Ooseeya 12

Eefiraayiim kpitii

1 Eefiraayiim yab dū inyimɔn ki māntìi tú-mi,

ní Isirayeel beel yab dū diŋmatindi ki fìn̄-mi.

Ama Juuda beel yab bíǹ dá láá gbíntìi còom̄ nì Unimbɔti,

ní ki dáá gbíntìi yú nì circirdaan deedee.

2 Eefiraayiim yab jīǹ kubuŋu ní kí díkí,

ní ki jì ki bīī ŋwìiń nyalaŋki boon kaa gbèentí.

Bi yāntì inyimɔn nì tipɔmbɔti gbóotì.

Bi nì Asuur yab ŋá mpèé,

ní ki tìì Eejipiti yab ŋkpam.

3 Ti-Dindaan nì Juuda yab cáá ibɔsoon.

U làá dáaĺ Jaakɔb nibooliŋu tafal

bi-bimbikpitim pu,

ní kí pà-bi bi-tuuŋŋi paati.

4 Jaakɔb bí u-na poon

ní ki fōō u-maan paaŋŋu.

U cíkitì muee ní u nì Unimbɔti mɔ̀n̄^a.

5 U nì Unimbɔti tuuŋŋu mɔ̀n̄ ní u pɔ́ɔkiǹ-ŋu.

U nìn súń ki gbāam̀-ŋu.

U nìn ká Unimbɔti Beeteel,

niin ní Unimbɔti sòon̄ nì ti.

6 Niin ní Ti-Dindaan, Unimbɔti Mpɔŋkɔdaan,

un bi yíì yii <ti-Dindaanee> lī yii:

7 «Míǹ puee, á fàtīí gítiń man a-Nimbɔtiu cee,

nín̄ yú nì mi deedee kí nīn ŋáań tin ŋān̄ee.

Nín̄ pée máká mama a-Nimbɔtiu pu baabadal.»

8 «Kii Kanaan yab nín bí puee,

míǹ ní sii Eefiraayiim mun bí,

a ŋúb́ saniya un kaa sá umɔntee.

A néeń ki mùul̄ binib

9 ki lì yii:

<M kpántì ugaaja,

m ká tigaajati tikpil.

M-tuuŋŋi kɔkɔ poonee,

maa ŋá tikpitil tiba,

maa pée yīntì báà tiba poon.>

10 Ama mamee, doooo Eejipiti tiŋkin

ní m sá a-Dindaan a-Nimbɔtiu.

M làá yàntī á fàtīí nīn kíǹ ki kóò tibìń ni,

kii ŋwiin ŋun man nì sii nìn kpáfèe^b.

11 M nìn sòon̄ nì bibɔnaatiliibi,

ní ki nìn yāntì bi kántì aleedaka tikpil.

M làá gíti dī bibɔnaatiliibi pu kí gāā alaŋkpan.

12 Galaadi yab baasii sá binikpitib ní,

tiba kaa ti kíǹ bi-ni.

Giilgaalee, bi nìn cáá inaa

ki ŋáań saraabi kaa gbèentí.

Ama bi-saraafaŋyi kpántì

ataŋkpakpuku ŋin dɔ̄ ipɔ̀n pu tisatinee ní.»

13 Jaakɔb sáǹ ki cūtì Aram tantakalin.

Isirayeel cūtìi túń ditundi unimpu pu^c.

Unimpu puee, u nìn kpántì un kpàá tiwaŋkutee.

14 Ama ti-Dindaan dī ubɔnaatil ubɔ pu

ní ki nyántì Isirayeel yab Eejipiti tiŋkin.

U làá yàntī ubɔnaatil ń kpàà u-nibul^d.

15 Eefiraayiim kɔ́ Unimbɔti poon ki lēē baadakam.

U-Dindaan làá yàntī fatiku un u

kpáatìi fée ń gítí u-pu,

ní kí dáaĺ u-tafal u nín kpēē-u fámee pu.