Kugbɔŋu kun sòoǹ
Jooweel
puee
Tibɔkilkaal
Unimbɔti bɔnaatiliu Jooweel bɔti yúntì, ama tì dáá gbíntìi cáá ti-pɔŋŋu ki dāa sāā díǹ. Taa baasii nyí un ní u sée, kaa tí nyí ŋyunti ŋun u dūu kāl̀ kitiŋ puee. Dibɔyil din pu Jooweel gbɔŋku tɔ́kɔ́ee sòoǹ ki cántí ŋwiin ŋun ti-Dindaan làá dàkà u-pɔŋŋu kí sòoǹ anibul bɔtee. U làá dāá sòoǹ Isirayeel yab bɔti kí nóó nì mbimbim min bi cáá bi-Nimbɔtiu puee, ní kí sòoǹ anibul ŋin kíǹee bɔti kí nóó nì mbimbim min bi cáá Isirayeel yab puee. Kí wàatī ibɔsoon wiiŋŋu ń bàńee, ibɔl in làá cáań asaluu kí nàan̄ tikɔkɔ kí ŋmìntī binib tijinee làá bàń. Inaakitoon làá dāan̄ kí bìin̄ kitiŋ pu ní ŋweel ń yūĺ ní ŋŋmi ń wà kitiŋ pu wanti ní bijanjaliibi ń dāan̄ kí já kujaau. Tíǹ gbanti kɔkɔ dàkà tiwan kɔkɔ di làá nàan̄ ŋwiin gbanti puee ní (1.2-12, 15-18, 2.1-11). Tiba kaa dàkà-ti yii tibɔti tin pu Unimbɔti bɔnaatiliu bíi sòoǹee sá tin lafun nìn jítì u-yuntiŋuee, àá an sá tin bi lēē ki dàkā-u kí tīī tin u làá sòoǹee mpɔnee.
An yaa pée sá puee, tibɔti tin pu u bíi sòoǹee cántì tiŋan. Isirayeel nibul din ní bi gbákal̀ pílpil, báà ti kpáàa cáá ŋŋmam kí tɔ̄ kunimbɔtidiin ditundee máaǹ kí fàtīí gítiń Unimbɔti cee kí gbàam̀-u (1.13-14, 19-20, 2.12-17). Bi nín gbákal̀-bi puee di sá kisàmbiki kin pu bi làá dī kí ká difiilee. Digbíl din bi pōoǹ-bee (2.18-27, 3.1-5, 4.17,18-21) nyáń di-ba nì Unimbɔti ŋuul din yāntì baa ti pée cáá báà tiba nì tibee. Ibɔsoon làá nàan̄ anibul ŋin kíǹee (4.1-16), ama Isirayeel nibul làá gbìl̄ Unimbɔti yaa bí bi-kansikinee taapu. Jooweel gbɔŋku sòoǹ yii ŋwindalee, Unimbɔti làá dāá nīn bí ki tīī báà ŋma ní, di sá yii Unimbɔti làá yàntī u-Fam ń kpákatiń unil sá kamaa pu (3.1-2). Pantikooti wiiŋŋu dalee, Kriisitoo yab bipeepeekaabee nìn fōō dipoondi gbanti (Atuun 2.16-21).