Maatiiu 15

Juuda yab yaajakoobiliŋ

(Kpèè Maar 7.1-23)

1 Fariisab nì bimaradakaliibi biba nyánní Jeerusaleem ki dɔ́miń Yeesu cee ní ki bālifì-u yii: 2 «Ba pu ní a-boonnooliibi kaa nóó ti-yaajakoobiliŋ ní? Kun puee baa fíntí bi-ŋalii kí wàatī ní kí nín jī tijin, kii ti-koobiliŋ nín sá puee^a.» 3 Ní Yeesu kíí-bi yii: «Kin nimbi fáà, ni nín nóó ni-yaajakoobiliŋ ki yìntī Unimbɔti marabee! 4 Unimbɔti bí yii: <Á nīn tɔ́ a-baa nì a-na,> ní ki gíti bí yii: <Un di yaa sòon̄ ki bíil̀ u-baa kii u-nee máaǹ bí kpɔ̀-u^b.> 5 Ama ní nimbi dàkà binib yii a ŋūǹ kí tùkù a-baa àá a-na yii: <M nín bàà làá tīī-si tiŋyee m dūu ŋá Unimbɔti saraa.> 6 A yaa gíti dáá lī mimmee, an kaa ti sá á tūtuǹ a-baa. Ni nín ŋáań pu ki kpìtī Unimbɔti bɔti ki ŋáań min ni-naanjab dàkèe dee. 7 Mpoonnyoondambi! Unimbɔti bɔnaatiliu Yeesaya nín sòon̄ ni-pu miŋyee sá ibaamɔn. U nìn lī yii:

8 <Unimbɔti bí yii: Binib nee nyɔ́ŋkí-mi nì bi-nyɔmmu fám ní,

bi-pɔbiliŋ dátiǹ-mi.

9 Bi jáaḿ-mi fám ní,

kun puee tin binib náańee ní bi dàkà,

ní ki cáa yíì man marab^c.>»

Tin kɔ̄ntí unil tijɔkɔndee

10 Míǹ boonee ní Yeesu yíiń kunipaauee u-cee ní ki bí-bi yii: «Ní pīlifì kí gbìl̄ tibɔti nee taapu tiŋan. 11 An kaa sá tin di kóò unil nyɔkɔnee di kɔ̄ntí-u tijɔkɔndi Unimbɔti nimbiin, ama an sá tin nyēē unil nyɔkɔnee di kɔ̄ntí-u tijɔkɔndi.»

12 Niinee, u-boonnooliibi sútìń ki bí-u yii: «Aa nyí yii tibɔti tin a bàà sòon̄ee wùn̄ Fariisabaaa?» 13 Ní Yeesu bí yii: «Busubu bun kamaa ní m-Baa un bí yilpuee kaa cóoǹee, bi làá dāá fùkù-bu kí fá ní. 14 Yàntīmaan-bi. Bi sá bijɔfub ní ki dàtī bijɔfub: ujɔfu yaa dàtī ujɔfuee, see bi-liitil ń lítí mboon.» 15 Ní Peetroo bí-u yii: «Tùkù-ti dilaŋkpandi din a bàà gāāyee taapu.» 16 Ní Yeesu bí-u yii: «Ni mun kaa láá cáá iciin níii? 17 Naa nyí yii tin kɔkɔ kóò unil nyɔkɔnee cá u-poon, ní boonee ú cùú sɔ́ntáaa? 18 Ama tin nyēē kinyɔkɔnee nyēē unil pɔbilin ní, an di kɔ̄ntí unil tijɔkɔndi Unimbɔti nimbiin, 19 kun puee unil pɔbilin ní ilandɔkɔkpiti kɔkɔ nyēeń: nnikpaakoon, bininjab nì binimpoobi laakpaati, binaacimpɔmbi nì bisapɔmbi jɔkɔnti, bunaayubu, abɔgaan, asiibil. 20 Tin kɔ̄ntí unil tijɔkɔndi Unimbɔti nimbiinee dee. An yaa sá á jī tijin kaa fíntì a-ŋalii kii akoobil nín sá puee, an kaa kɔ̄ntí-si tijɔkɔndi Unimbɔti nimbiin.»

