Maatiiu 14

Yoowaneesi unyiŋfaldi kúm

(Kpèè Maar 6.14-29, Luuki 9.7-9)

1 Ŋyunti gbantee, Eeroodi un nìn sá ubɔti Galiileeyee gbìl̄ bi nín sòoǹ Yeesu pu miŋyee 2 ní ki bí u-tɔntɔnliibi yii: «Unee di sá Yoowaneesi un fùul̀ binib Unimbɔti nyimee. U fātìi fīkitì ní, an pu ní u cáá mpɔn ki ŋáań maamaacib míǹ.»

3 Di sá yii Eeroodi nìn tīī mara bí cúú Yoowaneesi kí bóob́-u iŋmii ní kí cáá-u kí tɔ̄ sarkan. Kun pu ní u nìn ŋá mimmee di sá yii u nìn cáá u-maan Fiiliipi nimpuu, bi yíì-u Eeroodiyadi^a. 4 Yoowaneesi nìn tùkū Eeroodi yii: «An kaa máaǹ á cáá unimpu gbanti^b.» 5 Niinee ní u kíǹ ki nyàab̀ kí kpɔ̀ Yoowaneesi, ama ní ki fàŋkí Juuda yab, kun puee báà ŋma nìn nyí Yoowaneesi pu yii u sá Unimbɔti bɔnaatiliu.

6 Daliŋkin bi bíi jīǹ Eeroodi maaliwiiŋŋu jiŋaaliuee, Eeroodiyadi bisal ŋɔ́ń bin bi yíiń jiŋaalee nimbiin, ní an mɔ́ɔkiǹ Eeroodi. 7 U nìn pūtì ki bí yii: «Kun kamaa ní a yaa lèe, á bàlifì-mi, m làá tīī-si kudɔŋu.» 8 Ní usapɔɔnee na yāntì u lī yii: «Á tùkutī Yoowaneesi un fùul̀ binib Unimbɔti nyimee yil kí tàkan̄-mi kpaatan kɔŋkɔnnee.» 9 Niinee, an kɔ́ ubɔti kunimbaau. U nín gíti dáá pūtì bin u yíińee nimbiinee ní u kíí yii u làá tīī-u, 10 ní ki tú ubɔ ń cù kusarkadiin kí tìlīń Yoowaneesi un fùul̀ binib Unimbɔti nyimee yil kí cáań. 11 Ní bi tīl̀ Yoowaneesi yil ki ŋá kpaatan, ki cáań ki tīī usapɔɔnee, ní u mun cáa tīī u-na. 12 Yoowaneesi boonnooliibi nìn dɔ́miń ki yōoǹ-u ki cáa síb́, ní ki cūtì ki tùkū Yeesu tin jítèe.

Yeesu kpíiǹ binib kutukub biŋmoo

(Kpèè Maar 6.30-44, Luuki 9.10-17, Yoow 6.1-14)

13 Yeesu nín gbìl̄ mimmee, ní u yíkì niin u nì u-boonnooliibi kɔ́ buŋalimbu ki búntì laakin binib kpée, ama ní kunipaau nyánní ntimun ki còom̄ ataa ki nín jì u-boon. 14 Yeesu nì u-boonnooliibi nyáń buŋalimbunee, ní ki ká kunipaau nín tíibińee. Binibee nìn cúú-u falaa ní u kíĺ ki bíi cāantí bibunliibi.

