Maarki 5

Yeesu cáaǹ uwaati ubɔ Geeraseen tiŋkin

(Kpèè Maat 8.28-34, Luuki 8.26-39)

1 Bi nìn dūtì lapu mɔɔgbandi Geeraseen yab tiŋkin^a. 2 Yeesu kpákatì buŋalimbunee, kpalaayee, kijapaai kiba kin pu arasinii kēe nyánní kuceeun ki túŋkiń-u. 3 U nìn kóò akaakulin ní. Báà ubɔ kaa nìn ŋūǹ kí bóob́-u, báà bi yaa dū ikusaka gba. 4 Di sá bi nìn bāā-u abaa ki gbìǹ-u ikusaka mun, ní ú tìfī ikusakee ní kí wìil̀ abaa mun. Ubɔ kaa nìn gíti ŋūǹ kí pèefì-u. 5 U nìn bí ní ki yìiǹ ŋwiimpu nì kunyeeu kɔkɔ akaakulin nì ajoon pu ki kūuntí ní ki cáá ataŋkpee ki gífí u-ba. 6 U wál̀ Yeesu ndanee, ní ki sáǹní ki dɔ́miń ki tātìi gbāaǹ u-nimbiin, 7 ní ki fáá mbiil mpɔn yii: «Yeesu Unimbɔti un bí yilpuee Jipɔɔn, man nì si yii ba ní? M dū Unimbɔti ki gbāam̀-si, taa sàaǹ-mi!» 8 U nìn lī míǹ kun puee Yeesu nìn lī-u yii: «Arasinii, nyā uninja nee ni!» 9 Ní Yeesu bālifì-u yii: «Bi yíì-si yii ba?» Ní uwaatee kíí-u yii: «M-yindi di sá yii: <Kusoojapaau,> kun puee ti wīikí tikpil.» 10 Ní u gbāam̀ Yeesu tikpil ki lī yii: «Taa jà-ti kitiŋ nee pu!»

11 Dijool diba nìn bí niin, di-caŋinee digbeetikitikpaandi diba nìn sí ki jīǹ. 12 Arasiniibee gbāam̀-u yii: «Càntī tí cùú kɔ́ igbeeti nee ni.» 13 Ní u pú-bi mpaan, ní bi nyáń uwaatee ni ki kɔ́ igbeetin, ní digbeetikitilee sáǹ ki wúntì nsitimin ki jéetì dimɔɔlin ki múĺ ki kpíì. Igbeetee nìn bàn̄ kutukub bili nyɔkɔm. 14 Ní bin nìn kpàá igbeetee sáǹ ki cūtì kitiŋin nì ikaan ki máafì an bɔti. Binib nyánní kí dāá kpèè tin di ŋée, 15 ki bāań Yeesu ceeyee ki ká uwaati un pu kurasiniipaau nìn kēe kā ki pēē tiwan ki dàkafī nnimɔntiyaamin. Bi ká-uee, ní tifaandi kɔ́-bi. 16 Bin nìn ká tin jítèe máafì bin kíǹee an nín ŋá pu ní uwaatee pɔ́ɔkì ní igbeeti kpíìyee. 17 Ŋyunti gbantee ní bi kíĺ ki bíi gbàam̄ Yeesu yii ú yīkì bi-tiŋki pu. 18 Yeesu bíi kóò buŋalimbunee, ní uninja un nìn wáatèe gbāam̀-u yii ú yàntī ú táá-u kí nīn kíǹ ki bí u-cee. 19 Ama ní Yeesu kaa pú-u nsan, ní ki bí-u yii: «Nín̄ kùǹ a-mɔŋkiŋu a-yab cee kí māafì-bi min ní ti-Dindaan súń a-saayee nì tin kɔkɔ u ŋá ki tīī-see.» 20 Ní kijapaayee búntì ki kíĺ ki máafí ntimu saalaa jaaŋŋi kɔkɔn tin kɔkɔ Yeesu ŋá ki tīī-uee, ní báà ŋma bākatì sèeee.

