Jooweel 3

Ti-Dindaan Fam làá kpákatiń

1 Míǹ boonee^a,

m làá dāá yàntī m-Fam

ń kpákatiń unil sá kamaa pu.

Ni-jipɔmbi nì ni-bisalib làá dāá kpántí m-bɔnaatiliibi.

M làá dāá sòoǹ nì ni-jaŋkpilib tidamintiil poon,

ní kí dāá lēē m-bɔti kí dàkà ni-nipɔmbi.

2 M làá dāá yàntī m-Fam ń kpákatiń

kí kpáaǹ iyumbu bininjab nì binimpoobi pu.

3 M làá dāá yàntī maamaacikpaambi ń nyā

kutagbɔŋu nì kitiŋ pu.

Fatiku nì ŋŋmi nì nnyiim tagbaŋŋi

làá dāá nyā.

4 Ŋwìiń dāa kpántí dibɔmbɔndi

ní uŋmal ń dāá mántí kii fatikuee,

kí wàatī ní ti-Dindaan wiiŋŋu ń nín bàń.

Dinyoondi nì ŋwiŋkpaan dal dee ŋu-baba.

5 Niinee, un kamaa yaa láa kúuǹ ki yíiń

ti-Dindaan yindee dāa kāntí difiil^b.

Di sá yii Siiyɔn jool pu, Jeerusaleem tiŋkinee,

biba làá dāá ŋmátí kí nyā nnaabu gbantin,

kii ti-Dindaan nín lī puee.

An dāa sá bin ní ti-Dindaan dāa yíińee ní.