Yoowaneesi 7

Yeesu naalib kaa fōō-u ki kíí

1 Míǹ boonee, Yeesu nìn kíǹ ki bíi yìiǹ Galiilee timmun, kaa là kí yìiǹ Juudee watil, kun puee Juuda yab yidambi nìn nyàab̀ kí kpɔ̀-u. 2 Juuda yab jiŋaaliu un bi yíì Tibìń jiŋaaliuee^a tóobińee, 3 ní Yeesu naalib bí-u yii: «Yīkì doo kí nīn cá Juudee, án nín làá ŋá pu a-boonnooliibi mun ń tin ká atuun ŋin a tūǹee. 4 Unil yaa là bí ká-uee, waa gíti tūǹ u-tuuŋŋi dibalin, míǹ puee, tɔ̄ a-tuuŋŋi gbanti báà ŋma ń ká.» 5 Di sá yii Yeesu naalib mun gba kaa nìn là kí fōō-u kí kíí. 6 Niinee ní Yeesu kíí-bi yii: «An yaa sá nimbee, iyunti kɔkɔ pée ŋān̄ ki tīī-ni ní, man yuntiŋu kaa láá bāań. 7 Duulinya yab kaa ŋūǹ kí nīn ná nimbi, ama bi ná man, kun puee man sòoǹ yii tin bi ŋáańee sá atuŋkpiti. 8 Nimbi nín̄ cámaan jiŋaal gbanti. Man kaa làá cù. Di sá yii m-yuntiŋu kaa láá ŋmāntì.» 9 U lī-bi mimmee, ní ki gbíntìi kā Galiilee.

Yeesu cūtì Tibìń jiŋaaliu

10 U-naalib búntì jiŋaal gbanti, boonee ní u mun dāa dī dibalin ki cūtì, kaa là bí ká-u. 11 Jiŋaal gbantinee, Juuda yab kpilib nìn nyàab̀-u ki bàlifī tɔb yii: «U nín bí la dee?» 12 Ní binib tikpil nìn lɔ́kɔfí Yeesu bɔti pu samaa kansikin, biba bí yii: «U sá unimɔnti.» Ní biba mun bí yii: «Waa sá unimɔnti, u sá uŋmatinli ní.» 13 Míǹ puee, ubɔ kaa nìn sòoǹ mpɔn, di sá yii bi nìn fàŋkí Juuda yab kpilib.

14 Bi jíń jiŋaal ki kɔ́ kansikinee, ní Yeesu nín jɔ́ḿ kunimbɔtidiin ki cūtìi bíi dàkà binib. 15 Juuda yab kpilib nìn bākatì sèeee, ní ki bíi lì yii: «An ŋá mana ní unil nee nyí Unimbɔti gbɔŋku míǹ, úǹ un kaa ŋá an sukuliuee^b?» 16 Ní Yeesu bí-bi yii: «M-dàkatam nee nyēeń un túnní-mee cee ní, an kaa sá man m-ba dàkatam. 17 Un yaa là kí ŋá min Unimbɔti lèe, udaan làá béé m-dàkatam nee yaa nyēeń Unimbɔti ceeyaaa, an yaa tí sá man m-ba pɔŋŋu pu ní m sòoǹ. 18 Un sòoǹ u-ba bindi puee nyàab̀ kí yòon̄ u-ba yilpu ní, ama un nyàab̀ kí yòon̄ un túnní-uee yindi yilpuee di cáá ibaamɔn, nnyimɔn kpá udaan úǹ ni. 19 Mooyiisi di nìn tīī-ni marab àá an kaa sá míǹ? Kin, ba ŋá ní ni-kansikin báà ubɔ kaa tɔ́ marab gbanti? 20 Ba di yì-tì ní ni là kí kpɔ̀-mi?» Ní samaayee bí-u yii: «Arasinii kā a-pu níii? Ŋma di là kí kpɔ̀-si ní?»

21 Ní Yeesu kíí-bi yii: «Ditumbaantiil din m ŋá ŋwiŋŋuŋfikaa dalee pu ní ni kɔkɔ bākatì nee. 22 Ama ni kíikí ki gífí ni-biyaamu akpancan ŋwiŋŋuŋfikaa dal, kun puee Mooyiisi di nìn tīī-ni mara gbanti^c. - Ama an kaa nìn sá Mooyiisi di náanní, doooo ni-naanjab ní an nìn kíliń. - 23 Ni nín kaa là kí yìntī Mooyiisi marabee puee, ní ni gífí ŋwiŋŋuŋfikaa dal. Mimmee, ba pu ní ni fōō man pu diŋuul yii m cáaǹ uninja ubɔ weeŋyi kɔkɔ ŋwiŋŋuŋfikaa dal? 24 Ní taa pɔ̀ digàndi ama ní tɔ́kɔń ibaamɔn pu kí sòoǹ nì deedee^d.»

Yeesu di kalin sá Meesiyaaa?

25 Niinee ní Jeerusaleem yab biba bíi lì yii: «An kaa sá un bi là kí kpɔ̀ee deeee? 26 Kin, an ŋá mana ní u yú ki tɔ́ u-ba mpaampiin pu doo ki sòoǹ, ubɔ kaa bíi lì-u tiba! Àá biyidambi kalin béè yii úǹ di sá Meesiya ní? 27 Ama uninja nee úŋ̀wuee, ti nyí laakin u nyánnée, an yaa sá Meesiyayee, ubɔ kaa dāa béetí laakin ní úǹ sée.»