15 Kujoou bíi jóotée, ní u-boonnooliibi sútìń ki pìl̄-u, ní ki bí-u yii: «Binib kaa kóò laakin ti bí nee, kunyeeu mun bíi móotí. Míǹ puee, yàntī binib ń nīn cá ntimbilimun kí dā tijin kí jī.» 16 Ní Yeesu kíí-bi yii: «An kaa bàlifī bí cù, nimbi ni-ba ń tīīmaan-bi tijin bí jī.» 17 Ní bi bí-u yii: «Kpɔnɔb biŋmoo nì ijɔm ili ja di bí.» 18 Ní u bí yii: «Yòon̄ kí cáaḿmaan-mi!» 19 Niinee, ní u bí yii samaa kɔkɔ ń kàl̄ kumɔsɔŋu pu, ní u fōō kpɔnɔb biŋmoo nì ijɔm ilee ní ki wáaǹ ki kpēē kutaa, ki jáam̀ Unimbɔti, ní ki gífì gífì kpɔnɔbee ki dūu tīī u-boonnooliibi, ní bíǹ dūu yākatì binib kɔkɔ. 20 Ní bi-kɔkɔ jíń ki díkí, an kíǹ, ní bi kóoǹ akpɔnɔkati nì ajɔŋgin ŋin kíǹee ki gbéeǹ tikabiti saalaa nì tili^c. 21 Binib bin nìn jíń tijin gbantee nìn bàn̄ kii bininjab kutukub biŋmoo, baa kàan̄ binimpoobi nì mbiyaamu.

Yeesu cōom̀ nnyim pu

(Kpèè Maar 6.45-52, Yoow 6.16-21)

22 Niinee ní Yeesu yāntì u-boonnooliibi kɔ́ buŋalimbu malaa ki līntì ki dūtì lapu buŋgbandi, ní Yeesu úǹ dáá bí niin ki tùkù binib yii bí nīn kùǹ. 23 U yāntì bi nín kùǹee, ní u kākatì ŋkpaanceeti dijool pu kí mèè. Kunyeeu mɔ́ee u dáá gbíntìi bí niin u-baba. 24 Buŋalimbuee mun nìn bàn̄ dimɔɔl kansikin kaa ti cá, kun puee kubuŋu nìn túŋkiń-bu ní tinyiŋgban nìn yāŋkí-bu. 25 Ki cá kutaawuntuŋuee, ní Yeesu tɔ́kɔǹ nnyim pu ki còom̄ ki cá u-boonnooliibi cee. 26 Bi nín ká u páaǹní ki còomìń nnyim puee, ní bi-pɔbiliŋ máĺ, ní bi bí yii: «Ufaŋfanti dee!» ní tifaandi kɔ́-bi ní bi bíi gbáà ibiil. 27 Kpalaayee ní Yeesu bí-bi yii: «Cúúmaan ni-pɔbiliŋ, an sá man! Taa fàŋkìmaan!» 28 Niinee ní Peetroo bí-u yii: «M-Dindaan, an yaa lafun sá sii, á yàntī ḿ tɔ́kɔń nnyim pu kí còom̀ kí dāan̄ a-cee.» 29 Ní Yeesu bí-u yii: «Nín̄ dòoń!»

Ní Peetroo nyáń buŋalimbun ki tɔ́kɔǹ nnyim pu ki còom̀ ki nín cá Yeesu cee. 30 U nín bíi còom̄ ki cá ki ká kubuŋu nín jītí pu mpɔnee, ní u fāŋkì, ki kíĺ ki bíi múl̀ nnyimin, ní ki fáá mbiil yii: «M-Dindaan, fīī-mi.» 31 Kpalaayee ní Yeesu tāntì u-ŋal ki cúú-u ní ki bí-u yii: «A-fookiiu pátì, ba pu ní a fāŋkì?»

32 Ní bi-liitil kɔ́ buŋalimbun, ní kubuŋu ŋmíl̀. 33 Bin nìn kā buŋalimbunee gbāaǹ Yeesu nimbiin ki bí-u yii: «Ibaamɔn, a lafun sá Unimbɔti Jipɔɔn.»

Yeesu cáaǹ bibunliibi Geeneesareeti

(Kpèè Maar 6.53-56)

34 Bi dūtì dimɔɔl ki bàn̄ Geeneesareeti tiŋki jandi dibee ní ki kpákatì^d. 35 Niin yab kpáàa béè Yeesu, ní ki nākaǹ bi tùkū ajan kɔkɔ nib, ní bi yōoǹní bibunliibi kɔkɔ ki cáań u-cee 36 ki mèé-u yii ú yàntī bí gbēē u-bɔkutijúti kpaŋkpam, ní bin kɔkɔ lafun gbēēyee pɔ́ɔkì.