Maarki 4

Uwambooyaanli bɔŋmantikaati

(Kpèè Maat 13.1-9, Luuki 8.4-8)

1 Yeesu tí kíĺ ki bíi dàkà Unimbɔti bɔti Galiilee mɔɔl caŋin, ní kunipaau kóoǹní ki kpáfì u-cee. Bi-wíiŋŋu puee, ní u jɔ́m̀ ki kāl̀ buŋalimbun nnyim pu, ní kunipaauee kɔkɔ sí dimɔɔgbandi ki pìlīǹ-u. 2 U nìn cáá tibɔŋmantikaal tikpil ki sòoǹ nì bi tibɔti ní ki dàkà-bi ki bí-bi yii: 3 «Pīlifìmaan! Uwaŋyaanli ubɔ nyáń kí yàaǹ u-wamboolii. 4 U bíi yàantée ní iba lítì nsan pu, ní ilunlukuti dɔ́miń ki dūu jíń. 5 Iba mun lítì kuteeu pu, laakin kitiŋ kaa nyóòyee ní ki pūtì kpáàa nyáń. 6 Ŋwìiń píĺee ní i kpíì kun puee kitiŋ kaa nyóò inyaan ń kɔ́. 7 Iba mun lítì ikuŋkumin ki nyáń, ní ikuŋkum wíiǹ ki múkuǹ i-pu, ní iaa ŋúń ki lòon̄. 8 In kíǹee mun lítì laakin kitiŋ ŋān̄ee, ki nyáń ki wíiǹ ki cáá apoo, ní ki lòon̄ ifin. Iba cáá abil mmuŋku nì saalaa, iba mun imuŋku ita, in kíǹee mun dilaataal.» 9 Ní u gíti kútì ki lī yii: «Sii un yaa cáá ditafalee ń gbìl̄!»

Kun pu Yeesu cáá tibɔti ki ŋmàntēe

(Kpèè Maat 13.10-17, Luuki 8.9-10)

10 Ŋyunti ŋun u kíǹ u-babee ní bin nìn cēentí-uee nì u-boonnooliibi saalaa nì bilee bālifì-u tibɔŋmantikaalee taapu. 11 Ní u kíí-bi yii: «Unimbɔti yāntì nimbi béè u-Beel bɔti tin nìn bí dibalinee taapu. An yaa kíǹ bifantantiibee, an sá tibɔti ní bí nīn cáa ŋmàntī-bi, 12 án nín làá ŋá pu ní:

<Bi-nimbiliŋ ń nīn kpítì bí taa nín̄ wāĺ,

bí nīn pílifí mun tikpil kí taa nín̄ gbìl̀ee.

An yaa yíì,

bi yaa kpēē ki wál̀, ki yaa pílifì mun ki gbìl̄ee,

bi féeń bi-saŋkpitii, Unimbɔti ń dū bi-kpitii kí pɔ̄-bi^a!>»

Uwaŋyaanli bɔŋmantikaati taapu

(Kpèè Maat 13.18-23, Luuki 8.11-15)

13 Míǹ boonee ní Yeesu gíti lī-bi yii: «Naa gbìl̀ tibɔŋmantikaal nee taapuɔɔ! Kin ni làá dāá ŋá mana kí gbìl̄ tin kíǹee taapu? 14 An sá Unimbɔti nyɔɔbundi ní uwaŋyaanlee bí ki yàantí. 15 Binib biba náań nì iwambool in lítì nsan puee ní. Binibee yaa gbìl̄ dinyɔɔbundee, Sitaan dòoń ki lèekī dicilpu tibɔti tin bi búĺ bi-pɔbiliŋinee. 16 Míǹ mbaantiim ní binib biba náań nì kuteeu, laakin iwambool lítèe. Binibee yaa gbìl̄ dinyɔɔbundee, bi fòol̄-dì nì dipɔɔpindi. 17 Nì min kɔkɔ bi fòol̄ mimmee, baa cáá inyaan kí sīĺ kí báań. Bi nín fōō dinyɔɔbundee puee, an yaa sá digìńdi kii disàandi di yaa jéetì bi-puee ní bí dū dimákal din bi cáá Unimbɔti puee kí fá malaa. 18 Biba mun náań nì iwambool in lítì ikuŋkuminee ní. Bíǹ di sá bin gbìl̀ dinyɔɔbundee, 19 ní duulinya landɔkɔi páb́-bi, tigaajati ŋmàtíǹ-bi, ní nnimbitaataam mun cáá-bi. An wantee kɔkɔ mūkuntí ki bìintí dinyɔɔbundee pu, ní dàa ŋūǹ kí lòoǹ abil. 20 Biba mun tí náań nì laakin kitiŋ ŋān̄ iwamboolee lítèe ní. Bíǹ di sá bin gbìl̄ dinyɔɔbundee ki fōō-dì, ní ki lòoǹ abil. Ŋfin ŋubɔ pu lòon̄ mmuŋku nì saalaa, ŋubɔ imuŋku ita, ŋubɔ mun dilaataal.»

