Ooseeya 13

Ti-Dindaan gíí Isirayeel beel pu diŋuul

1 Njaminee, Eefiraayiim yaa nìn sòoǹee,

báà ŋma nìn fàŋkí ní.

Isirayeel naakɔti kansikinee, úǹ di nìn līī.

Ama u nóó diwaal Baal ki fōō dibɔkpil,

ní ki kpíì an pu.

2 Díǹ pu nee, bi dáá gbíntìi nìkì ki ŋáań ikpiti.

Bi dūntì bi-nimbiliŋ ki dūu mɔ́ɔ́ awaa,

awaa ŋin ní bíǹ bi-ba dākafì ki mɔ́ɔ́yee.

An sá uwammɔ́ɔl tuuŋŋi aba ní,

awaa gbanti pu ní bi lì yii:

«Tí ŋámaan saraabi kí tīī-ŋi!»

Binib móotí anabil ki ŋáań saraabi.

3 An pu ní bi làá nīn bí kii ditaafaapɔ̀ńdee,

a lì kii ditaafaamalindi nín wáŋkí pu malaayee.

Bi làá nīn bí kii tifeel nín yíkí pu

kí cù ndandati kí wàatī dibileenaapaal puee ní,

àá kii ŋŋminyiim nín nyēē mbùń ŋubɔ poon puee ní.

4 Doooo Eejipiti tiŋkin

ní man sá a-Dindaan a-Nimbɔtiu.

Aa ti nyí Unimbɔti ubɔ ki kútì man pu,

ufiil ubɔ mun kaa ti bí laaba, asee man baba.

5 Mamee, kuteeun, ŋweel tiŋkin

ní m béè-si.

6 A pée bàn̄ kunaakpaapɔɔunee

ní a jíń ki díkí.

Ama ŋyunti ŋun a jíń ki díkée

ní a kɔ́ dilambilin^a.

An pu ní a súntì man pu.

7 Niinee ní m kpántì kii

gbikintee ki tīī-si,

a lì kii ugbii un di

náká nsan caŋin ki cée.

8 M làá kpìl̄-si kii digbiŋgbil

din ní bi cúú di-biyaamuee.

M làá yā kí cátí a-bindi.

M làá cúú-si kí tɔ̀ntī kii

ugbikintinaatee dibɔbil pu niin,

ní ipeel ń cúú-si kí tɔ̀ntī tɔ̀ntī.

9 Kɔŋkɔnnee Isirayeel, an nāaǹ-si!

Too, man baba di bàà ŋūǹ kí jòoń-si?

10 A-bɔtiuee bí la ní kaa làá dāan̄

kí fīī-si a-timmu poon ní?

A-kpootiliibee bí là ní?

Ŋyuntee, a nìn bí-mi yii:

<Tīī-mi ubɔti nì bikpootiliibi^b.>

11 Tiŋman m nìn tīī-si ubɔti m-ŋuul poon,

ní ki fātìi fōō-u m-bum poon^c.

12 M ŋmàn̄ Eefiraayiim yab

yìntitam ki síiǹ.

M dū bi-kpitii ki kpáafì tiŋan.

13 Imatiŋween làá jēetí bi-pu.

Ama kibikee sá kibigbaaŋŋi ní.

Ŋyunti bàà bàn̄ dee,

ama kì yíì kaa là kí nyā ki-na poon.

14 Mimmee mama bi-Dindaan,

m máaǹ kí dā-bi

kí nyāntí ditaŋkpiil ŋaanaaa?

Ḿ fīī-bi kí nyāntí ŋkúm ŋaanaaa?

Too, ŋkúm, a-pɔŋŋu bí la?

Too, ditaŋkpiil, a-looti bí la^d?

Disaasɔl nyáń m-nimbiliŋin.

15 Min kamaa an bútì Eefiraayiim yab

bi-nabiyaamu kansikinee,

ŋwìiń nyalaŋki pú buŋku dòoń,

ti-Dindaan buŋku làá nyānní kuteeu pú.

Ku làá fáá nnyimbul pu ní ŋú fóotí

ní dinyimbɔbil ń kpā,

ní bí fūkul̀ laakin bi dū

bi-gaajawammɔntiiti ki kpáafèe.