Luuki 14

Yeesu cáaǹ ucùúdaan ubɔ

1 Ŋwiŋŋuŋfikaa ŋubɔ dalee, ní Fariisab kpilib ubɔ yíiń Yeesu ú dāan̄ u-dumpu bí jī tijin. Yeesu bàn̄ee, ní bin bí niinee kā ki cɔ́ŋkí-u. 2 Ucùúdaan ubɔ nìn kā u-nimbiin. 3 Ní Yeesu bālifì bimaradakaliibi nì Fariisab yii: «Ti-marau pú nsan tí cáaǹ ubunli ŋwiŋŋuŋfikaa dalaaa, an kaa pú?» 4 Ní baa kíí-u tiba. Ní u cúú ubunlee ŋal ní ki cáaǹ-u ní ki bí yii ú nīn kùǹ. 5 Míǹ boonee ní Yeesu bí-bi yii: «Ni-kansikin ubɔ di yaa cáá jipɔɔn àá unaa, ní u yaa jéetì lɔkɔn ŋwiŋŋuŋfikaa dal, waa lèekī-u malaaa?» 6 Ní baa ŋúń ki kíí-u an bɔti.

Unil nín máaǹ kí kàl̄ laakin jiŋaalbinee

7 Yeesu dáań ki ká yii bin bi yíiń bí dāan̄ kí jī tijinee bíi nyàab̀ ikakaamɔnti, ní u dū tibɔŋmantikaal ki sòon̄ nì bi-kɔkɔ ki lī yii: 8 «Bi yaa yíiń-si tinimpucan jim ní a yaa bàn̄ee, taa kàl̄ nyɔkɔpu jal pu, an yaa yíì, bi yíiń unikpaan un jítiǹ-see mun. 9 A dāa kpèéyee, un yíiń nimbi liitilee bāań a-cee ní kí bí-si yii: <Yīkì kí pɔ̄ ukpil nee mpaan.> Ní á yīkì nì icoo gbòooo kí nīn gítí boon boon kí cùú kàlīń. 10 Míǹ puee, bi yaa yíiń-si njimee, cùú kàlīń boon, ní un yíiń-see yaa bāań ki ká-si a kāń boonee, ní ú bí-si yii: <M-bɔɔ, dāá kàl̄ nyɔkɔpu dijamɔntiil pu^a.> Niinee an sá diyindi ní ki tīī-si, sii nì bin kɔkɔ bí niin kí jēe nimbiin. 11 Míǹ mbaantiim ní un kamaa yaa yōoǹ u-ba yilpuee, Unimbɔti làá sìntīǹ-u taapu, ní un yaa sīntì u-ba taapuee, Unimbɔti làá yòon̄-u yilpu.»

12 Ní Yeesu fātìi bí un yíiń-uee yii: «A yaa làá yíiń binib bí dāan̄ a-dumpu kí jī tijinee, taa yíiń a-bɔɔbi nì a-nabiyaamu, nì bin nàaǹ-see nì a-gaajajutiibi, kun puee bi mun ŋūǹ kí dāá ŋá míǹ kí yíiń-si mun. Mimmee bi pàn̄-si tin a nìn ŋá ki tīī-bee dee. 13 Ama a yaa ŋá tijin ki làá yíiń binib bí dāan̄ a-dumpu kí jēe, á yíiń bisoodambi, bideembi, bifaliŋfaambi nì bijɔfub. 14 A yaa ŋá mimmee, a làá nīn bí mmɔnni kun puee an nibee kaa ŋūǹ kí téeǹ-si, ní daliŋkin Unimbɔti yaa láa fīkitì deedeedambee, ní ú dāá pà-si.»

Njiŋkpaammi bɔŋmantikaati

(Kpèè Maat 22.1-10)

