Nín̄ nyíǹ ni-ba nì mpoonnyoon
(Kpèè Maat 10.26-27)
12
1 Ŋyunti gbantee, binib nìn kpáfì Yeesu cee ki wīikí tikpil, an kaa cáá ŋkaan. Bi nín múkú tikpil puee, bi nìn kíǹ ki tà tɔb ní. Ní u kíĺ ki bíi sòoǹ nì u-boonnooliibi ki lī yii: «Tikɔkɔ poonee, ní nīn nyíǹ ni-ba nì Fariisab kpɔnɔnyɔkɔŋu pu, an dàkà yii bi-poonnyooŋŋu. 2 Tin kɔkɔ bí dibalinee, bi làá bìitī ti-pu, ní tin kɔkɔ baa nyée, bi làá béé-tì. 3 An puee, tin kɔkɔ ni yaa láa lī dibɔmbɔndinee, ŋwiimpu ní bi làá dāá gbìl̄-tì, ní tin ni yaa láa kɔ́ kudii poon ki lɔ́kɔfèe, mpaampiin pu ní bi làá dāá bāakì-tì.»
Un máaǹ bí fàŋkèe
(Kpèè Maat 10.28-31)
4 «Nimbi m-bɔɔbi ní m tùkù tibɔti nee. Ní taa fàŋkìmaan bin kù binib, ní boonee kaa ti ŋūǹ kí ŋá tiba kí kūtèe. 5 M làá dàkà-ni un ni máaǹ kí fàŋkèe. Fàŋkìmaan Unimbɔti un ŋūǹ kí lēē dimaŋfal ní ki gíti cáá mpɔn kí dū kinaŋ kí tɔ̄ ŋŋmin ŋkúm booneea. Tiŋman ní m tùkù-ni, un ní ni máaǹ kí fàŋkèe dee.
6 «Baa nyáfí seerib biŋmoo igboo ilaaa? Ama nì míǹ kɔkɔee, Unimbɔti kaa súntí seer báà ubɔ pu. 7 Unimbɔti kàan̄ ni-yikpiti kɔkɔ ki nyí ti-nyɔkɔm. An puee, taa fàŋkìmaan! Nimbi jítiǹ kuseerpaau.»
Un kaa nyí Yeesuee, Yeesu mun kaa dāa nyí-u
(Kpèè Maat 10.32-33, 12.32, 10.19-20)
8 «M tùkù-ni yii un kamaa di yaa sòon̄ binib nimbiin yii u sá man yɔuee, man Kinibiki mun làá dāá lì Unimbɔti tuuŋyi cee yii u mun sá man yɔu. 9 Ama un di yaa néé binib nimbiin yii waa nyí-meeb, man Kinibiki mun làá dāá néé Unimbɔti tuuŋyi nimbiin yii maa nyí-u. 10 «Un di yaa sòon̄ ki bíil̀ man Kinibikee ŋūǹ kí ká u-kpitii pɔ̄tam, ama un di yaa sòon̄ ki bíil̀ Unimbɔti Famee kpá kí ká u-kpitii pɔ̄tam.
11 «Bi yaa láa cúú-ni ki cūnnì akpafidiinni nì bitindaŋkpilib nì biyidambi nimbiin kí sòoǹ ni-bɔtee, ni nín máaǹ kí sòoǹ pu kí ŋmátée bɔti ń taa páb́-ni. 12 Di sá yii ŋyunti gbanti yaa bāańee, Unimbɔti Fam làá dàkà-ni tin sá ní sòoǹee.»
Ugaajagbaan ubɔ bɔŋmantikaati
13 Kunipaau kansikinee ní unil ubɔ bí-u yii: «Ukpil, tùkù m-maan ú yàkatī ti-baa fakal kí lēē man jandi kí tīī-mi.» 14 Ní Yeesu kíí-u yii: «Óò kijapaai, ŋma di kāaǹ-mi ni-bɔsoonliu nì ni-waŋyakatiliu?» 15 Ní u bí báà ŋma yii: «Ní nīn nyíǹ ni-ba tiŋan kí taa nín̄ cáá nnimbitaataam, kun puee báà unil yaa yāntì ki sá ugaaja min, u-gaajawanti di kaa yì-tì ní u cáá dimaŋfal.»
