Jooweel 4

Ti-Dindaan làá sòoǹ atimbun bɔti

1 Ti-Dindaan bí yii: «Ŋyunti gbantee,

m làá dāá fàtīí gíiǹ Juuda nì

Jeerusaleem timmu gaajati kí tīī-mu^a.

2 M làá dāá kóoǹ atimbun kɔkɔ kí kpāfì

ní kí cáá-bi kí sìntī ditantakal din bi yíì yii

<ti-Dindaan sá ubɔsoonlee> ni.

Niin ní m làá sòoǹ bi-bɔti,

bi nín ŋá Isirayeel yab

bin sá m-nibul nì m-fakalee puee.

Di sá yii bi jìn̄-bi bi yàl̄ ki kɔ́ atimbun aban,

ní bi cúú m-tiŋki ki yākatì.

3 Bi tɔ́ kasi ki yākatì m-nibul nib,

ní ki dū mbininjabiyaamu ki nyáfì

kí ŋmā kí pà nnimpulaakpaamu,

ní ki dū nsapɔmbiyaamu ki nyáfì

kí ŋmā kí dā ndaam kí nyɔ̀.

4 Nimbi, Tiir nì Siidɔn yab,

nì Fiiliistii tiŋgbammu yab,

ni nyàab̀-mi nì tilati ní?

Ni là kí tɔ̀-mi ipɔntoon níii?

Báà ni yaa là kí tɔ̀-mi ipɔntoon,

m làá fàtīí gíiǹ ipɔntoon gbanti

kí tɔ̄ ni-pu ní malaa.

5 Ni yōoǹ m-nimbiliŋ nì m-sindaariyau,

ni kpáaǹ m-gaajawanti tin pɔ̄ɔ̄ kudaauee

ki síiǹ ni-waadiiŋŋin.

6 Ni dū Juuda nì Jeerusaleem timmun yab

ki nyáfiǹ Greeki yab,

bí nīn dátiǹ bi-tiŋki.

7 Ama man làá yòon̄ní-bi

laakin ni nyáfì-bee kí gíiǹní,

ní kí gíiǹ tikpitil tin ni ŋá-bee

kí tɔ̄ ni-pu.

8 M làá dū ni-jipɔmbi nì ni-bisalib

kí nyāfiǹ Juuda tiŋkin yab.

Bi mun làá gíiǹ-bi kí nyāfiǹ Sabaa yab,

bíǹ bin kóò an dátèe.

Man ni-Dindaan di lī míǹ.»

Kujaau nì ibɔsoon

9 Bāakìmaan kí tùkù atimbun yii:

«Bɔ́ntímaan ni-ba kí cù kujaau.

Tīīmaan ni-baatandambi kunyannyaau.

Bijanjaliibi kɔkɔ ń yīkì kí nīn cá kujaau.

10 Dūmaan ni-kooŋi kí mɔ́ɔ́ ntàataajimu,

ní kí dū ni-gɔtii kí mɔ́ɔ́ ŋkpamu.

Uwɔfi ń lì yii:

11 Dāam̄maan malaa,

nimbi, atimbun ŋin māntìi tú-tee yab,

kóom̀maan kí kpāfì niin.»

Ti-Dindaan, yàntī a-baatandambi ń kpákatiń.

12 Ti-Dindaan bí yii: «Atimbun ń kíĺ nsan,

kí nīn còom̄ ki cá ditantakal din bi yíì yii

<ti-Dindaan sá ubɔsoonlee> ni.

Niin ní m làá kàl̄

kí sòoǹ atimbun ŋin māntìi tú-tee bɔti.

13 Dūmaan ugɔti kí bɔ̄ kí nīn cēē,

di sá yii tijincakaal bīń.

Dāam̄maan kí tāā-bi kí mátí,

di sá yii mbòó ŋun poon

bi ŋáań fiinyi biliŋ ki tèe gbí.

Tilɔn gbí ki kíǹ ki féeń,

di sá yii bi-kpitii wíiǹ.

14 Nnibiim nnibiim

bí ibɔsoon tantakalin,

di sá yii ŋwiin ŋun ti-Dindaan làá dāan̄

ibɔsoon tantakalinee tóobiń.

15 Ŋwìiń nì uŋmal kpántì dibɔmbɔndi,

iŋmalbijaa kaa ti wāĺ.

16 Ti-Dindaan téeń mpɔn doooo Siiyɔn jool pu,

u yāntì bi gbìl̄ u-nyɔkɔ pu doooo Jeerusaleem.

Kitiŋ nì kutagbɔŋu cīŋkì!

Ama ti-Dindaan wúń u-nibul pu,

u sá kibalilaŋ ní ki tīī Isirayeel yab.

17 Niinee ni làá dāá béé yii

m sá ni-Dindaan ni-Nimbɔtiu

un kóò Siiyɔn, m-circir jool puee^b.

Jeerusaleem làá kpántí circir tiŋki,

ní binicambi kaa dāa gíti kóò ki-ni.»

Án làá fàtīí bútí Unimbɔti nibul

18 Iwiin gbanti poonee,

ndamam làá dāá nīn pùub̀ ajoon pu,

ní nnaabiim ń nīn còol̀ ŋgbantamu pu,

ní nnyim ń nīn pùub̀ Juuda bùmbiyaamu kɔkɔn.

Dinyimbunimbil diba làá púń ti-Dindaan diikun

kí nīn yàantí Sitiim tantakal.

19 Binib kaa dāa gíti kóò Eejipiti tiŋkin,

Eedoom tiŋki làá kpántí kuteepimpiŋu,

di sá yii bi ŋá tipɔmbɔti Juuda tiŋkin

ki kūū maanyiibab.

20 Ama binib làá dāá nīn kóò Juuda tiŋkin

kí nīn cáa cá jaanjaan,

ní kí dāá nīn kóò Jeerusaleem tiŋkin abin abin.

21 M lī yii bi sá maanyiibab,

tiŋman, m lī míǹ.

Man ni-Dindaan, m kóò Siiyɔn tiŋkin ní.