Luuki 13

Dibakpántil bɔti páb́

1 Ŋyunti gbantee ní binib biba dɔ́miń ki tùkū Yeesu yii Galiilee yab biba nìn bíi kù tiwaŋkuti ki ŋáań saraa ki tìì Unimbɔti, ní gɔmina Piilati yāntì bi dɔ́miń ki kūū-bi, ní bi-fatikuu nì tiwaŋkuti tin bi kūūyee fatikuu ŋmālim̀ tɔbin. 2 Ní Yeesu bí-bi yii: «Mimmee, ni dàkafī yii Galiilee yabee nín kpíì nsansaaŋkúm gbantee, an dàkà yii bi sá binikpitib ki jítiǹ Galiilee yab bin kíǹee kɔkɔɔɔ? 3 Aayee, baa sá, ama ni mun yaa kaa kpántì ni-ba, ni làá kpú kii bi mun nín nìn kpíì puee ní! 4 Àá, ni dàkafī yii binib saalku nì bita bin Siiloowee difɔkɔku lítì ki tàb̄ ki kūūyee sá digaŋgam nib ki jítiǹ Jeerusaleem yab bin kíǹee kɔkɔ? 5 Aayee, ama ni mun yaa kaa kpántì ni-ba, ni làá kpú kii bi mun nín kpíì puee ní.»

Busubu bun kaa lòoǹee bɔti

6 Ní Yeesu gíti dū tibɔti nee ki ŋmāntì ki lī yii: «Uninja ubɔ di bí ní ki cóoǹ busubu bun bi yíì fiigee u-kpaabun. Dalbee, u cūtì kí kìtī abil, ní kaa ká. 7 Ní u bí upaadaan un kpèé u-kpaabuee yii: <Kpèè, abin ata sèé m nín pée dòoń ki nyàab̀ busubu nee biliŋ, kaa kāntée. Gāā-bu kí fá. Ba pu ní bu yú ki jīǹ mpaan fám míǹ?> 8 Ní upaadaanee bí yii: <Ukpil, gíti yàntī-bu dibindi nee, ḿ yɔ̀kɔtī bu-taapu kí ŋá tinaabin. 9 M yaa ŋá míǹ, an yaa yíì, jiil bu làá lòoǹ, bu yaa kaa nín lòon̄ee, á nín gāā-bu kí fá.>»

Yeesu cáaǹ unimpudeen ubɔ

10 Ŋwiŋŋuŋfikaa ŋubɔ dalee, Yeesu nìn bíi dàkà binib Unimbɔti bɔti kukpafidii kubɔn. 11 Unimpu ubɔ nìn bí niin, arasinii ubɔ nìn ŋúb́-u doooo abin saalku nì ata ki yāntì an gúkúǹ-u u kpántì udeen, waa ti ŋūǹ kí yáatí báà fiii. 12 Yeesu ká-uee, ní ki yíiń-u ní ki bí-u yii: «Unimpuee, a-weeŋyi yāntì-si,» 13 ní ki dū u-ŋalii ki páaǹ u-pu. Kpalaa niin ní unimpuee yáatìi yúl̀ cáacaa, ní ki bíi pàkà Unimbɔti. 14 Niinee, an kaa mɔ́ɔkiǹ kukpafidii kpiliu Yeesu nín cáaǹ unimpuee ŋwiŋŋuŋfikaa dalee, ní u tùkū bin kpáfì niinee yii: «Kinyɔŋ poonee iwiin iluu di sá báà ŋma ń dūú tɔ̄ u-tundi^a. Míǹ puee, dāam̄maan iwiin iluuyee poon bí cáaǹ-ni, án taa nín̄ sá ŋwiŋŋuŋfikaa dal.» 15 Ní Yeesu kíí-u yii: «Mpoonnyoondambi, kéè ŋwiŋŋuŋfikaa dalee, ni gbìntī ni-naai nì ni-mammu kunaakooun ki cáǹ-i i nyùɔɔ! 16 Kin unimpu nee mun sá Abraam naantiiu ubɔ ní Sitaan bóob́-u doooo abin ali kpá mmuŋku. Úǹ di kaa nín máaǹ ḿ báatí-u dikpambaal ŋwiŋŋuŋfikaa dalaaa?» 17 Yeesu nín kíí-bi mimmee, ní icoo kɔ́ u-nannanliibi gbanti, ama samaa un kíǹee nìn fàal̀ atunnyaan ŋin Yeesu nìn ŋáańee pu.

Kisubilii bɔŋmantikaati

(Kpèè Maat 13.31-32, Maar 4.30-32)

18 Ní Yeesu gíti tí dū tibɔti tiba ki ŋmāntiǹ-bi yii: «M làá dū Unimbɔti Beel kí nántíǹ ba deeyaaa? Ba ní m làá dū-dì kí ŋmàntīǹ? 19 Dì náań nì kisubiki kin bi yíì muutaadee bil ní ubɔ yōoǹ ki dūu búĺ u-kpaabun, ní dì nyáń ki kpántì busubu, ní nnɔmbiyaamu dɔ́miń ki páaǹ mu-diiŋŋi bu-paŋŋi pu.»

