Eeseekiyeel 48

Tinaakɔti tin bí ŋgan púee jandi

1 «Tinaakɔti yiŋŋi nì ti-jaŋŋi sɔ̀. Daani naakooku jandi làá nīn bí ŋgan pú fɔ́ŋŋŋ, kí nóó didandi din jītí Eeltɔn nì Aamaati nì Asaar-Eenam timmu mun pìlīǹ Damaasi nì Amaati timmuee. Dì làá nìkī kí yòon̄ ŋwìiń nyalaŋki pú kpaanyɔkɔki kí cáá sāā Meediiteeranee tiŋkuu ŋwìiń jeetilaŋki pú. 2 Kí yòon̄ Daani naakooku jandi nín bí pu ŋwìiń nyalaŋki pú kí cáá sāā ŋwìiń jeetilaŋki púee, Aseer naakooku jandi di làá nīn bí. 3 Aseer naakooku jandi púuŋŋu nín bí puee, Neefitalii naakooku jandi di dī. 4 Neefitalii naakooku jandi púuŋŋu nín bí puee, Manasee naakooku jandi di dī. 5 Manasee naakooku jandi púuŋŋu nín bí puee, Eefiraayiim naakooku jandi di dī. 6 Eefiraayiim naakooku jandi púuŋŋu nín bí puee, Rubeen naakooku jandi di dī. 7 Rubeen naakooku jandi púuŋŋu nín bí pu kí yòon̄ ŋwìiń nyalaŋki kí cáá sāā ŋwìiń jeetilaŋki púee, Juuda naakooku jandi di dī.»

Ti-Dindaan jandi

8 «Juuda naakooku jandi púuŋŋu nín bí pu kí yòon̄ ŋwìiń nyalaŋki kí cáá sāā ŋwìiń jeetilaŋki púee, bí kíń dijandi diba, di-púuŋŋu nì kunaakoou kamaa jandi ń nīn ŋmà ní ŋwaan ń nīn sá ndɔŋmantikaayee kutukub mmuŋku nì biŋmoo pu. Kansikin ní bi làá mā circir kɔŋkooŋŋu. 9 Dijandi din ni làá lēē kí tīī ti-Dindaanee púuŋŋu ń nīn sá ndɔŋmantikaayee kutukub mmuŋku nì biŋmoo pu ní ŋwaan ń nīn sá kutukub mmuŋku pu. 10 Ní gíí kitiŋ gbanti dijandi kí tīī bisaraaŋaliibi. Dijandi gbanti púuŋŋu kí yòon̄ ŋwìiń nyalaŋki pú kí cáá sāā ŋwìiń jeetilaŋki pú ń nīn sá ndɔŋmantikaayee kutukub mmuŋku nì biŋmoo pu, ní kí yòon̄ ŋgiil pú kí cáá sāā ŋgan pú ń nīn sá kutukub saalaa pu. Kansikinee ní bí mā ti-Dindaan circir kɔŋkooŋŋu. 11 Dijandi gbantee, bisaraaŋaliibi Sadooki naantiibi di yì. Bi túń ti-Dindaan tundi deedee. Isirayeel yab di nìn fātì bi-boon ki tīī Unimbɔtee, bíǹ kaa nìn dū-u ki fá kii Leefii yab nín ŋá puee. 12 An pu ní bi làá fōō ditinjandi din bi dūu sú ti-Dindaanee poon dijandi. Bi-jandi làá nīn nákáǹ Leefii yab yal ní. 13 Leefii yab jandi làá nīn bí kii bisaraaŋaliibi jandee ní. Bi-liitil jandi púuŋŋu ń nīn sá ndɔŋmantikaayee kutukub mmuŋku nì biŋmoo pu, ní ŋwaan ń nīn sá kutukub saalaa pu. 14 Ditinjandi gbanti bɔti di páb́ ki jítiǹ kitiŋ jaaŋŋi ŋin kɔkɔ kíǹee. An puee ubɔ kaa cáá nsan kí kpántí ditinjandi gbanti àá kí nyāfì-dì àá kí dū-dì kí tīī ubɔ. Di sá yii bi dū-dì ki sú ti-Dindaan ní.»

