Eeseekiyeel 1

Kugbɔŋu kun sòoǹ

Eeseekiyeel

puee

Ti-Dindaan lēē u-ba ki dàkā Eeseekiyeel

1 Abin mmuŋku nì saalaa uŋmananaati wiŋŋmooŋmootiŋu dalee, m nìn bí bin bi nìn cúú kuyuŋu Keebaar mɔɔgbandi caŋinee kansikin. M nìn ká yilpu cúu pīitì ní Unimbɔti lēē aleedaka ki dàkā-mi. 2 Bi nín nìn cúú ubɔti Yooyakiin ki cūnnì kuyuŋu dibiŋŋmooŋmootiil poonee ní an nìn sá^a. 3 Ti-Dindaan nìn sòon̄ nì man Eeseekiyeel, usaraaŋal Buusi jipɔɔn, Babiloon yab tiŋkin, Keebaar mɔɔgbandi. Niin ní ti-Dindaan pɔŋŋu nìn kpákatìń m-pu.

4 M bíi kpèéyee ní ki ká kubuŋkpaaŋŋu kubɔ nyánní ŋgan pú ki kpáaǹní ditagbaŋkpaandi diba din poon ní ŋŋmi nìn bée. Ŋwalifi nìn māntì tú ditagbandee. Di-kansikin nìn fòol̄ ní lìblib ní ki jìliŋkī kii tikúti tin bi dūu púĺ ŋŋminee. 5 Kansikinee, an gíti bí kii tiwan tinaa tin cáá kufoouee bée. Tiwan tinaa gbanti nìn náań nì binib ní. 6 Tiwan tinaa gbanti kɔkɔ nìn cáá inimbiin inaa inaa nì ifeen inaa inaa ní. 7 Ti-tapaŋŋi nìn tèen̄, ní ti-taaŋi náań nì dinapɔmbil tafuŋfukuti, ní ki gíti jìl̀ kii tasa kúti tin bi jɔ̄lifèe. 8 Ti-feeŋyi inaa inaayee kɔkɔ taapuee, nniŋal nìn bí. Iŋal gbantee nìn túĺ ajannaatil pú, a lì kii ti-nimbiiŋyi nì ti-feeŋyi nín túĺ puee. 9 Ti-feeŋyi nyɔkɔpuee nìn tùutī tɔb. Báà ŋma nìn pée còom̄ ní ki cá u-nyɔkɔpu kaa fàtī u-ba. 10 Tiwan tinaa tin cáá kufoouee kɔkɔ nìn cáá inimbiin inaa inaa: nnimbiin ŋun bí nyɔkɔpuee sá unil nimbiin, ŋun bí ŋgiil púee sá gbikinti nimbiin, ŋun bí ŋgan púee sá unaja nimbiin ní ŋun bí boon púee sá ukaalun nimbiin. 11 Ti-feeŋyi ili kpátì kutaa ní ki tùutī tɔb ní ifeen ili in kíǹee bīī ti-wunti pu. 12 Báà ŋma nìn còom̄ ní ki cá ku-nyɔkɔpu. Tì nìn ŋūǹ kí cù laakin kamaa ŋfam yaa là tí cùee kí taa fàtī ti-ba. 13 Tiwan tinaa gbanti kansikinee, an nìn bí kii amɔsiŋkoon ŋin fòol̄ lìblibee, ní an gíti bí kii iŋminaapool yamee ní an yìiǹ an kɔkɔ pu. Ŋŋmi nìn jìliŋkī ní utaa nín ŋmóò puee nyēē ŋŋmee poon. 14 Tiwanee nìn cá ki gítiń malaa malaa, a lì kii utaa nín tòó puee ní.

15 M pée bíi kpèé tiwan tin cáá kufoou gbantee ní ki ká tiba bí kii ataayee sí kitiŋ ki kɔ́ĺ-tì. 16 Ataayee nìn jìl̀ kii ataŋkpamɔntee ní. Ŋì nìn sá abaanti ní ki gíti bí kii ŋi kóò tɔbinee. 17 Ŋi nìn ŋūǹ kí còom̀ kí cù ajannaatil kɔkɔ pu kí taa màntī. 18 Ŋi-fɔkɔŋŋu nìn cáá tifaandi ní animbil ŋin jìl̀ee bí ŋi-pu ki māntìi tú. 19 Tiwan tin cáá kufoou gbantee yaa bíi còom̄ee, ataayee mun còom̄ ní ki kɔ́ĺ-tì, ní tì yaa nìn yíkìi dāntèe ní ŋí mun ń yīkì míǹ mbaantiim. 20 Tì nìn pée cá laakin kamaa ŋfam yaa nìn là kí cùee, ní ataayee mun dī-tì dicilpu. Di sá yii tiwan gbanti lammi di nìn cáá ataayee ki còom̄. 21 Míǹ puee, tì yaa bíi còom̄aaa, tì yaa yúl̀aaa, tì yaa tí yíkìi jɔ́m̀ yilpuɔɔɔ, ataayee mun nìn ŋáań míǹ ní mbaantiim, di sá yii tiwan tin cáá kufoouee fam nìn bí ataayee poon ní.

22 Tiwanee yilpuee, tiba nìn bí ki náań nì kugbɔŋu ki jìl̀ kii ditaŋkpamɔntiil din bi yíì yii kriistaalee. 23 Kugbɔŋu gbanti taapuee, tiwan tin cáá kufoouee kamaa nìn cáá ifeen ili kpátì ki túĺ tɔb, ní ifeen ili in kíǹee nìn bīī ti-wunti pu. 24 Tì yaa nìn ŋàaǹ ki cée, m gbìl̀ ti-feeŋyi wooku pu. Kuwoou gbanti nìn náań nì tiŋku wooku àá ditaadundi din sá Unimbɔti Mpɔŋkɔdaan neenee àá dijanjakitikpaandi wookuee ní. Tì yaa nìn síl̀ee, tì nìn kpáb̀ ti-feeŋyi ní. 25 Kugbɔŋuee yilpuee, kuwoou kubɔ nìn nyēē. 26 Yilpu niinee ní tiba bí kii safiir taŋkpalee ki náań nì dibeejal. An beejalee yilpu kúntí kuntee, kunaŋu kubɔ nìn tɔ́kɔ́ ki náań nì unil. 27 M nìn ká yii kunaŋuee jìl̀ kii tikúmanee ní an gíti bí kii ŋŋmi māntìi tú-kùee. Kí yòon̄ tin bí ki náań nì ku-caŋ yilpu nì taapuee, m nìn ká tiba bí ki náań nì ŋŋmi ní ki wāĺ bɔ́iii ki māntìi tú. 28 Ŋwalifi ŋun nìn māntìi túee nìn náań nì dikuntinyindi nín gà ditagbandin ntaawìiń puee ní. Ŋwalifi gbanti nìn dàkà ti-Dindaan nyooti bítam ní. M nín ká mimmee ní m tātìi gbāaǹ m-yigbeel tūū kitiŋ. Niinee ní m gbìl̄ ubɔ bíi sòoǹ nì mi.