Maarki 2

Yeesu cáaǹ ufaliŋfaan ubɔ

(Kpèè Maat 9.1-8, Luuki 5.17-26)

1 Iwiin iba boonee, Yeesu nìn gítì Kapeernayum, ní binib gbìl̄ yii u bí mmɔŋki. 2 Kunipaau nìn dɔ́miń ki kpáfì u-cee kudiin, ní mpaan kaa ti kpáàa bí kipunyɔkɔpu gba. U nìn bíi sòoǹ nì bi Unimbɔti bɔti ní. 3 Ní bininjab binaa túǹní ufaliŋfaan ubɔ ki cáań u-cee. 4 Nniwíin puee, baa nìn ŋúń kí pìl̄ Yeesu. Míǹ puee, bi nìn jɔ́m̀ ki cíl̀ kudii yilpu^a ki bíitì laakin Yeesu bée, ní ki dū ufaliŋfaan nì nlún ki dīń dibùndee ni ki sīntìń ki bíl̀. 5 Yeesu nín ká binib gbanti fōō ki kíí yii u ŋūǹ kí cáaǹ ubunlee, ní u tùkū ufaliŋfaanee yii: «M-biki, m dū a-kpitii ki pú-si.» 6 Bimaradakaliibi biba nìn kā niin ki dàkafī bi-pɔbiliŋin yii: 7 «Ba pu ní uninja nee lì míǹ? U ŋèeǹ nì Unimbɔti ní. Ubɔ kaa ŋūǹ kí dū ikpiti kí pɔ̄, asee Unimbɔti baba^b.» 8 Niinee Yeesu béè bi-landɔkɔŋu ní ki bālifì-bi yii: «Ba pu ní ni dàkafī míǹ ni-pɔbiliŋin? 9 Ba di kaa pɔ̄ɔ̄ dilil ní? Á tùkù ufaliŋfaan yii: <A ká a-kpitii pɔ̄tam> di kaa pɔ̄ɔ̄ dilil naaa, <Yòon̄ a-lúŋŋu kí nīn còom̄> di kaa pɔ̄ɔ̄ ní? 10 Ama ní béé yii man Kinibiki cáá mpɔn kitiŋ pu kí dū unil kpitii kí pɔ̄-u.» Niinee ní u tùkū ufaliŋfaanee yii: 11 «Sii yīkìm̄ kí yòon̄ a-lúŋŋu kí nīn kùǹ a-dumpu!» 12 Ní u nyīī ki yíkì dicilpu niin ki yōoǹ u-lúŋŋu ki nyáń báà ŋma nimbiin, ní an bākatiǹ-bi sèeee, ní bi bíi pàkà Unimbɔti ki lì yii: «Taa láá pée ká míǹ dalba dalba!»

Yeesu yíiń Leefii ú nóó-u

(Kpèè Maat 9.9-13, Luuki 5.27-32)

13 Yeesu nyáń ki gítì Galiilee mɔɔl caŋin. Kunipaau nìn dɔ́miń u-cee ní u dàkā-bi Unimbɔti bɔti. 14 U jītée, ki ká Leefii Alfee jipɔɔn kā fɔtiku diikun. Ní u bí-u yii: «Dāan̄ kí nīn nóó-mi!» Ní Leefii lafun yíkì ki táá-u. 15 Yeesu nìn kɔ́ Leefii dumpu ki bíi jīǹ tijinee, bifɔtiliibi tikpil nì binikpitib bin kɔkɔ kíǹee dɔ́miń ki kútì u nì u-boonnooliibi pu: di sá yii an nikpitibee nìn nóó-u ki wīikí. 16 Bimaradakaliibi bin sá Fariisab kitilinee nín ká u nì binikpitib kpáfí ki jīǹee, ní bi bālifì u-boonnooliibi yii: «Ba pu ní u nì binib nee kpáfí ki jīǹ míǹ^c?» 17 Yeesu gbìl̄ bi nín lī puee, ní ki gāā-bi dilaŋkpandi yii: «Bin cáá laafiyee kaa nyàab̀ unyɔɔdaan, see bin būǹee di nyàab̀ unyɔɔdaan. Di sá yii maa dɔ́miń kí yíiń deedeedambi, m dɔ́miń kí yíiń binikpitib ní.»

Yeesu sòon̄ dinyɔɔboobil pu

(Kpèè Maat 9.14-17, Luuki 5.33-39)

18 Yoowaneesi boonnooliibi nì Fariisab nìn bōob̀ kinyɔkɔ. Dalbee ní biba dɔ́miń ki bālifì Yeesu yii: «Ba pu ní Yoowaneesi boonnooliibi nì Fariisab boonnooliibi bōob̀ kinyɔkɔ ní sii yab kaa bōob̀ ní?» 19 Ní Yeesu fātìi bālifì-bi yii: «Ubɔ yaa cáá unimpucaan ki yaa yíiń u-bɔɔbee, bi jīǹ ki nyù naaa, kinyɔkɔ ní bi bōob̀ ní? Unimpucaan cal yaa bí bi-kansikinee, baa kàal̀ ŋkùm. 20 Ama ŋwiin ŋubɔ bí ki dòoń bi làá dāa yòon̄ unimpucaan cal bi-kansikin, an yuntiŋu ní u-bɔɔbi dāa bōob̀ kinyɔkɔ.

21 «Bi yaa dū ŋŋaapɔɔn ki lìb̄ satakpiki bundi, ki yaa fíntèe, ŋŋaapɔɔn kōontí ní kí kpáaǹ satakpiki kí cátí, ní dibùndee ń mɔ̀tīí wàan̄. 22 Míǹ mbaantiim ní baa tí dù ndapɔm kí fúuń tilɔkpikilin. Bi yaa dūu fúuń míǹ, tilɔkpikil pòol̄ ní ndaam ń fá, ní tilɔti mun ń bīil̀. Bi dù ndapɔm kí fúuń tilɔpɔn ni ní.»

Yeesu sá ŋwiŋŋuŋfikaa Dindaan

(Kpèè Maat 12.1-8, Luuki 6.1-5)

23 Ŋwiŋŋuŋfikaa ŋubɔ dalee, Yeesu nì u-boonnooliibi bíi jītí bilee kpaaŋŋin ní u-boonnooliibi bíi gífí bilee fiŋyi ki ŋmèem̄ abil ki ŋmóò^d. 24 Fariisab ká mimmee, ní ki bí-u yii: «Ba pu ní a-boonnooliibi ŋáań min kòó ŋwiŋŋuŋfikaa dalee^e?» 25 Ní u fātìi kíí-bi yii: «Naa láá pée kàan̄ kugbɔŋu poon ki ká tijin takaasiu nín nìn cúú ubɔti Daafiidi nì u-naacimbi bi ŋá pueeee? Ŋyunti ŋun Abiyataar nìn sá usaraaŋakpilee, 26 Daafiidi nìn kɔ́ kunimbɔtidiin ki ŋmɔ́ saraa kpɔnɔb ki kíǹ ki tīī u-yab. Abiyataar di nìn sá usaraaŋakpil ŋyunti gbanti. Ti-koobiliŋ poonee, usaraaŋal baba di cáá nsan kí ŋmɔ́ kpɔnɔb gbanti^f. Ama Daafiidi nìn ŋmɔ́ ki kíǹ ki tīī u-naacimbi gba.» 27 Yeesu gíti lī-bi yii: «Unimbɔti náań ŋwiŋŋuŋfikaa binib pu ní, waa náań binib ŋwiŋŋuŋfikaa pu. 28 Man Kinibiki di sá ŋwiŋŋuŋfikaa daan.»