Kitiŋ nì dibɔtibil tinjaŋŋi

15 «Ditinjandi din bi lēē ki bíl̀ gbanti poonee, an làá kíń kijaŋ kin làá nīn cáá ŋwaan kii ndɔŋmantikaayee kutukub biŋmoo pu, ní mpúun ń nīn sá kutukub mmuŋku nì biŋmoo puee. Kijaŋ gbanti kaa sá circir tiŋki. Bi ŋūǹ kí mā adiin kí nīn kóò, ní kí nīn kpàá tiwaŋkuti kitiŋ ń nīn bí kansikin. 16 Kitiŋ gbanti jannaatiliŋ làá nīn ŋmà, ní dijandi diba púuŋŋu ń nīn sá ndɔŋmantikaayee kutukub binaa nì alaataa aŋmoo pu. 17 Kitiŋee jannaatiliŋ puee, mpaan ŋubɔ ń nīn dɔ̄ fám ŋwaan ń nīn sá ndɔŋmantikaayee alaataa ali nì imuŋku ili nì saalaa pu. 18 Ditinjandi din bi dūu sú ti-Dindaanee púuŋŋu puee, mpaan ŋubɔ làá kíń kitiŋ ŋwìiń nyalaŋki pú kii ndɔŋmantikaayee kutukub saalaa pu, ní kí kíń ŋwìiń jeetilaŋki pú míǹ mbaantiim. Bí dū tijin tin bi làá cā niinee kí kpíiǹ binib bin tūǹ kitiŋee poon ditundee. 19 Kitiŋee poon tɔntɔnliibi bin làá kpɔ̀ kitiŋ gbanti puee làá nyānní Isirayeel naakɔti kɔkɔn ní. 20 Atinjan ŋin bi dūu sú ti-Dindaanee jannaatiliŋ làá nīn ŋmà ní, ní dijandi diba púuŋŋu ń nīn sá ndɔŋmantikaayee kutukub mmuŋku nì biŋmoo pu. Bí cúú kí yàkatī minaa pu ní kí dū dijandi diba kí yóoń an kpántí kitiŋ wanti. 21 Dijandi din kíǹee, dibɔtibil di yì. U-tinjandi ń nīn bí kitiŋ kin bi dūu sú ti-Dindaanee jandi púɔɔ, kí nīn bí kitiŋ mun tinjandi pú. Dí nóó atinjan ŋin kíǹee púuŋŋu kí cáá sāā kii ndɔŋmantikaayee kutukub mmuŋku nì biŋmoo pu, kí yòon̄ ŋwìiń nyalaŋki pú kí cáá sāā kitiŋ kpaanyɔkɔ, ní kí yòon̄ ŋwìiń jeetilaŋki pú kí cáá sāā Meediiteeranee tiŋkuu. Kitiŋ kin bi dūu sú ti-Dindaanee nì circir kɔŋkooŋŋu ń nīn bí ditinjandi gbanti kansikin. 22 Leefii yab timmu nì kitiŋ tinjandi ń nīn bí dibɔtibil tinjandi kansikin. Dibɔtibil tiŋki ń nīn bí Juuda naakooku jandi ŋgiil pú nì Beenjameen naakooku jandi ŋgan pú kansikin.»

Tinaakɔti tin bí ŋgiil púee jandi

23 «Tinaakɔti tin kíǹee tinjaŋŋi sɔ̀. Beenjameen naakooku jandi ń kíĺ ŋwìiń nyalaŋki pú kpaanyɔkɔki kí cáá sāā Meediiteeranee tiŋkuu ŋwìiń jeetilaŋki pú. 24 Kí yòon̄ Beenjameen naakooku jandi púuŋŋu nín bí pu ŋwìiń nyalaŋki pú kí cáá sāā ŋwìiń jeetilaŋki púee, Simeeyɔn naakooku jandi di làá nīn bí niin. 25 Simeeyɔn naakooku jandi púuŋŋu nín bí puee, Isakaar naakooku jandi di làá nīn dī. 26 Isakaar naakooku jandi púuŋŋu nín bí puee, Sabulɔn naakooku jandi di dī. 27 Sabulɔn naakooku jandi púuŋŋu nín bí pu kí yòon̄ ŋwìiń nyalaŋki kí cáá sāā ŋwìiń jeetilaŋki púee, Gaadi naakooku jandi di dī. 28 Gaadi naakooku ŋgan pú kpaanyɔkɔ di làá nīn sá kitiŋ kpaanyɔkɔ. Kì làá kíĺ Tamaar tiŋki ŋwìiń nyalaŋki pú kí cáá sāā kibùmbiki kin bí Meeriiba, Kadeesi tiŋkinee, ní kí nìkī kí kpàkaǹ Eejipiti buŋŋu^a kí cáá sāā Meediiteeranee tiŋkuu. 29 Kitiŋ kin ni làá tɔ̄ kasi kí yàkatī kí tīī Isirayeel yab naakɔti án kpántí bi-fakalee dee. Man ni-Dindaan Unimbɔti di sòon̄ míǹ.»

Jeerusaleem punyɔmmu saalaa nì mulee bɔti

30-31 «Jeerusaleem tiŋki punyɔmmu saalaa nì mulee sɔ̀. Bi làá pɔ̄ kipunyɔkɔ kamaa Isirayeel yab naakɔti saalaa nì tilee kubɔ yindi ní. Ŋgan púee, digundi púuŋŋu làá nīn sá ndɔŋmantikaayee kutukub binaa nì alaataa aŋmoo pu. Digundi gbanti puee, mpunyɔmu muta di làá nīn bí: Rubeen punyɔkɔki nì Juuda punyɔkɔki nì Leefii punyɔkɔki^b. 32 Ŋwìiń nyalaŋki púee, digundi púuŋŋu làá nīn sá ndɔŋmantikaayee kutukub binaa nì alaataa aŋmoo pu. Digundi gbanti puee, Jooseefi punyɔkɔki nì Beenjameen punyɔkɔki nì Daani punyɔkɔki di làá nīn bí. 33 Ŋgiil púee, digundi púuŋŋu làá nīn sá ndɔŋmantikaayee kutukub binaa nì alaataa aŋmoo pu. Digundi gbanti puee, mpunyɔmu muta di làá nīn bí: Simeeyɔn punyɔkɔki nì Isakaar punyɔkɔki nì Sabulɔn punyɔkɔki. 34 Ŋwìiń jeetilaŋki púee, digundi púuŋŋu làá nīn sá ndɔŋmantikaayee kutukub binaa nì alaataa aŋmoo pu. Digundi gbanti puee, mpunyɔmu muta mun di làá nīn tí bí: Gaadi punyɔkɔki nì Aseer punyɔkɔki nì Neefitalii punyɔkɔki. 35 Digundi din māntìi tú Jeerusaleem tiŋkee púuŋŋu kɔkɔ làá nyā ndɔŋmantikaayee kutukub saalku nì bita pu ní.

«Kí yòon̄ ŋwìiń gbanti kí nīn cée, bi làá nīn kíǹ ki yíì kitiŋ gbanti yii: <Ti-Dindaan bí>».