Daniel Gbɔŋku i

Kugbɔŋu kun sòoǹ

Daniyeel

puee

Tibɔkilkaal

Mpeekaamee, Daniyeel gbɔŋku sòoǹ Isirayeel yab naacimpɔmbi binaa biba bɔti ní. Binaacimpɔmbi gbanti nìn bí bin ubɔti Neebukadineesaar nìn cúú ki cūnnì u-tiŋkin kuyuŋuee kansikin ní. Bi nìn yúl̀ nì bi-Nimbɔtiu deedee kaa yāntì tiba nì tiba mɔ́ntì-bi bí dū-u kí fá. Kugbɔŋu nee jandi dipeekaal (ayil 1–6) sòoǹ nì ti tibɔti tiluu pu ní. Tibɔtee nyáń ti-ba ti-ba ní ki dàkà-ti Isirayeel yab nín nìn jíń falaa bin sàantí-bee ŋaan pu, nì bi nín nìn wɔ́b́-bi ki dáaĺ bi-tafal miŋyee. Dijandi gbanti poon ní ti kāntí Daniyeel un bi nìn cúú ki tɔ́ gbikintib bookunee maam (Ayil 6).

Dijanliliitiil (ayil 7–12) sòoǹ Unimbɔti nín lēē aleedaka anaa ŋin ki dàkā Daniyeelee. Aleedaka gbanti yàntī tí béé Isirayeel yab bɔti. Bi nìn bí atimbun tikpil taapu ki dāa sāā ŋyunti ŋun ní Unimbɔti fātìi bɔ́ntì u-beel ki mɔ̄tìi kāaǹ-dèe.

Bi nín ŋmàn̄ kugbɔŋu nee pu nì ku nín sòoǹ tibɔti tin puee náań nì kugbɔŋu kun lúŋkì Dipoompɔndi poon bi yíì Dileedakal gbɔŋkuee ní. Tigbɔnee liitil tìì iyunti kɔkɔ fookiidambi kunyannyaau bí pɔ́ɔǹ bi-ba bi-fookiiu poon, báà an yaa sá agìń àá falaa un poon ní bi làá kɔ́ee. An sá tibɔti tin bi ŋmàn̄ tì tútúǹ unil ú pɔ́ɔǹ kí ŋmèèyee ní.