Jooweel 2

Ti-Dindaan wiiŋŋu tóobiń

1 Ní búḿmaan dikantándi Siiyɔn tiŋkin,

kúum̀maan mpɔn m-circir jool pu.

Kitiŋee pu nib kɔkɔ wunti ń fáá dijinjikil,

di sá yii ti-Dindaan wiiŋŋu dòoń,

ŋu tóobiń gba.

2 Dibɔmbɔŋkpaandi wiiŋŋu dee ŋu-baba,

atagbambɔn nì dipɔ̀ńdi wiiŋŋu dee.

Inaaki janjakitil dòoń.

I pɔ̄ɔ̄ ní ki wīikí bɔ̀m,

a lì kii kunyeeu di mɔ́ ki bīiǹ ajoon puee.

Baa láá pée ká míǹ ki ká

ní ki pée gíti kpá kí ká míǹ jaanjaan

kí nīn cáá cá abin abin.

3 I-nyɔkɔpuee, ŋŋmi di wù,

ní i-boon púee, aŋmilimbil nàantí.

Kí wàatī í jītée,

kitiŋ nìn sɔ̀m̀ kii Eedeen kpaabuee ní^a,

ama i nín jítì ki dóòyee,

an kpántì kii kuteeuee.

Tiba nì tiba kaa ŋūǹ kí ŋmátí kí nyā i-ŋaan.

4 I yaa páaǹnée, a lì kii itaamuee ní,

ní i sáń kii bitanjakaliibee.

5 I gà kuwoou kii janjatɔrɔkub

di dàb̀ ki póotí ajoonee,

a lì kii ŋŋmi di yaa wù timool,

an pòol̄ puee.

I dòoń kii dijanjakitil din pɔ̄ɔ̄

ki tātìi gbāaǹ dikɔndi puee.

6 I yaa páaǹnée, anibul kɔkɔ kóò dinyoondin ní,

ní ŋi-nimbiiŋyi ń cúú kpántí.

7 I sáń kii bibaatandambee,

ní ki dàb̀ agun kii bijanjaliibee.

Báà ŋma pée túĺ u-saŋŋu ní cáaa ki cá,

kaa kpèetī kí dī laaba pú.

8 Ubɔ kaa pìkil̄ u-juti,

di sá yii báà ŋma tàkā u-saŋŋu ní.

Laakin aganlaka bée, niin ní bi cátí bi-saŋyi,

ní tiba kaa ŋūǹ kí cúú-bi kí síiń.

9 I gbáb̀ kí bìin̄ kitiŋ pu,

ki tɔ̄kɔntí digundi din bi máń ki tú kitiŋee pu ki sáń,

ní ki dìŋfī tɔkɔlabin

ki kóò adiinni kii unaayuuyee.

10 I yaa bāańee, kitiŋ cìŋkī ní,

ní an bí kii kutagbɔŋu làá kìtī kí lítée.

Uŋmal nì ŋwìiń kpántí dibɔmbɔndi,

ní iŋmalbijaa kaa ti wāĺ.

11 Ti-Dindaan līī u-janjakitil nyɔkɔpu ki téeń.

U-janjakitiŋ ŋin tɔ́ u-marabee

wīikí tikpil ní ki pɔ̄ɔ̄.

Di sá yii ti-Dindaan wiiŋŋu dal sá ŋwiŋkpaan ní,

ŋwiinee nyāŋkì ní ŋma di dāa ŋūǹ kí ŋmátí?

Tí fàtīí gítiḿmaan ti-Dindaan cee

12 Ti-Dindaan bí yii:

«Ŋyunti bāań ní fàtīí gítiń m-cee

nì ni-pɔbil kɔkɔ.

Bóob́maan kinyɔkɔ, kí sɔ̄maan

ní kí gbàam̀-mi.

13 An kaa sá ni-wampeeŋkaati ní ní cátí,

ama an sá ni-pɔbiliŋ ní ní kpántí.»

Fàtīí gítiḿmaan ti-Dindaan ni-Nimbɔtiu cee.

U sá ulaŋŋaŋfiti ní u-poon mɔ̄,

waa gífí diŋuul malaa, ama ní u-ŋanti wīikí tikpil,

ní ki bɔ́ntì kí yàntī ditafadaaldi din pu u sòon̄ee.