15 Bin nì Yeesu nìn kā ki jīǹee kansikin ubɔ nín gbìl̄ an bɔtee, ní u bí Yeesu yii: «Un làá dāá jī Unimbɔti Beelin jikaatee bí mmɔnneeee!» 16 Ní Yeesu kíí-u yii: «Unimbɔti Beel nín náań nì kuŋyee sèé: Kijapaai kiba di nìn bɔ́ntì njiŋkpaammi miba ní ki yíiń binib tikpil. 17 Njimee yuntiŋu bāańee, ní u tú u-tɔntɔnliu yii ú cùú tùkù bin u yíińee yii: <Dāam̄maan, an kɔkɔ bɔ́ntì^b.> 18 Ní bi-kɔkɔ bíi tìì inaakpal fám kun pu ní baa làá ŋmā kí cùee. Upeepeekaayee bí yii: <M cíkitì-si kifuulii, maa làá ŋmā kí dāan̄, kun puee m dá kusaau kubɔ, m máaǹ kí cùú kpèè-ku.> 19 Ní ubɔ mun bí yii: <M cíkitì-si kifuulii, maa làá ŋmā kí dāan̄, di sá yii m dá inaa in bi cáa kù tikpaalee saalaa. M làá cáá-i kusaau kí màkan̄-i kí kpèè.> 20 Ní ubɔ mun tí bí yii: <M dáá pée cáá unimpucaan dee, an puee maa làá ŋmā kí dāan̄.> 21 Ní utɔntɔnlee gítìń ki tùkū u-kpiliu binibee nín kíí-u puee. Niinee ní ukpil fōō diŋuul ní ki bí-u yii: <Nín̄ cá malaa kitiŋin sampaambi pu nì adan pu kí cáań bisoodambi nì bideembi nì bijɔfub nì bifaliŋfaambi!> 22 An kútì fiiiyee, ní utɔntɔnlee gítìń ki bí yii: <A nín bí yii ḿ ŋá puee, m ŋá míǹ, binib tikpil dɔ́miń, ama mpaan dáá gbíntìi bí.> 23 Ní ukpil bí-u yii: <Nín̄ cá isaasan pu nì ikpaabuku. A yaa pée ká binib biŋyee, á páb́-bi bí dāan̄ án nín làá ŋá pu m-diiku ń gbée. 24 Ibaamɔn ní m sòoǹ nì ni, bin kɔkɔ m bàà péé péé ki yíińee, báà ubɔ kaa làá dáká m-jinti nee.>»

Unil ń fá tikɔkɔ kí nóó Yeesu

(Kpèè Maat 10.37-38)

25 Dinikitikpaandi diba nì Yeesu nìn táá ki còom̄. Ní Yeesu fātì ki bí-bi yii: 26 «Un yaa dɔ́miń man cee ki là kí kpántí m-boonnooliuee, see ú nīn néeń man ki jítiǹ u-baa nì u-na nì u-nimpuu nì u-biyaamu nì u-nabiyaamu, ní kí nīn néeń man ki jítiǹ úǹ u-ba. 27 Sii un yaa kaa yōoǹ a-dɔpuntikaaŋu ki túǹ kí nīn nóó-mee kaa ŋūǹ kí nīn sá man boonnooliu. 28 Ni-kansikin ŋma di yaa làá mā kudikpaaŋŋu, kaa kāl̀ ki cɔ́tì kunimbiŋmiiu kí béé animbil ŋin u cááyee yaa làá bà ú mā an diiku. 29 An yaa sá fám, u cōontí kudii ní kí dūú gbèen̄, kaa ti ŋūǹ kí púntí, ní bin kɔkɔ jītí ki wāĺ-kuee kíǹ ki bèel̄-u yii: 30 <Kpèè, kijapaai nee bàà kíĺ ki bíi māā kudii dee ní ŋŋmam kaa ti bí-u ú púntí.> 31 Àá, ubɔti ulɔu di yaa làá cùú jáǹ u-bɔtijuti waa kàal̀ kí kpèè yii u-nib kutukub saalaa yaa ŋūǹ kí cùú jáǹ ubɔti un dòoń kí jáǹ-u nì binib kutukub mmuŋkuee. 32 U yaa kpēē yii waa làá ŋmēe, ŋyunti ŋun ubɔti un béeyee dáá bíń ndan ki dòońee ní ú tɔ̄ binib ń cù kí gbàam̀-u yii: <A là ḿ ŋá mana ní ŋgbansɔŋfi ń dāan̄ ti-kansikin ní?>» 33 Ní Yeesu gíti lī yii: «Míǹ mbaantiim ní ni-kansikin un yaa là kí nīn sá man boonnooliuee ń fá tin kɔkɔ u cááyee.»

Ŋyaam yaa fá mi-mɔŋŋuee, maa ti bí tiban

(Kpèè Maat 5.13, Maar 9.50)

34 «Ŋyaam sá tiwammɔntiil ní, ama ŋyaam yaa kpíìyee, mana ní bi làá ŋá ní mí fàtīí mɔ̄ɔkì? 35 Màa ŋān̄ bí dūú bíĺ kitiŋ án tīī ntiŋkpamaaa, kaa tí ŋān̄ bí dūú bíĺ tiwambɔlkaal taapu án lòoǹ mun. Asee bí dūú fá ditampundi pu. Un yaa cáá ditafalee ń pīlifì.»