Daniel Gbɔŋku 1

Kugbɔŋu kun sòoǹ

Daniyeel

puee

Daniyeel nì u-bɔɔbi bí Babiloon tiŋkin

1 Yooyakiim nín jíń dibeel Juuda tiŋki pu abin ata poonee ní Babiloon bɔtiu Neebukadineesaar dɔ́miń kí já nì Jeerusaleem tiŋki ní ki māntìi tú-kì. 2 Ti-Dindaan nìn yāntì Neebukadineesaar janjaliibi jáń ki pɔ́ɔkiǹ Yooyakiim yab ní ki yāntì bi kóoǹ kunimbɔtidii poon wanti dijandi diba. U nìn cúú binib biba ki cáa cūnnì Babiloon tiŋkin kuyuŋu ní ki dū tiwan tin u yōoǹ kunimbɔtidiinee ki síiǹ u-waadiikun, laakin bi kpáafí u-waaŋi gaajawantee.

3 Ubɔti nìn tīī Asipeenaasi un sá u-tɔntɔnliibi kpiliuee mara yii ú lēē Isirayeel yab bin bi cúuń kuyuŋuee kansikin binaacimpɔmbi biba bin nyánní ubɔti dicaŋkun àá akpambal dicaŋkunee. 4 Binaacimpɔmbi gbanti laaba ń taa nín̄ wɔ̀b̄. Bí nīn ŋān̄, kí nīn cáá iciin, kí nīn sá bin ŋá sukul ki nyée. Mimmee bi làá ŋmā kí nīn bí dibeecindin ki tūǹ ditundi. Bí dàkà-bi Babiloon yab sooŋyi nì bi-ŋmaŋmabiti^a. 5 Ubɔti nìn síiǹ yii ŋwiin kamaayee, bí nīn tìì-bi tijin nì ndaam min úǹ u-ba jīǹ ki nyùee, ní kí dàkà-bi abin ata. Abin ata gbanti boonee, bí kíĺ ditundi dibeecindin.

6 Juuda naakookun binaacimpɔmbi binaa nìn bí bin bi nìn lēēyee kansikin. Bíǹ di sá Daniyeel nì Ananiya nì Miikayeel nì Asariya. 7 Ubɔti tɔntɔŋkpiliu nìn fātìi pú-bi ayin. U nìn pú Daniyeel yii Baltasaar ní ki pú Ananiya yii Sadraaki ní ki pú Miisayeel yii Meesaki ní ki pú Asariya yii Abeedi Neegoo^b. 8 Daniyeel nìn lēē u-pɔbilin yii waa làá jī tijin tin ubɔti jīǹee nì ndaam min u nyùee kí kɔ́ǹ u-ba tijɔkɔndi. An puee u nìn gbāam̀ utɔntɔŋkpil yii ú taa ŋá-u mpɔn ú jī tijin gbanti kí kɔ́ǹ u-ba tijɔkɔndi. 9 Unimbɔti nìn yāntì Daniyeel ká utɔntɔŋkpilee cee diyimɔɔl nì kulaŋŋaŋfitiiu. 10 Ama Asipeenaasi nìn tùkū Daniyeel yii: «An sá ti-baa ubɔti di síiǹ kun ni máaǹ kí jī kí nyɔ̀ee. M fàŋkí yii ú dāá ká ni dúntì kaa bí kii ni-naacimpɔnjutiibee. Ubɔti yaa ká mimmee, see ni-puee, ú lēē m-yil.»

11 Niinee ní Daniyeel tùkū un ní utɔntɔŋkpil lēē ú nīn kpèé úǹ Daniyeel nì Ananiya nì Miisayeel nì Asariyayee yii: 12 «M gbàam̄-si, cɔ̄ŋkì-ti iwiin saalaa ja kí kpèè. Iwiin saalaa gbanti poonee, á nīn pée tìì-ti tikuŋfaal ti ŋmóò nì nnyim ti nyù. 13 Míǹ boonee, á dāá kpèè ti-nimbiiŋyi nì binaacimpɔmbi bin nì ubɔti jīǹ tijimbaantiilee nimbiiŋyi, ní kí dāá ŋá min kítì a-ceeyee kí dī nì a nín ká ti bí puee.» 14 Niinee kijapaayee kíí ki ŋá bi nín bālifì-u puee ki cɔ́ŋkì-bi míǹ iwiin saalaa. 15 Iwiin saalaa gbanti dāa jítèe, bi-nimbiiŋyi ŋáŋkì ní bi ká tiwun ki cáá ŋgbampɔn ki jítiǹ binaacimpɔmbi bin nì ubɔti jīǹ tijimbaantiilee. 16 Míǹ puee un nìn cí-bee nìn gbíntìi tìì-bi tikuŋfaal ŋma, ki yāntì tijin nì ndaam min bàà sá ú nīn tìì-bee. 17 Unimbɔti nìn yāntì binaacimpɔmbi binaa gbanti kpántì bigbannyiliibi nì biciŋfitiibi. Daniyeel úǹ nìn gíti ŋūǹ kí lēē aleedaka nì tidamintiil taapu kí lì.

18 Abin ata ŋin ubɔti Neebukadineesaar yóoǹee bàn̄ee, ní utɔntɔŋkpil yōoǹ binaacimpɔmbee kɔkɔ ki cūnnì ubɔti cee. 19 Ní ubɔti sòon̄ nì bi-kɔkɔ, ama Daniyeel nì Ananiya nì Miisayeel nì Asariya nìn nyí ki jítiǹ bin kɔkɔ kíǹee. Míǹ puee bi nìn kíĺ ki bíi tūǹ ditundi dibeecindin. 20 Ubɔti yaa nìn pée bālifì-bi iciin nì dinyil bɔti tiŋyee, u nìn kāntí yii bi nìn jítiǹ bikpaŋkpantiibi nì bibɔɔbi bin kɔkɔ bí u-beelinee kɔkɔ saalaa pu.

21 Daniyeel nìn gbíntì dibeecindin ki dāa sāā ŋyunti ŋun ubɔti Siirusi kāl̀ Babiloon tiŋki pu dibeelee^c.