14 An yaa yíì, u ŋūǹ kí kpántí u-landɔkɔŋu

ní kí bìin̄ ni-pu.

Niinee, ni dāa ŋūǹ kí cáań tijimpin

nì ndaam saraau kí tīī ti-Dindaan ni-Nimbɔtiu.

Tí bóob́ kinyɔkɔ kí gbàam̀ Unimbɔti

15 Búḿmaan dikantándi Siiyɔn tiŋkin,

bóob́maan kinyɔkɔ.

Yíiḿmaan dikpafikpaandi.

16 Yíiḿmaan samaa kɔkɔ

bí kpāfì circir kpafil.

Kpāfìmaan bitikpilib nì binipɔmbi,

kí kpáaǹ mbipɔmu mun ŋáaḿee.

Unimpucaan nì u-cal ń nyānní kunimpucandiin.

17 Ti-Dindaan tɔntɔnliibi bisaraaŋaliibi

ń yūĺ kunimbɔtidiin

kipunyɔkɔ nì nsaraafan kansikin kí nīn sūǹ.

Bí nīn lì yii:

«Ti-Dindaan, sɔ̄ timbi a-nibul saai.

Taa yàntī icoo ń cúú a-nibooliŋu.

Taa yàntī anibul ŋin kíǹee

ń nīn bèel̄-ti ki lì yii:

<Bi-Nimbɔtiuee bí là?>»

Ti-Dindaan fōō u-nibul wimmeem

18 Ti-Dindaan cáá u-tiŋki pu dineeŋkpaandi,

u súń u-nibul saai.

19 U fōō u-nibul wimmeem ki bí-bi yii:

«Too, m làá tīī-ni tijin nì ndamam nì ŋkpam.

Ni làá dāá jī kí díkí.

Kí yòon̄ díǹ kí nīn cée,

maa ti làá dū-ni kí líiǹ

atimbun ŋin kíǹee ŋí nīn bèel̄-ni.

20 M làá jà ni-nannanliibi bin nyánní ŋgan pú puee

kí cùnnì kuteeu pu laakin kūńee.

M làá jà bin līī nyɔkɔpuee

kí tɔ̄ Ŋyaam mɔɔl poon,

ní kí jà bin kíǹ ki pá boonee

kí tɔ̄ Meediiteeranee tiŋkuun.

Niin ní bijanjaliibi bin kpíìyee

làá sūū kí nūukì,

di sá yii bi ŋá-ni inikpiti tikpil.

21 Sii kitiŋ, taa fàŋkì!

Yàntī án nīn mɔ̄ǹ-si á nīn fàal̀,

di sá yii ti-Dindaan túń atuŋkpaan.

22 Ipeel, ní taa fàŋkìmaan.

Kuteeu pu mooti bíi túkù ki sɔ̀m̀ fílfil.

Isufi bíi lòoǹ,

ní fiigi nì fiinyi sufii mun lòon̄ sàka saka.

23 Nín̄ bímaan mmɔnni, Siiyɔn yab,

nín̄ fàal̀maan ti-Dindaan ni-Nimbɔtiu pu,

di sá yii u tīī-ni ukpaasiitaa kí fīī-ni.

U yāntì ukpaasiitaa nì useetaa

nìn̄ tiŋan kii dooooyee.

24 Tijimpin gbí dinaapaal pu,

ní ndamam nì ŋkpam gbí tilɔn ki féeń.

25 M làá fàtīí téeǹ-ni ni-kpaajinti

tin ní anaakitɔmbil nì inaakitoon

nì inaakicaan nì inaaki dūu ŋmɔ́ee.

Man di nìn dū dijanjakitil gbanti ki tɔ́ ni-pu.

26 Ni làá jī kí díkí,

ní kí nyɔ̄ŋkì man ni-Dindaan ni-Nimbɔtiu

un di túń atunnyaan ki tīī-nee.

Icoo pée gíti kpá kí jī m-nibul jaanjaan.

27 Niin ní nimbi Isirayeel yab làá béé yii

m bí ni-kansikin.

Man di sá ni-Dindaan ni-Nimbɔtiu,

ní maa cáá juti.

Icoo pée gíti kpá kí jī m-nibul jaanjaan.»