Ooseeya 9

Unimbɔti nibul làá fá tikɔkɔ

1 Isirayeel, taa nín̄ fàal̀ kí lákatí mara pu

kii atimbun ŋin kíǹee nín ŋáań puee.

Di sá yii alaakpaatuun puee,

a dū a-Nimbɔtiu ki fá,

ki ŋá alaakpaatuun.

A néeń kí fōō a-laakpaatuuŋŋi paati

laakin kamaa ní bilee naapaaŋi bée.

2 Bilee un bi gbáà dinaapaal puee

nì ŋkpam min bi ŋmāam̀

kutaŋkpaboounee, aa làá ká.

Ndapɔm min a kā ki cée,

a kpá kí ká-mì kí dáká.

3 Eefiraayiim yab kaa làá ŋmā

kí nīn gbíntìi kóò ti-Dindaan tiŋkin.

Bi làá fàtīí gítí Eejipiti tiŋkin,

ní kí jī tijin tin bi kòóyee Asuur tiŋkin.

4 Baa dāa gíti féeń ndaam

kí ŋá ti-Dindaan saraa,

bi-saraabi kaa làá dāá nīn fáatiǹ-u.

Bi-jinti làá dāá kɔ́ tijɔkɔndi kii dikpoolin jintee,

un kamaa yaa jíń-tèe kóò tijɔkɔndin ní.

Bi làá dāá ká tijin kí jī kí díkí,

ama baa dāa ŋūǹ kí kɔ́ǹ-tì ti-Dindaan diikun.

5 Ni làá dāá ŋá mana

dikpafil wiiŋŋu dal,

ti-Dindaan jiŋaaliu wiiŋŋu dal?

6 Ni yaa láa yíkì ni-tiŋki kin bi nāaǹee nee,

Eejipiti tiŋki làá dāá fōō-ni,

ama Meemifiisi tiŋkin ní bi làá dāá síb́-ni.

Abɔjanaakun di làá dāá jī bi-gaajawammɔntiiti fakal,

ní ikuŋkum ń dāá nyā bi-diiŋŋin.

7 Ditafadaaldi yuntiŋu bāań dee,

ŋyunti ŋun báà ŋma làá sòoǹ

u-nyɔkɔpu yayee bāań^a.

Isirayeel beel yab máaǹ kí béé míǹ!

Ni lì yii: «Ubɔnaatil nee wáatì ní,

unil un pu Ŋfam bí nee yil lábitì.»

Tiŋman, m yaa wáatèe,

an sá ni-kpitii nín wīikí puee,

nì ni nín bí ki jáà nì mi mpɔn nì mpɔnee pu.

8 Man ubɔnaatil,

man di sá un cí Eefiraayiimee,

man nì m-Nimbɔtiu di bí.

Ama binib pīil̀-mi titalindi

laakin kamaa ní m yaa cée.

Bi jáà nì mi

áli m-Nimbɔtiu diikun.

9 Bi pée kɔ́ ikpiti poon poon ní kábu,

a lì kii bi nín nìn ŋá pu Giibeeya tiŋkinee^b.

Ama Unimbɔti kpá kí súntí bi-kpitii pu,

asee u pée dáaĺ bi-tafal

bi-kpitii gbanti pu.

Tin nìn jítì Baal-Peewɔree

10 Ti-Dindaan lī yii: «Dooooyee,

m nìn ká Isirayeel yab

kii ɔliifi biliŋ ŋin bi kītì kuteeunee

nín mɔ̄ puee ní.

M nìn ká ni-naanjab

kii difiigibipeepeekaal din

bi kāntí bufiigisubu puee ní.

Ama ni-naanjab nín nìn bāań Beeti-Peewɔɔree^c,

bi nìn dū bi-ba ki líiǹ ticoobɔti.

Bi ŋá mimmee ní m kíǹ ki ná-bi

kii m nín ná diwaal din bi néeńee puee.

11 Eefiraayiim yab, kun tìì-ni tinyoolee

làá yīkì kí ŋàaǹ kii unoonee ní.

Binimpoobi kaa dāa gíti màal̀ mbiyaamuɔɔɔ,

baa dāa gíti cāab̀ apooyaaa,

mbiyaamu kaa dāa gíti nāantí bi-pooŋŋin.

12 Báà bi yaa cáá mbiyaamu mu cíkitàaa,

maa làá yàntī mú nīn bí kí kpántí binib.

Ama m yaa fātì m-boon ki tīī-bi,

dinimbinaamandi làá kɔ́-beeee!

13 M wāĺ Eefiraayiim kii Tiir tiŋki

kin nìn bí laakin timool múkú an sɔ̀m̀ fílfilee ní,

nì míǹ kɔkɔee Eefiraayiim làá dāá dū u-biyaamu

kí tīī bí kpɔ̀.»

14 Ti-Dindaan, a yaa làá dáaĺ binib nee tafalee,

ba ní a làá dūú dáaĺ ní?

Yàntī bi-nimpoobi ń kpántí biŋmaŋŋmantiibi,

bi-biiŋi ń fáká.

15 Ti-Dindaan gíti bí yii:

«Bi-tuŋkpitiŋ kɔkɔ kíĺ Giilgaal ní^d.

Niin ní m kíĺ ki kíǹ ki ná-bi.

Ikpiti in ní bi ŋée puee,

m làá jà-bi kí nyāntí m-diikun.

Maa ti làá nīn néeń-bi.

Bi-kpootiliibi kɔkɔ sá pɔɔgaatib ní.

16 Bi gbáń Eefiraayiim yab an bàn̄-bi.

Bi-nyaaŋyi kūń.

Baa ti làá lòoǹ abil.

Báà binimpoobi yaa dáá gbíntìi cáá mbiyaamuɔɔɔ,

m làá fáá kí kpɔ̀ bi-poon naŋu

biyaamu mun bi néeńee.»

17 M-Nimbɔtiu làá dū-bi kí fá

di sá yii baa pílifiǹ-u.

Bi làá nīn kíǹ ki tú ki yìiǹ

atimbun ŋin kíǹee kansikin ní.