Ooseeya i

Kugbɔŋu kun sòoǹ

Ooseeya

puee

Tibɔkilkaal

Amoosi kpántì Unimbɔti bɔnaatiliu Isirayeel beelin abin saalaa boon ní Ooseeya dāa nín kpántì Unimbɔti bɔnaatiliu. U nìn nāatì Unimbɔti bɔti abin mmuŋku nì aŋmoo, an dàkà yii ki cáa sāā ŋyunti ŋun ní Asuur yab jáń ki fōō Samaarii tiŋki ní Isirayeel beel kúntèe.

Ŋyunti gbantee (kpèè 2 bib 14.23–17.23), dibeel nìn kɔ́ fìkil fikil poon. Jeerooboowaam uliliiti nín kāl̀ dibeel an jítì boonee, Asuur yab nìn yíkì ki kāl̀ Isirayeel yab pu. Bi nìn kù bibɔtiibi ki fàtīi kàantí bipɔmbi Samaarii tiŋkin, ki nìn yāntì bibɔtiibi bin kàal̀ee kaa nìn cáá nlandɔkɔbaanti. Digàntil din nìn bí binib kansikin Amoosi nìn sòon̄ an puee nìn gíti jítì mara pu. Ama cilinjee, Unimbɔti nibul fookiiu nìn gíti kɔ́ digìŋ́kpaandin. Kanaan yab waatootii nìn dátí binib tikpil.

Ooseeya nín cáá unimpu an kɔ́ǹ-u dinimbinaamandi din poonee di làá yàntī ú gbìl̄ tin poon ní Isirayeel yab bée nì an paatii. Ooseeya nimpuu nín kpèé ki sìŋkīǹ dineendi din u cáá u-puee sá kí dàkà Unimbɔti nibul nín kaa yú nì u deedee, ki yàntī u jīǹ falaa un bi-puee ní. Ama an mun gíti dàkà yii dimákal bí bí ká dicáaǹdi kí fàtīí ká dineendi Unimbɔti pu kii úǹ nín néeń-bi puee (14.2-10). Ooseeya nín dū Unimbɔti nì binib kansikin bítam ki tɔ́kɔǹ dineendi puee dàkà yii u nìn tàkā tibɔmɔntiil saŋŋu pu dee (Maat 9.13, 12.7).

Ooseeya gbɔŋku kóoǹ tin ubɔnaatil sòon̄ee ki kpáfì abɔyil ní, kaa sá tibɔti nín nóó nóó tɔb puee:

- ayil 1–3. tin Ooseeya ká dinimpucaal poonee nì tin an là kí dàkà-tee,

- 4.1–9.9. tin poon Isirayeel bée nì an nín cáá taapu pu ŋfaminee,

- 9.10–14.1. kun di yì-tì ní Unimbɔti nibul kaa yú nì u deedeeyee,

- 14.2-10. Unimbɔti neendi di làá pɔ̄ɔkiǹ tikɔkɔ.