Ooseeya 4

Unimbɔti làá sòoǹ u-nibul bɔti

1 Isirayeel yab, pīlifìmaan ti-Dindaan bɔti,

di sá yii ti-Dindaan bíi sòoǹ bin kóò kitiŋ nee puee bɔti.

Kitiŋ nee puee, mbaamɔn gíti kpáaa, dineendi gíti kpáaa,

bin nyí Unimbɔtee gíti kpá.

2 Bi tòó tɔb mbusu,

ki mɔ́ntí inyimɔn, ki kù binib,

ki yù bunaayubu, ki ŋáań tilaakpaal,

ki ŋáań tipɔmbɔti,

ní ki cáá nnikpaakoon.

3 An pu ní kitiŋ nee kɔkɔ làá kpā,

ní bin kɔkɔ kóò ki-puee ń yɔ̀l̄,

kí kpáaǹ ipeel nì inoon.

Áli gba tiŋkun jɔmii làá céetí.

Bisaraaŋaliibi kpitii

4 Ama ubɔ ń taa kɔ̄kɔl̀ ubɔ,

ubɔ ń taa wòoǹ u-juti.

An sá man nì nimbi bisaraaŋaliibi

di cáá tɔb tibɔti.

5 Ni làá dāá gbéetí kuwiŋkaŋu pu,

bibɔnaatiliibi mun làá gbéetí

kunyeeu kii nimbee,

ní ḿ kpɔ̀ ni-na Isirayeel.

6 M-nibul kúù

kun puee di lóò dinyil.

Kii ni nín fātì ni-boon ki tīī dinyilee puee,

ma mun làá fàtī m-boon kí tīī-ni

ní naa ti làá nīn sá m-saraaŋaliibi.

Ni súntì mama, ni-Nimbɔtiu marau puɔɔ!

Ma mun làá súntí ni-jipɔmbi pu.

7 Kii bisaraaŋaliibi nín būtì tikpil tikpil puee,

míǹ ní bi yīntiǹ-mi mun.

M làá yàntī tin nìn tìì-bi tinyoolee

ń kpántí-bi ticoobɔti

8 M-nibul nín ŋáań ikpiti pɔ̄tam

saraabi biŋyee di kpīintí-bi.

An pu ní bi tìì m-nibul kunyannyaau

bí nīn mɔ̀tīi ŋáań ikpiti^a.

9 Tin dɔ̄ ki cí bisaraaŋaliibee

di dɔ̄ ki cí samaa un kíǹee.

M làá dáaĺ bi-tafal bi-bimbikpitim pu,

ní kí pà-bi bi-tuŋkpitiŋ paati.

10 Bi làá jī kí gíti jī,

ama ŋkùm làá nīn pée gbíntìi cáá-bi ní.

Bi làá ŋá alaakpaatuun kí gíti ŋá,

ama bi kpá kí ká mbiyaamu.

Di sá yii bi dū man bi-Dindaan ki fá

ki dū bi-ba ki líì nì alaakpaatuun.

11 Alaakpaatuun nì ndanyoon

gábitì m-nibul yil.

12 M-nibul bàlifī awaa ŋin sá idɔee ní

bi-yil pu bɔti,

ní mbɔɔkpandɔ tùkù-bi tin bi là kí bééyee.

Di sá yii alaakpaatuun fam gáatì-bi.

Bi dū bi-ba ki líì nì awaa,

ki dū man bi-Nimbɔtiu ki fá.

13 Ajoon yilpu kúntí kunti

ní bi ŋáań bi-saraabi.

Ŋgbantamu pu ní bi tùutī

talaalub ki ŋáań saraa.

Iwaasufi in bi yíì yii seeni nì peepiliiyee

nì teereebintee taapu ní bi kàal̀,

di sá yii i-booŋyi sɔ̀m̀.

An pu ní ni-bisalib ŋáań alaakpaatuun

ní ni-coopoobi nyēē bi-calib boon.

14 Ama maa làá dáaĺ ni-bisalib tafal

bi-laakpaatuuŋŋi pu,

kaa làá dáaĺ ni-coopoobi tafal

bi nín nyáń bi-calib boonee pu.

Nimbi bisaraaŋaliibi tafal ní m làá dáaĺ,

kun puee nimbi di nyāntí nnimpulaakpaamu

ŋkpaanceeti ki dɔ̀ nì mu,

ní ni nì nlaakpaamu mun bí awaadiinnee

kpáfí ki jīǹ saraabi jinti.

Kii dilaŋkpandi diba nín lī puee yii:

<Dinibul din kaa cáá iciinee

sá dinibul din wáŋkèe ní.>

15 Báà nimbi Isirayeel beel yab

yaa nyáń m-boonaaa,

Juuda beel yab ń taa ŋá míǹ mbaantiim.

Ní taa cùmaan Giilgaal circir paaŋŋu pu,

kí taa cù Beeti Aween,

kí taa tí pùtī kí lì yii:

«Nì Unimbɔti un bí nee pu^b!»

16 Kii unapɔɔl nín bí puee, míǹ ní Isirayeel beel yab tafaliŋ pɔ̄ɔ̄. Mimmee, kɔŋkɔnnee ní ti-Dindaan làá nín ŋá u-nibul kii apibil ŋin bi cáǹ kupikpaaueeee? 17 Eefiraayiim yab^c nì awaa ŋá mpèé. Yàntī-bi. 18 Bi yaa nyùn̄ ki gbée ní bí kɔ́ alaakpaatuun poon. Bi-kpootiliibi néeń tin kɔ̄ntí-bi icooyee ní. 19 Kubuŋu làá dāá yòon̄-bi kí páań ku-feeŋyi pu, ní icoo ń dāá cúú-bi saraabi bin bi ŋáańee pu.