16 Ní u dū tibɔti nee ki ŋmāntì yii: «Ugaaja ubɔ di nìn bí ki cáá tikpaatan ki kùn̄, ní an lòon̄ tiŋan. 17 Ní u lī u-ban yii: <M làá pée gíti ŋá mana deeyaaa? Maa ti cáá mpaan laaba kí cáá m-jikaati kí ŋá.> 18 Niinee ní u bí yii: <M béè m nín làá ŋá puee: m làá kpìtī m-cakalaabi ní kí fàtīí gāā bikpaŋkpaambi, ní kí kóoǹ m-jikaati kɔkɔ nì m-wanti tin kíǹee kí gbéeǹ. 19 M yaa ŋá míǹ ki dóòyee, ní ḿ bí m-ba yii: M cáá tikɔkɔ nì tikɔkɔ tikpil kí jī kí nyɔ̀ kí nīn fàal̀ kí ŋùŋfì áli abin kupaau.> 20 Ama ní Unimbɔti bí-u yii: <Ugbaan, kunyeeu nee gba, m làá fàtīí fōō a-naŋki. Tin kɔkɔ a bɔ́ntì ki yóoǹ a-bee, ubɔ di làá nīn kíǹ ki yì.>» 21 Ní Yeesu gíti lī yii: «Míǹ ní án làá ŋá un kamaa nyàab̀ tigaajawan ki yōontí u-ba, ama ní kaa sá ugaaja Unimbɔti nimbiineec
Nín̄ mákámaan Unimbɔti pu
(Kpèè Maat 6.25-34)
22 Míǹ boonee ní Yeesu bí u-boonnooliibi yii: «An pu ní m tùkù-ni yii ní taa nín̄ nìiǹ tipɔjin nì tiwampeeŋkaal pu, 23 kun puee dimaŋfal jítiǹ tijin, ní tiwun mun jítiǹ tiwampeeŋkaal. 24 Kpèèmaan inoon! Iaa būul̀, kaa cēē, kaa cáá kukaatuŋu, kaa tí cáá cakalaa, ama Unimbɔti kpīintí-i. Kin nimbi bin jítiǹ inoon kpataaayee fáà? 25 Báà a yaa bíi yáliŋkí nì a-ba, saa ŋūǹ kí gbéeǹ a-maŋfal fɔkɔŋŋu pu fiii. 26 Ni yaa kaa ŋūǹ kí ŋá tin bí fiii mimmee, kin ba pu ní ni yáliŋkí tin kíǹee pu? 27 Kpèèmaan mpumpukum! Maa tūǹ ditundi ki gì, kaa lù satab, ama m tùkù-ni yii ubɔti Saloomɔn gba, nì u-gaajati kɔkɔeed, waa ŋúń ki ká tiwannyaandi ki pēeǹ an bàn̄ mpumpukum nee kansikin miba nyaaŋku. 28 Unimbɔti yaa nyāantí míǹ timool tin bí tisatin díǹ fool ŋŋmi ń dāá wà-tèe, mimmee waa làá ŋá án jītíǹ míǹ kí tīī-naaa? Ba pu ní ni-fookiiu kaa náaǹ mimmee? 29 Ní taa nín̄ bìǹ ki nyàab̀ tin ni làá jēe nì tin ni làá nyɔ̀ee, kí taa nín̄ páb́ ni-ba an wanti pu. 30 Duulinya nib bin kaa nóó Unimbɔtee di nyàab̀ tíǹ kɔkɔ kaa gbèentí, ama nimbee, ni cáá Ubaati un nyí yii an bàlifī ní nīn cáá an wantee. 31 Péé kí nyàab̀maan Unimbɔti Beel, ní ú tīī-ni kí kpáaǹ tin kɔkɔ kíǹee.»
Kpāafìmaan ni-gaajati yilpu
(Kpèè Maat 6.19-21)
32 «Nimbi bin sá kinikitiwaayee, taa fàŋkìmaan, ni-Baa lēē yii u làá tīī-ni Dibeel. 33 Nyāfìmaan ni-wanti kí dūú tīīmaan bisoodambi. Mimmee ni síiǹ animbitɔkɔl ŋin kaa cífée nì tigaajati tin kaa dóotée dee yilpu, laakin binaayub kaa ŋūǹ kí yɔ̀ɔɔ, dikɔtuul mun kaa ŋūǹ kí mɔ́ee. 34 Kun puee laakin a-gaajati bée, niin ní a-landɔkɔŋu mun bí.»
Bitɔntɔnliibi bin cí kaa gèeǹee
35 «Bɔ́ntímaan ni-ba, kí nīn gbìn̄ ni-dambalab, ni-fitilab ń nīn fòol̄ ki cí m-gítintam. 36 Ní nīn bí kii bitɔntɔnliibi bin kpiliu búntì animpucaŋgbiil, bi kā ki cí-u, u yaa láa bāań ki fáá kipunyɔkɔ bí pìitī-uee. 37 An sá mmɔn ki tīī bitɔntɔnliibi bin kpiliu bāań ki ká bi kā ki wāĺ, kaa gèeǹee. Ibaamɔn ní m tùkù-ni, u làá dū ditɔntɔmbɔkutil kí pèen̄ ní kí yàntī bí kàl̄, ní ú cáań tijin kí tīī-bi. 38 Báà an yaa sá kunyataasiiu àá ŋkoosiim ní u yaa bāań ki ká bi kā kaa gèeǹee, an sá mmɔn ki tīī bidambi. 39 Ní gbìl̄maan tinee mun. Kudiidaan yaa nyí ŋyunti ŋun unaayuu làá dāan̄ kí yɔ̀-uee, u bàà kàal̀ kí cīití ní bí taa láa cíĺ u-diiku kí yɔ̀-u. 40 Míǹ mbaantiim, ni mun ń bɔ́ntí kí nīn címaan, kun puee man Kinibiki làá bàń ŋyunti ŋun naa bàà dàkafēe ní.»
