Maarki 3

Yeesu cáaǹ unil un ŋal fákée ubɔ

(Kpèè Maat 12.9-14, Luuki 6.6-11)

1 Yeesu nìn fātìi kɔ́ kukpafidiin. Uninja ubɔ nìn bí niin u-ŋal fáká. 2 Fariisab nìn bíi cɔ́ŋkí Yeesu kí kpèè u yaa làá cáaǹ-u ŋwiŋŋuŋfikaa dal, bí ŋmā kí ká nnaakpal kí lì yii u yīntì. 3 Ní Yeesu bí unil un ŋal fákée yii: «Yīkì kí sīĺ ti-kansikin báà ŋma nimbiin.» 4 Ní u bālifì-bi yii: «Ti-marau pú nsan tí ŋá tiŋan ŋwiŋŋuŋfikaa dalaaa, tí ŋá tikpitil ní? An pú nsan yii tí fīī unil naaa, tí kpɔ̀-u ní?» Ní bi ŋmí. 5 U nìn kpēē-bi dinimbil ki māntì, ki fōō bi-pu diŋuul, ama ní bi-pɔɔgbifiŋŋu mun nìn kɔ́ǹ-u kunimbaau. Ní u bí un ŋal fákée yii: «Tàntī a-ŋal!» Ní u tāntì-ŋu, ní u-ŋal ŋáŋkì. 6 Niin niin ní Fariisab nyáń ki nyàab̄ ubɔti Eeroodi naacimbi bí kpāfì kí nyàab̀ nsan ŋun bi làá dī kí kpɔ̀ Yeesuee.

Kunipaau dɔ́miń Yeesu cee dimɔɔl caŋin

7 Niinee ní Yeesu nì u-boonnooliibi nyáń ki cūtì dimɔɔl caŋin. Kunipaau nìn táá-u ki nyánní Galiilee nì Juudee, 8 nì Jeerusaleem nì Idumee, nì Jɔɔdan buŋgbandi lapu pu, nì Tiir nì Siidɔn tiŋgbammun. Kunipaauee kɔkɔ nìn gbìl̄ tin kɔkɔ u ŋáańee ní ki dɔ́miń u-cee. 9 Ní u bí u-boonnooliibi yii bí bɔ́ntí-u kiŋaliŋwaai kiba nnyim pu ú kɔ́ kunipaauee ń taa láa nyīī kí mátí-u. 10 Di sá yii u nìn cáaǹ binib tikpil, an yāntì bibunliibi kɔkɔ kpákà kí gbēē-u. 11 Arasiniibi bin kā biwaatiibi puee yaa nìn ká-uee, bi nìn gbàantí u-nimbiin, ní bi kūuntí ki lì yii: «Sii di sá Unimbɔti Jipɔɔn!» 12 U nìn kpàtī bi-pu ki lì-bi yii bí taa yàntī bí béé-u.

Yeesu lútì akpambal saalaa nì ali

(Kpèè Maat 10.1-4, Luuki 6.12-16)

13 Boonee Yeesu jɔ́m̀ kigbantaŋ pu ní ki yíiń bin u lèe ní bi dɔ́miń u-cee. 14 Niinee ní u lútì saalaa nì bili bí nīn sá u-kpambaliŋ u nì bi ń nīn kíǹ ki bí, ú nīn tūǹ-bi bí nīn sòoǹ u-bɔti, 15 kí nīn cáá mpɔn ki jì arasiniibi. 16 Binib saalaa nì bili bin u lútèe yiŋŋi sèé: Siimɔn - un u nìn páaǹ diyindi yii Peetrooyee^a -, 17 nì Seebeedee jipɔmbi Yakubu nì Yoowaneesi - bin u pú diyindi yii Bɔwaneegeesee an taapu sá yii «Binib bin náań nì ataadunee^b» -. 18 Bin kíǹee di sá Andree nì Fiiliipi nì Baateeleemii nì Maatiiu nì Toomasi, nì Yakubu Alfee jipɔɔn, nì Tadee nì Siimɔn un nìn là kí já nì Room yabee, 19 nì Juudasi Isikaariyɔti, un dāa dū Yeesu ki tīī u-nannanliibee.

Ikpiti in kaa cáá dipɔlee

20 Míǹ boonee, ní bi nín gítí mmɔŋki, ní kunipaau tí kóoǹní ki múkuǹ. An yāntì Yeesu nì u-boonnooliibi kaa ti kpáàa cáá mpaan kí jī tijin. 21 Yeesu yab gbìl̄ tin kɔkɔ jītée, ní bi yíkìi kíliń nsan kí dāá cúú-u, kun puee biba nìn lì yii: «U-yil lábitì ní.»

Yeesu kíí bin túǹ-u dibɔgabilee

(Kpèè Maat 12.22-32, Luuki 11.14-23, 12.10)

22 Bimaradakaliibi biba nìn nyánní Jeerusaleem ki lì yii: «Arasiniibi kpiliu Beelseebuul^c di kā u-pu. Úǹ pɔŋŋu ní u cáa jì arasiniibi.» 23 Ní Yeesu yíiń-bi u-cee, ki gāā-bi dilaŋkpandi ki lī yii: «Mana ní Sitaan ŋūǹ kí jà Sitaan? 24 Dibeel din nib yaa cúú di-ba ki yākatì mili ki jáaǹ tɔbee kaa ŋūǹ kí nīn bí kí cù ndan. 25 Míǹ mun ní kudicaŋu kun di yaa cúú ku-ba ki yākatì mili ki jáaǹ tɔbee kaa tí ŋūǹ kí nīn bí ki cá. 26 An yaa sá yii Sitaan yíkìi jáaǹ u-ba ki cúú u-ba ki yākatèe, mimmee, waa ŋūǹ kí nīn bí ki cá, u-pɔŋŋu kúntí ní.

27 «Bi yaa kaa bóob́ upɔɔl ŋŋmii ki wāatì, ŋma di ŋūǹ kí kɔ́ u-dumpu kí kóoǹ u-wanti? See bí bóob́-u kí wàatī ní kí nín ŋmā kí kɔ́ kí kóoǹ u-wanti.

28 «M sòoǹ nì ni ibaamɔn ní, nnibiyaamu ŋūǹ kí ká bi-kpitii kɔkɔ pɔ̄tam ki kpáaǹ tibɔfan tin bi sòon̄ Unimbɔtee. 29 Ama un yaa sòon̄ Unimbɔti Fam tibɔfanee, úǹ kpá kí ká u-kpitii pɔ̄tam jaanjaan, di sá yii u kɔ́ diyìntil din kaa cáá dikúntilee ni!» 30 Yeesu nìn lī míǹ, kun puee bi nìn lì yii: «U cáá arasinii u-ni!»

Yeesu na nì u-nabiyaamu

(Kpèè Maat 12.46-50, Luuki 8.19-21)

31 Yeesu na nì u-nabiyaamu bāań ki sí mmɔŋki ki tú bí yíiń-u. 32 Binib tikpil nìn kā ki gɔ́ń-u ní bi tùkū-u yii: «A-na nì a-nabiyaamu sí mmɔŋki ki nyàab̀-si.» 33 Ní u kíí-bi yii: «Ŋma di sá m-na nì m-nabiyaamu?» 34 U kpēē ki māntì ki tú bin nìn kā ki gɔ́ń-uee, ní ki lī yii: «Kpèèmaan, m-na nì m-nabiyaamu sèé nee! 35 Un kamaa yaa ŋáań Unimbɔti nín là puee, udaan gbanti di sá m-naal, m-niisal nì m-na.»