Eeseekiyeel i

Kugbɔŋu kun sòoǹ

Eeseekiyeel

puee

Tibɔkilkaal

Eeseekiyeel nìn sá usaraaŋal ní ki tūǹ ditundi kunimbɔtidii kun bí Jeerusaleem tiŋkinee. U nìn kútì bin bi nìn cúú ki cūnnì Babiloon tiŋkin kuyuŋuee poon. Neebukadineesaar nín nìn cúú dikitipeepeekaal Jeerusaleem boonee, ní bi cúú dikitil din poon u nìn bée. An nìn sá abin 597 poon kí wàatī bi nín màal̀ Yeesu. Abin anaa nyɔkɔm boonee, ní Unimbɔti yíiń-u ú kpántí u-bɔnaatiliu. Eeseekiyeel bí kuyuŋu tiŋkin ní ki kpáafí Juuda yab bin bí Babiloon tiŋkin kuyuŋuee nì bin kíǹ ki bí Jeerusaleemee. Bi nín jáń ki pɔ́ɔkiǹ Jeerusaleem yab ki gbáń ki wīī kunimbɔtidii abin 587 kí wàatī bí nín màal̀ Yeesuee, ní u dū diŋmeendi nì dimákal nyɔɔbuŋŋi ki kútì-bi.

Eeseekiyeel gbɔŋku yākatì ajan anaa pu ní:

- Dijampeekaal poonee, u nìn wòon̄ ki kpīiǹ Isirayeel yab ki wāatì ní binannanliibi nín dɔ́miń ki māntìi tú Jeerusaleem tiŋki nliliitiim kí jáǹ-kì (ayil 1–24).

- Dijanliliitiil sòoǹ Unimbɔti bɔsooŋyi in làá jēetí anibul ŋin ŋmātiǹ Isirayeel yab ki wɔ́b́-bee pu (ayil 25–32).

- Dijantataatiil cáá anyɔɔbun ŋin u nìn sòon̄ bi nín jáń ki pɔ́ɔkiǹ Jeerusaleem boonee, nì dinyɔɔbundi din tìì Isirayeel nibul kunyannyaauee (ayil 33–39).

- Dijannanaatiil sòoǹ nì ti kunimbɔtidii kun bínní ki dòoń bi lēē ki dàkā ubɔnaatilee (ayil 40–48).

Eeseekiyeel nìn kántì aleedaka tikpil ní ki nìn túń atuun ŋin sá kii kudaaŋŋuee ki cáa ŋmàntī tin u sòoǹee. U nín nìn sá usaraaŋalee puee, u nìn tīī kunimbɔtidii kunyampoou, ama ní ki nìn lī yii an kaa sá circir kɔŋkooŋŋu ŋun bí Jeerusaleemee di yì Unimbɔti bítam. Di sá yii Unimbɔti ŋūǹ kí nīn bí Babiloon tiŋkin mun. U nín lī yii báà ŋma tuuŋŋi pu ní bi làá sòoǹ u-bɔtee (ayil 18), u kōotì Isirayeel yab koobil din di nìn sá yii unibaanti yaa yīntèe, samaa kɔkɔ tafal ní bi làá dáaĺee dee. U nìn sòon̄ ki būsì yii unil kamaa máaǹ kí kpántí u-bimbim. Ama u nāatì mun yii Unimbɔti nibul máaǹ kí fàtīí pɔ̀ntī kii unil nín fìkitī puee (ayil 37). Ŋyunti gbantee ní Unimbɔti ń fàtīí gíiǹní-bi bi-tiŋkin (11.14-20, 36.1-38).