹ pu ní u dū u-Jipɔmbaabil ki tīī, án nín làá ŋá pu un sá kamaa yaa fōō-u ki kííyee ń taa kpú, ama ú ká dimaŋfal din kaa cáá dikúntilee. 17 Unimbɔti nín túnní u-Jipɔɔn duulinyan doo nee, an kaa sá u là kí kpɔ̀ binib bɔti, ama u là bi-kɔkɔ ń ká difiil u-Jipɔɔn pu ní. 18 Unimbɔti kaa dāa gíti kù bin fōō u-Jipɔɔn gbanti ki kííyee bɔti, ama un kaa fōō-u ki kííyee bɔti kpíì, u nín kaa fōō Unimbɔti Jipɔmbaabil ki kííyee pu. 19 Kun cāabìń dibɔkpilee sèé: di sá yii ŋwalifee dɔ́miń duulinyan doo, ní binib là dibɔmbɔndi, kaa là ŋwalifi, kun puee bi tūǹ atuŋkpiti. 20 Un sá kamaa yaa ŋáań ikpitee ná ŋwalifi ní kaa cá ŋwalifin, kun puee u fàŋkí yii ŋwalifi làá bìitī u-tuŋkpitiŋ pu. 21 Ama un nóó ibaamɔnee cá Unimbɔti walifiŋun ní bí ká yii Unimbɔti pu ní u tūǹ atummɔnti.»

Yoowaneesi nì Yeesu

22 Míǹ boonee ní Yeesu nì u-boonnooliibi búntì Juudee watil pú ki kāl̀ niin ki fùul̀ binib Unimbɔti nyim. 23 Yoowaneesi mun nìn bí Eenoon, Saaliim caŋin, ki fùul̀ binib Unimbɔti nyim, kun puee nnyim nìn dɔ̄ niin tikpil. Niin ní binib nìn cá bi fùul̀-bi. 24 Ŋyunti gbantee, baa láá cúú Yoowaneesi ki pīiǹ kudii^c.

25 Niinee ní Yoowaneesi boonnooliibi biba nì Ujuudaja ubɔ bíi kpákà bi-marab bin sá yii bí nīn fíntí bi-ba ki kpáaǹ tiwan kɔkɔee pu. 26 Ní bi cūtì Yoowaneesi cee ki bí-u yii: «Ukpil, sii nì un nìn bí Jɔɔdan gbandi lapu puee, un pu a nìn sòon̄ yii u sá unikpaanee, báà ŋma di yíkí sii cee ki cá u-cee u fùul̀-bi Unimbɔti nyimee.» 27 Ní Yoowaneesi kíí-bi yii: «Unil kaa ŋūǹ kí nīn cáá tiba Unimbɔti yaa kaa tīī-u kudɔŋu. 28 Nimbi ni-ba ni gbìl̄ m nín nìn lī yii: <Man di kaa sá Meesiya, bi túnní man ń lìntīń u-nyɔkɔpuee^d.> 29 Un cáá unimpucaanee, unimpucaan cal dee, ama unimpucaan cal bɔɔ bí niin ki pílifí u-bɔɔ neen, ní an mɔ̄ǹ-u tikpil. An mɔŋŋuee di sá man yɔŋu nee. 30 An máaǹ úǹ nyooti ń nīn wīintí ní man yati ń nīn bàtī!»

Un nyánní yilpuee

31 Di sá un nyánní yilpuee di tɔ́kɔ́ tikɔkɔ pu. Un bí taapu dooyee di sá taapu yɔu ní ki sòoǹ taapu doo bɔti. Un nyánní yilpu ki tɔ́kɔ́ tikɔkɔ puee 32 di sòoǹ tin u kée nì tin u gbìl̄ee, ní báà ubɔ kaa fōō u-bɔti ki kíí. 33 Un di yaa fōō u nín lī puee ki kííyee, udaan dàkà yii Unimbɔti sá mbaamɔndaan dee, 34 kun puee un Unimbɔti túnnée sòoǹ Unimbɔti bɔti ní. Di sá Unimbɔti tìì-u u-Fam ní an kaa cáá bí dūú ŋmàntī. 35 Unimbɔti néeń u-Jipɔɔn ki dū tikɔkɔ ki ŋá u-ŋaan. 36 Un yaa fōō u-Jipɔɔn gbanti ki kííyee kāntí dimaŋfal din kaa cáá dikúntilee. Un yíì kaa fōō-u ki kííyee kaa kāntí dimaŋfal gbanti. Unimbɔti ŋuul làá nīn pée dàn̄ udaan pu ní.