Yeesu fīkitì kisapɔmbiki kiba ki cáaǹ unimpu ubɔ

(Kpèè Maat 9.18-26, Luuki 8.40-56)

21 Yeesu kɔ́ buŋalimbun ki fātìi dūtì dimɔɔgbandi. U dáá bí dimɔɔgbandee ní dinikitikpaandi dɔ́miń ki kpáfì u-cee. 22 Kukpafidii kpiliu ubɔ nìn dɔ́miń, bi yíì-u Jayirusi. U ká Yeesuee, ní ki gbāaǹ u-nimbiin 23 ki mēē-u nì igbaam poon ki bí yii: «M-sapɔmbiki būǹ ki làá kpú. Á jī kimɔtii kí pée dāan̄ kí dū a-ŋal kí páań ki-pu, kí cáaǹ-kì kí ŋmátí.» 24 Ní u nì Yeesu búntì, ní dinikitilee fāā ki bīiǹ u-boon bɔ̀mmm. 25 Unimpu ubɔ nìn ŋmàl̄ niin ki fùul̀ ŋkpin an kaa gúǹ áli abin saalaa nì ali. 26 U nìn jíń falaa tikpil ki nìn bíil̀ u-nimbiliŋ mun kɔkɔ binyɔɔdambi tikpil cee, kaa kpáàa ká dicáaǹdi, ní an mɔ̄tìi púntì-u. 27 Unimpuee nìn gbìl̄ bi sòon̄ Yeesu pu, ní u dɔ́miń kunipaaun ki dīń Yeesu boon pú ki gbēē u-bɔkutil. 28 Di sá u nìn lī u-pɔbilin yii: «M yaan pée ŋúń ki gbēē u-bɔkutil kpaŋkpam, m bàà kāntí dicáaǹdi.» 29 Niinee, fatiku un nyēē-uee kpáàa gúń, ní u gbìl̄ u-wuntin yii u pɔ́ɔkì. 30 Kpalaayee Yeesu gbìl̄ u-ban yii mpɔn ŋubɔ nyáń u-ni ní u fātì kunipaauee pu ki bí yii: «Ŋma di gbēē m-bɔkutil?» 31 Ní u-boonnooliibi kíí-u yii: «Sii wāĺ kunipaau téekí-si yéè, ní a bàlifī yii: <Ŋma gbēē-maaa?>»

32 Yeesu kpēē ki māntì ki tú ki nyàab̀ kí béé un di ŋá mimmee. 33 Niinee, tifaandi cúú unimpuee, u-wunti kíĺ ki bíi jìkì, kun puee u nyí tin di jítì u-puee. Ní u dɔ́miń ki tātìi gbāaǹ Yeesu taaŋi taapu ní ki kàan̄-u tikɔkɔ nì ibaamɔn. 34 Niinee ní Yeesu bí-u yii: «M-bisal, a nín fōō ki kíí puee fīī-si. Nín̄ cá nì ŋgbansɔŋfi, a-weeŋyi ń yàntī-si.»

35 Waa láá ŋmíl̀, ní kukpafidii kpiliuee yab biba nyánní u-dumpu ki bāań ki bí yii: «A-bisal kpíì. Taa ti páb́ ukpil yii ú dāan̄.» 36 Yeesu gbìl̄ dinyɔɔbundi din bi lēe, ní ki tùkū kukpafidii kpiliuee yii: «Taa yàntī a-pɔbil ń bīil̀! Sii dee fōō man kí kíí.» 37 Waa yāntì báà ubɔ céeǹ-u ki kútì Peetroo nì Yakubu nì Yoowaneesi, Yakubu naal pu. 38 Bi nín bàn̄ kukpafidii kpiliuee dumpuee, Yeesu ká binib gà dituweel an tùm̀ dàiiyee, 39 ní u kɔ́ ki bí-bi yii: «Ba pu ní ni sūǹ ki ŋáań kuwoou míǹ? Kibikee kaa kpíì, ki gèeǹ ní.» 40 Ní bi bíi bèel̄-u, ní u jìn̄ bi-kɔkɔ ki nyántì, ní ki yōoǹ kibiki baa nì ki-na nì u-boonnooliibi bita bin nìn céeǹní-uee, ki kɔ́ǹ laakin kibikee dɔ̄ee, 41 ní u cúú kibikee ŋal ki bí-kì yii: «Taliita, kumii.» An taapu di sá yii: «Kisapɔmbiki, yīkì, sii ní m lì!» 42 Kpalaayee ní kibikee nyīī yíkì ki bíi còom̄. Kì nìn cáá abin saalaa nì ali ní. Ní bin nìn bí niinee bākatì sèeee. 43 Ama ní Yeesu kpáafì-bi tiŋan bí taa yàntī báà ubɔ ń béé, ní ki bí-bi yii, «Tīīmaan-kì tijin.»