Ti-Dindaan neendi din u cáá u-nibul puee
11
1 «Ŋyunti ŋun Isirayeel nìn sá kibikeení m nìn kíĺ ki néeń-u,
ní ki yíiń úǹ, m-jipɔɔn
ki nyántìń Eejipiti tiŋkina.»
2 Ama míǹ boonee, m yaa gíti yíiń-uee,
u kíǹ ki sáń-mi ní.
Bi ŋáań saraabi ki tìì awaa ŋin bi yíì Baalee,
ní ki tùutī talaalub ki tìì awaakpitikaa.
3 Min kamaa man di ŋúb́ Eefiraayiim ŋalii,
ki dātì-u tàatáa u cōom̀ee,
waa béè gba yii man di lōō-u.
4 Nì mpoommɔn nì dineendi ní m dūu kpēē-u.
M nìn sá kii ubinaati nín yòontí u-biki
kí nákań u-ba pu,
kí bòon̄ kí tīī-kì dibiil kí ŋāam̀ puee ní.
5 «Baa làá fàtīí gítí Eejipiti tiŋkin,
ama Asuur yab di làá dāá nīn cáá bi-pu mpɔn,
di sá yii bi yíì kaa fātìi gítìń m-cee.
6 An pu ní kujaau tùm̀ bi-timmun dàii,
ku bíiĺ bi-timmu punyɔmmu,
ki làá kpɔ̀ kí céetí bin kóò mu-nee
bi-saŋkpitii pu.
7 M-nibul lafun lēē bi-pɔbilin kí dū-mi kí fá.
Bi yíì-bi doooo yilpu,
ama bi-kansikin báà ubɔ kaa yíkì.
8 «Mana ní m ŋūǹ kí fàtī m-boon
kí tīī-si ní, Eefiraayiim?
Mana ní m ŋūǹ kí dū-si
kí fá ní, Isirayeel?
Mana ní m ŋūǹ kí ŋá-si kii
m nín ŋá Adima tiŋki puee,
àá kí ŋá-si kii m nín ŋá
Seebooyiim tiŋki puee?
M yaa ŋá míǹ, an làá páb́-mi tikpil.
An gbí-mi isaa.
9 Maa làá dū m-ŋuukpaandi kí tɔ̄ ditundi.
Maa ti làá nàan̄ Eefiraayiim,
di sá yii m sá Unimbɔti ní,
maa sá unil.
M sá circirdaan ní ki bí ni-kansikin,
maa làá dāan̄ nì diŋuul poon.»
10 Bi làá dāá páań ti-Dindaan boon.
Ti-Dindaan làá dāá mùuǹ kii gbikintee.
U yaa láa bíi mùuǹee,
u-biyaamu làá dāá nyānní
ŋwìiń jeetilaŋki pú bi-wunti gbáà kí dāan̄.
11 Bi làá dāá nyānní Eejipiti tiŋkin
bi-wunti gbáà kpàkpa kii idiyaalee,
ní kí dāá nyānní Asuur tiŋkin kii abeenanjilee.
M làá dāá yàntī bí gítí bi-diiŋŋi poon.
Ti-Dindaan di sòon̄.