Fitila bɔŋmantikaati

(Kpèè Luuki 8.16-18)

21 Ní u gíti bí-bi yii: «Baa tùutī fitila kí dūú tàkan̄ kulɔŋŋun, kaa tí dù-u kí síiń kilambaŋ taapu. Bi dù fitila kí tɔ́kɔń kifaŋkɔlii pu ní^b. 22 Míǹ ní tin kɔkɔ pu binib bìintée làá dāá bìitī. Tiba kaa bí dibalin kaa làá nyā mpaampiin pu. 23 Sii un cáá ditafalee ń gbìl̄!» 24 Ní u tí bí-bi yii: «Ní nīn pílifí tibɔti nee tiŋan. Ni nín ŋmāntì pu ki tīīyee, Unimbɔti dāa ŋmàntī míǹ ní kí tīī-ni, kí gbéeǹ-ni gba án yàaǹ. 25 Di sá yii Unimbɔti dāa kútí un cááyee ní kí fōō un kaa cááyee cee fiii un u bàà cááyee.»

Ŋwambool nín dì pu kí nyēe

26 U gíti lī yii: «Unimbɔti Beel náań nì kii unil nín yàantí iwambool kitiŋ puee ní. 27 U yaa gèeǹeeee, u yaa wāĺeeee, kunyeeueeee, ŋwiimpueeee, iwamboolee nyēē ki wīintí, waa kpāantí kí béé an nín dì pu ní kí dāá ŋá mimmee. 28 Kitiŋ ki-ba càntī iwambool ń nyā kí cáá apoo kí màtī, ní kí lòoǹ abil ifinni. 29 Abil yaa bīń ki dóòyee, mimmee, kudiceeu bāań dee ní bí yòon̄ kijiki kí kɔ́ kí cā^c.»

Kiwamboolii bɔŋmantikaati

(Maat 13.31-32, Luuki 13.18-19)

30 Yeesu gíti lī yii: «Ti làá dū Unimbɔti Beel kí nántíǹ ba? Àá tibɔŋmantikaal tilati ní ti làá dūú ŋmàntī kí dàkà Dibeelee nín bí puee? 31 Dì náań nì kii tikuŋfaal subiki kin bi yíì muutaadee bil ní. Bi yaa búĺ-dèe díǹ di sá kiwaai kitiŋ pu subiliŋ kɔkɔ kansikin. 32 Ama bi nín búĺ-dèe ní dí nyā kí wíiǹ kí tɔ̄ apan kí kpántí busukpaambu kí jītíǹ tikuŋfaal tin kɔ kíǹee subiyaamu, áli nnɔmbiyaamu gba ŋūǹ kí dāá páań mu-diiŋŋi kí báĺ busubuee faatin.»

33 Tibɔŋmantikaal nee jutiibi tikpil ní Yeesu nìn cáa sòoǹ nì bi u-bɔti, min ní bi nìn ŋūǹ kí gbìl̄ taapuee. 34 Waa nìn sòoǹ nì bi fám an yaa kaa sá nì tibɔŋmantikaal. Boonee, u nì u-boonnooliibi yaa kíǹ bi-ŋmaniŋmee ní u cántí tibɔŋmantikaalee taapu ki tùkù-bi.

Yeesu yāntì kubuŋu ŋmíl̀

(Kpèè Maat 8.23-27, Luuki 8.22-25)

35 Ŋwimbaanti gbanti jookuee, Yeesu bí u-boonnooliibi yii: «Tí dùtīmaan lapu buŋgbandi!» 36 U-boonnooliibi yāntì kunipaau yàl̄ee, ní bi kɔ́ buŋalimbu bun ni u nìn kēe ki kpáaǹ-u ki búntì. Iŋaliŋfi iba mun nìn táá-u. 37 Bi cée ní kubuŋkpaaŋŋu kubɔ kíĺ ki bíi jītí ki yòontí nnyim ki tòó buŋalimbun, ki yāntì buŋalimbuee bíi gbéè nnyim kpalaa. 38 Ama Yeesu úǹ nìn dɔ̄ buŋalimbu boon pú ki kúĺ diyikuŋkul ki gèeǹ, ní u-boonnooliibi fīntì-u, ní ki bí-u yii: «Ukpil, ti nín làá kpúee, an kaa ká-saaa?» 39 U fīntèe, ní ki kpātì kubuŋu pu ní ki tùkū dimɔɔl yii: «Ŋmīĺ kí dòon̄ soooo!» Niinee ní kubuŋu kpáàa gbēeǹ, ní an ŋmíl̀ fɔ́ŋfɔŋ díkí diki. 40 Míǹ boonee ní Yeesu bālifì u-boonnooliibi yii: «Ba ŋá ní ni fāŋkì mimmee? Ba pu ní naa máká m-pu?» 41 Tifaandi nìn baasii kɔ́-bi tikpil, ní bi bàlifī tɔb yii: «Kijapaai nee nín baasii sá ŋma dee, ní ki sòoǹ kubuŋu nì dimɔɔl gbìliǹ-u míǹ nan dee^d?»