Utɔntɔŋkpiti nì utɔntɔmmɔnti bɔti
(Kpèè Maat 24.45-51)
41 Ní Peetroo bí yii: «Ukpil, tibɔŋmantikaal gbantee, a lì timbi baba naaa, a lì báà ŋma ní?» 42 Ní ti-Dindaan kíí-u yii: «Tibɔŋmantikaal nee sá ki tīī utɔntɔnli kamaa un yú deedee ki cáá iciin, u-kpiliu dū u-cindi yab ki ŋúbiǹ-u ú nīn kpèé ki tìì-bi tijin ŋyunti ŋun sá ú tīī-bee ní. 43 An sá mmɔn ki tīī utɔntɔnli gbanti u-kpiliu yaa bāań ki ká u bíi ŋáań min u tùkū-uee. 44 Ibaamɔn ní m tùkù-ni, u-kpiliu làá dū u-gaajati kɔkɔ ní kí ŋúbiǹ-u. 45 Ama ní utɔntɔnlee yaa bí yii: <M-kpiliu yúntìń tikpil,> ní ki kíĺ ki bíi gbáà bitɔntɔnliibi bin kíǹee bininjab nì binimpoobi, ní ki jīǹ ki nyù ki gbéè, 46 niinee ní u-kpiliu ń dāá fàtīń ŋwiin ŋun pu waa dàkafī yii u làá gítińee nì kukúluu kun pu waa nyée. U yaa bāańee, see ú tɔ̀ntī-u ní kí dū-u kí tɔ̄ bin yíì kaa fōō Unimbɔtee laŋki.
47 «Utɔntɔnli un yaa nyí min ní u u-kpiliu là, ama ní kaa bɔ́ntì míǹ ki tīī-uee, u-gbati làá nīn wīikí tikpil. 48 Ama, utɔntɔnli un yaa kaa nyí min u-kpiliu lèe ní ki yīntiǹ-uee, u-gbati kaa dāa náaǹ. Sii un Unimbɔti yaa tīī tikpilee, u dāa bàlifī-si tikpil mun ní, ní sii un Unimbɔti yaa ti kpāaǹ tikpilee, see ú dāá bàlifì-si tikpil mun.»
Kun pu Yeesu dɔ́mińee
(Kpèè Maat 10.34-36)
49 Ní Yeesu bí yii: «M dɔ́miń kí cáań ŋŋmi kí tɔ̄ kitiŋ pu níe. M bàà là ŋú fōō dooooyee gba ní. 50 M làá fàl̀ falaa kii nnyimee. An puee m bí digìŋ́kpaandin kí nīn cí ŋyunti ŋun án làá dāá ŋée. 51 Ni nyí yii m dɔ́miń kí cáań ŋgbansɔŋfi kitiŋ pu níii? Aayee, m cáań diyakatil ní. 52 Di sá yii, kí yòon̄ kí nīn cée, binib yaa bí biŋmoo kudicaŋu poonee, bi làá yàkatī ní. Bita kaa làá nīn gbìliǹ bili, ní bili mun kaa làá nīn gbìliǹ bita. 53 Ubaati kaa làá nīn gbìliǹ u-jipɔɔn ní u-jipɔɔn mun kaa làá nīn gbìliǹ ubaati. Unaati kaa làá nīn gbìliǹ u-bisal, ní u-bisal mun kaa làá nīn gbìliǹ-u. Unimpu kaa làá nīn gbìliǹ u-coopu, ní u-coopu mun kaa làá nīn gbìliǹ-uf
Iyunti kamaa nì i-daanti
(Kpèè Maat 16.1-4, Maar 8.11-13)
54 Ní Yeesu bí kunipaauee yii: «Ni yaa ká atagban yaa yíkìń ŋwìiń jeetilaŋkee, ní ní lì yii: <Utaa làá nì,> ní ú lafun nì. 55 Ní dipeel buŋku yaa bāańee, ní ní bí yii: <Ti làá kɔ́ kutuntuŋun dee,> ní an lafun ŋáań míǹ. 56 Milimilidambi, ni nyí ki gàntī yilpu nì taapu daanti, ba pu ní naa ŋūǹ kí béé tin bíi jītí kɔŋkɔnneeyee?»
Kpèè kí ŋāŋkì sii nì a-juti kansikin
(Kpèè Maat 5.25-26)
57 «Ba pu ní naa dàkafī kí lēē min bí deedeeyee ni-ba?» 58 Yeesu kútì ki lī yii: «Ubɔ yaa cáǹ-si ibɔsoon, ŋyunti ŋun ní ni dáá bí nsanni ki cée, pɔ́ɔǹ a-ba kí ŋāŋkì tibɔti kí kúntí-tì nsanni niin, án nín làá ŋá pu ú taa dáaĺ-si kí cùnnì ubɔsoonli cee, ní úǹ ń dū-si kí tīī pilisib ń cáá-si kí pìin̄ sarkee. 59 M tùkù-si ibaamɔn ní, bi yaa cáá-si ki tɔ́ sarkanee, see á pà a-pɔndi kɔkɔ nyíki nyiki, báà gboo kaa kīntí, ní bí nín líí-si.»