28 Ŋyuntee, Yeesu nìn bí kunimbɔtidiin ki dàkà, ní ki téeń mpɔn yii: «Ni nyí-mi, ki nyí laakin mun m sée yaa! Maa dɔ́miń m-ba pu, un sá ibaamɔndaanee di túnní-mi, ní naa nyí-u. 29 Ama man nyí-u, kun puee u-cee ní m nyánní, úǹ di túnní-mi.» 30 Niinee ní bi bíi nyàab̀ kí cúú-u, ama báà ubɔ ŋal kaa máań u-pu, kun puee u-yuntiŋu kaa láá bāań. 31 Samaa kansikinee, binib tikpil nìn fōō-u ki kíí, ní ki lì yii: «Mimmee, Meesiya yaa láa bāańee, u dāa ŋūǹ kí ŋá maamaacib kí jītíǹ kijapaai nee deeee?»

Bi tú bí bàà cù kí cúuń Yeesu

32 Fariisab nín gbìl̄ samaa bíi sòoǹ Yeesu pu míǹ bi-ŋmaniŋmee, ní bi nì bisaraaŋakpilib tú soojab ń cù kí cúuń-u. 33 Ní Yeesu tùkū-bi yii: «Ŋyunti fiii ní m làá gíti ŋá ni-kansikin, ní kí nīn gítí un túnní-mee cee. 34 Di sá yii ni làá dāá nyàab̀-mi, kaa làá dāá ká-mi, kun puee naa làá dāá ŋmā kí dāan̄ laakin m làá nīn bée.» 35 Niinee ní Juuda yab kpilib bíi bàlifī tɔb yii: «La ní u kalin nín cá ní ki nín tùkù-ti yii taa làá ŋmā kí ká-u ní? Àá, u làá kalin cù Juuda yab bin yàl̄ ki kɔ́ Greeki yab timmunee cee kí dàkà Greeki yab Unimbɔti bɔti ní? 36 U nín bí yii: Ni làá nyàab̀-mi, kaa làá ká-mi, ki gíti lī-ti yii: Naa làá ŋmā kí dāan̄ laakin m làá nīn bée, taapu nín sá yii ba dee?»

Ibun in nyim tìì dimaŋfalee

37 Ŋwiin ŋun jiŋaal kúntée bɔti di nìn páb́^e. Ŋwiin gbanti ní Yeesu nìn yúl̀ samaa kansikin ki téeń yii: «Un ní nnyinnyoo yaa cááyee ń dāan̄ m-cee kí nyɔ̀! 38 Un di yaa fōō-mi ki kííyee, nnyim min tìì dimaŋfalee làá kpántí mbun kí nīn pùub̀ udaan pɔbilin, kii Unimbɔti gbɔŋku poon an nín ŋmàn̄ ki síiǹ puee^f.» 39 Bin fōō Yeesu ki kííyee nín làá fōō Unimbɔti Fam miŋyee pu ní Yeesu nìn bíi sòoǹ nì bi. Ŋyunti gbantee, Unimbɔti Fam kaa láá dɔ́miń kun puee Yeesu kaa nìn dáá fōō u-nyooti.

Samaa yākatì Yeesu pu

40 Kunipaauee kansikin biba gbìl̄ an nyɔɔbuŋŋee, ní ki bí yii: «Unil nee lafun sá Unimbɔti bɔnaatiliu un ti cée ní!» 41 Ní biba mun bí yii: «Úǹ di sá Meesiya!» Ní biba mun gíti bí yii: «Meesiya ŋūǹ kí nyānní Galiileeee? 42 Ama Unimbɔti gbɔŋku tùkù-ti yii Meesiya làá dāá nīn sá Daafiidi maaliŋun, ní ki sá Beetileem, kitiŋ kin ni Daafiidi nìn sée^g.» 43 Yeesu puee kunipaauee nìn cúu yākatì mili. 44 Ní bi-kansikin biba bàà nìn là kí cúú-u, ama báà ubɔ ŋal kaa máań u-pu.

Juuda yab tindaŋkpilib kaa fōō Yeesu ki kíí

45 Soojab nín fātìi gítì bisaraaŋakpilib nì Fariisab ceeyee, ní bi bālifì soojabee yii: «Ba ŋá ní naa cáań-u ní?» 46 Ní soojab kíí-bi yii: «Doooo nee, taa láá ká ubɔ sòoǹ kii kijapaai nee!» 47 Ní Fariisab fātìi bí soojabee yii: «Ni mun yāntì u kíil̀-ni naaa? 48 Ni ká biyidambi kansikin ubɔ àá Fariisab kansikin ubɔ fōō-u ki kííii? 49 An sá binifantantiibi bin kaa nyí Unimbɔti marab ki sá mbusudambee, bíǹ di fōō-u ki kíí.»

50 Niikoodeem un nìn cūtìi ká Yeesu ŋyunti ŋubɔee mun nìn ŋmàl̄ Fariisab kansikin. Úǹ di bí yii: 51 «Ti-marab poonee, an pú-ti nsan tí kpɔ̀ unil bɔti fám, kaa bālifì-u ki béè kun u ŋéeee^h?» 52 Ní bi kíí-u yii: «A mun sá Galiilee níii? Nyàab̀ Unimbɔti gbɔŋku poon kí kpèè! Aa làá ká bi ŋmàn̄ laaba yii Unimbɔti bɔnaatiliu ubɔ nyánní Galiilee.»

Yeesu fīī kinimpulaakpaai kiba

[ 53 Niinee ní bi-kɔkɔ yāaǹ ki nín kùn̄ bi-dumpui.