Ukanaannimpu ubɔ fookiiu

(Kpèè Maar 7.24-30)

21 Boonee, Yeesu yíkì niin ki nín cá Tiir nì Siidɔn watil pú. 22 Ukanaannimpu ubɔ nìn nyánní niin pú ki dɔ́miń ní ki fáá mbiil yii: «Ukpil, Daafiidi naantiiu, sɔ̄ m-saai! Di sá arasinii ubɔ kā m-bisal pu ki páb́-u ŋkpitim pu.» 23 Ama ní Yeesu kaa pée gātì-u tiba, ní u-boonnooliibi dɔ́miń ki gbāam̀-u yii: «Jà unimpu nee, di sá u pá ti-boon ki tátí kaa gbèentí.» 24 Ní Yeesu kíí yii: «Bi túnní-mi Isirayeel yab bin wáŋkì kii ipiiyee ŋmaniŋma cee ní.» 25 Ama ní unimpuee dɔ́miń ki gbāaǹ u-nimbiin ní ki bí yii: «Ukpil, jòoń-mi!» 26 Ní Yeesu lī yii: «An kaa máaǹ bí dū mbiyaamu jinti kí tīī mbɔbiyaamu.» 27 Ní unimpuee bí yii: «Tiŋman Ukpil, ama nì míǹ kɔkɔee, mbɔbiyaamu dindambi yaa bíi jīǹee, mbɔbiyaamu mun tòó igbasigbasi in lítée ní ki jīǹ.» 28 Niinee ní Yeesu bí yii: «Unimpu nee, a-fookiiu wīikéeee! A nín là puee, án ŋá míǹ kí tīī-si.» Niin niin ní u-bisalee pɔ́ɔkì.

Yeesu cáaǹ bibunliibi tikpil

29 Yeesu yíkì niinee ní ki búntì Galiilee mɔɔgbandi, ní ki cūtìi jɔ́m̀ dijool diba pu ki kāl̀. 30 Kunipaau nìn dɔ́miń u-cee ki yōoǹní bin tà bi-taaŋi puee nì bin wɔ̀b̄ee, nì bijɔfub, nì bimɔɔmiimbi, nì bibunliibi biba mun tikpil, ní bi cáań-bi ki bíl̀ u-nimbiin, ní u cáaǹ bi-kɔkɔ. 31 An nìn ŋá kunipaauee maamaaci bi nín ká bimɔɔmiimbi sòoǹ, bin wɔ̀b̄ee pɔ́ɔkì, bitaakpalfub kíǹ ki còom̄ tiŋan, ní bijɔfub mun wál̀ee puee, ní bi bíi pàkà Isirayeel Nimbɔtiu.

Yeesu kpíiǹ binib kutukub binaa

(Kpèè Maar 8.1-10)

32 Yeesu yíiń u-boonnooliibi, ki bí-bi yii: «Nnibiim nee gbí-mi falaa: di sá iwiin ita sèé nee bi nín bí m-cee, kaa cáá tiba kí jēe. Maa là kí jà-bi bí nīn kùǹ nì ŋkùm, bi-wunti ń tin yɔ̀tī nsanni.» 33 Ní u-boonnooliibi bí-u yii: «Kin, la ní ti làá nín kánní tijin kuteeu nee ni kí kpíiǹ nnibiim min bí nee dee?» 34 Ní Yeesu fātìi bālifì-bi yii: «Kpɔnɔb biŋa ní ni cáá ní?» Ní bi kíí-u yii: «Biluli, nì njɔŋkaaŋkaamu.» 35 Niinee ní u bí samaayee kɔkɔ ń kàl̄ taapu, 36 ní ki fōō kpɔnɔb bilulee nì ijɔmee, ki jáam̀ Unimbɔti an pu, ní ki gífì gífì ki tīī u-boonnooliibi yākatì kunipaauee. 37 Ní báà ŋma jíń ki díkí, ní bi kóoǹ agin ŋin nìn kíǹee ki gbéeǹ tikabiti tiluli. 38 Bin nìn jíń tijikaal gbantee nyáń bininjab kutukub binaa, baa kàan̄ binimpoobi nì mbiyaamu. 39 Bi jíń ki dóòyee, ní Yeesu yāntì kunipaauee nín kùǹ ní u kɔ́ buŋalimbu u nì u-boonnooliibi búntì Magadan watil pú.