Ooseeya 10

Isirayeel yab beel kúntitam

1 Isirayeel beel nìn sá bufiinyisubu

bun nìn lòoǹ abil tikpilee ní.

U yaa nìn lòon̄ abil tikpilee,

míǹ ní u nìn māā isaraafan mun tikpil.

An yaa nìn bútì u-tiŋkee,

míǹ ní u nìn nyāantí u-taŋkpacooŋkaaŋi.

2 Isirayeel yab sá milimilidambi ní.

Too, ŋyunti bāań bí fōō bi-kpitii paati.

Ti-Dindaan u-ba di làá wìil̀ bi-saraafaŋyi,

ní kí kpēelikì bi-taŋkpacooŋkaaŋi.

3 Bi bí ki lì kɔŋkɔnnee yii:

«Taa cáá ubɔti,

di sá yii taa fāŋkì ti-Dindaan.

Báà ti yaa cáá ubɔti,

ba ní u ŋūǹ kí ŋá kí tīī-ti?»

4 Bi sòoǹ tikpil,

ki pùtī fám,

bi nì binib ŋáań mpèé,

ama bi-baamɔŋyi

bí kii ujil nín nyēē

adan pu bukpaan puee ní.

5 Samaarii yab fàŋkí tin làá bàń

Beeti-Aween nabil puee.

Dinabilee nibul nì di-saraaŋaliibi

bíi ŋáań di-kpool.

Bi nìn fàal̀ di-nyaaŋku pu,

too, bi yōoǹ-dì ki cáa búntì.

6 Bi làá yòon̄ dinabilee kí cáá cùnnì Asuur tiŋkin

kí pɔ̄ kitiŋ gbanti bɔtikpaaŋwu.

Icoo làá dāá cúú Eefiraayiim yab,

tiŋman, icoo làá dāá cúú Isirayeel beel yab

tin bi bɔ́ntì kí ŋée pu.

7 An dóò Samaarii yab pu dee.

Bi-bɔtiu sá kii didɔjal din dēē

nnyim puee ní.

8 Bi làá dāá kpìtī Aween saraaŋapaaŋyi,

íǹ in pu Isirayeel yab nìn ŋáań ikpitee.

Abɔjanaakun nì ikuŋkum làá dāá nyā

kí múkuǹ i-saraafaŋyi pu.

Samaarii yab làá dāá tùkù ajoon yii:

«Bìim̄maan ti-pu!»

ní kí dāá lì ŋgbantamu yii:

«Lítímaan ti-pu^a!»

9 Doooo Giibeeya^b ní Isirayeel yab yīntiǹ-mi,

ní doooo nee, baa kpántì bi-ba.

An pu ní bi làá já nì bíǹ binikpitib

gbanti Giibeeya jool pu.

10 Ti-Dindaan lī yii:

«M làá dáaĺ bi-tafal.

Atimbun làá dāá kpāfì kí já nì bi

kí dáaĺ bi-tafal ikpiti in bi ŋáań kaa gbèentée pu.

11 «Eefiraayiim nìn sá kii dinabil din

nìn néeń ki tà ki gbátí adibilee ní.

Ŋyunti ŋun m ká u-sil nyaaŋkuee,

ní m kpàl̄-u ú nīn kù tikpaal.

Juuda làá nīn dátí akoo ŋin cátí adanee

ní Isirayeel ń nīn dátí akoo ŋin kpátée.

12 Bɔ̄l̀maan tin bí deedeeyee

kí dāá cā tiniti.

Ní bēel̀maan kusapɔŋu^c,

di sá yii ŋyunti bāań ní nyàab̀ man ni-Dindaan

kí nīn cí ŋyunti ŋun ní m làá dāan̄

kí dū tin bí deedeeyee kí yàaǹ ni-puee.

13 Ama ní ni búĺ tikpitil

ní ki bíi cēē ikpiti.

Ni ŋmɔ́ disubil din ni-nyimɔŋyi lòon̄ee.

«Di sá yii ni nìn máká ni-ba pɔŋŋu

nì ni-janjaliibi wíiŋŋu pu.

14 An pu ní kujaau làá pōō

ni-nibul kansikin,

ní bí dāá nàan̄ ni-timmu mun

bi máń agun ki túee kɔkɔ.

Ŋi làá dāá kpántí kii Beeti Arbeel tiŋkee ní.

Ubɔti Calman nín nìn jáń nì kitiŋ gbantee,

u nìn kūū bibinaatiibi ki kpáaǹ bi-biyaamu ní.

15 Kun ni ŋá Beeteelee

nín cáań-ni kuŋyee dee^d,

di sá yii ni-kpitii gíti jítì mara pu.

Kutaa tin lì yii ku wúntée,

an dóò Isirayeel bɔtiu pu dee.»