Ŋkpɔnɔnyɔkɔ bɔŋmantikaati

(Kpèè Maat 13.33)

20 Ní u kútì ki lī yii. «Ba ní m gíti ŋūǹ kí dū Unimbɔti Beel kí ŋmàntīǹ? 21 An náań nì ŋkpɔnɔnyɔkɔ ŋun ní unimpu dū ki ŋmālim̀ ŋkpɔnɔyim tikpil poon ki búuń, ní busaa kɔkɔ jɔ́m̀ee ní.»

Kipunyɔkɔwaai bɔti

(Kpèè Maat 7.13-14, 21-23)

22 Yeesu nìn còom̄ ki jītí ntiŋwaamu nì ŋkpaamu ki dàkà Unimbɔti bɔti ki cá Jeerusaleem. 23 Ní ubɔ bālifì-u yii: «Ukpil, binib fiii di làá dāá pée ká difiilaaa?» Ní Yeesu kíí-u yii: 24 «Pɔ́ɔm̀maan ni-ba kí dīmaan kipunyɔkɔwaai kí kɔ́ Unimbɔti beelin! Mbaamɔn ní m tùkù-ni, binib tikpil làá dāá nyàab̀ kí kɔ́, kaa làá dāá ŋmā.

25 «Unimbɔti kudiidaan yaa láa yíkì ki pīiǹ u-punyɔkɔkee, ni dāa kíǹ ki yú boon ki gbáà kipunyɔkɔ ní ki lì yii: <Ti-Dindaan, pìitī-ti!> Ní ú dāá kíí-ni yii: <Maa nyí laakin ní ni sée.> 26 Niinee ní ni dāa lì yii: <Ti nì si nìn jíń ki nyùn̄, a dɔ́miń ti-tiŋkin ki yúl̀ ti-daŋŋi pu ki dàkā Unimbɔti bɔti.> 27 Ní ú fàtīí kùbitī kí tùkù-ni yii: <Maa nyí laakin ní ni sée. Sútímaan niin kí wàatī-mi, nimbi bikpitiŋaliibee kɔkɔ.> 28 Niin ní ni làá dāá ká Abraam nì Isaaki nì Jaakɔb nì Unimbɔti bɔnaatiliibi kɔkɔ kā Unimbɔti Beelin, ní nimbee, bí dū-ni kí fá mmɔŋki, ní ní dāá sɔ̄ anyin gà tɔb kàkaka. 29 Binib làá dāá nyānní duulinya jaŋŋi kɔkɔn, kí dāan̄ kí kɔ́ Unimbɔti Beelin kí jī nnaam. 30 Bin bin sá kɔŋkɔnnee biluŋkikaabee, biba di dāa sá bipeepeekaabi, ní bin sá kɔŋkɔnnee bipeepeekaabee, biba dāa sá biluŋkikaabi.»

Yeesu yáliŋkì Jeerusaleem pu

(Kpèè Maat 23.37-39)

31 Ŋyunti gbantee ní Fariisab biba dɔ́miń Yeesu cee ní ki bí-u yii: «Yīkì doo kí nīn cá laaba, kun puee Eeroodi nyàab̀ kí kpɔ̀-si.» 32 Ní Yeesu kíí-bi yii: «Cùú tùkùmaan Eeroodi un cáá iciin kii jiiŋkpaayee yii: <M làá jà arasiniibi kí cáaǹ bibunliibi díǹ nì fool, daapudalee, m dóò dee.> 33 An máaǹ ḿ còom̀ díǹ nì fool nì daapudal, kun puee an kaa pú nsan yii Unimbɔti bɔnaatiliibi ń kpú laaba an yaa kaa sá Jeerusaleem.

34 «Jeerusaleem yab, Jeerusaleem yab, nimbi bin kù Unimbɔti bɔnaatiliibi ki cáá ataŋkpee ki yāŋkí ki kù bin Unimbɔti túnnée, ataa aŋa pu ní maa nyàab̄ kí kóoǹ-ni kí kpāfì m-cee kii ukɔl nín kōontí u-biyaamu kí ŋá u-taapu kí dū u-feeŋyi kí bìin̄ mu-pu miŋyee! Ama ní ni yíì. 35 An puee Unimbɔti làá fá ni nì ni-diiku. Ibaamɔn ní m tùkù-ni, naa làá ti ká-mi kí nīn cí ŋyunti ŋun ni làá dāá sòoǹ m-pu yii: <Unimbɔti ń bìin̄ un u túnnée boonee.>»