Bikpootiliibi bin ŋáań ikpitee
5
1 «Bisaraaŋaliibi, pīlifìmaan tin bí nee,Isirayeel beel yab kpootiliibi, ní pīlifìmaan.
Ubɔti dicaŋkun yab,
kpòom̄maan ni-tafal kí pīlifì.
An bàà sá nimbi nín sòoǹ
binib bɔti nì mbaamɔn.
Ama ní ni kpántì kutaliŋŋu
ki tīī m-nibul Miisipa tiŋkin,
ní ki kpántì kulaaŋŋu
kun bi píĺ Tabɔɔr jool pueea.
2 Bi gbìn̄ kubookpaaŋŋu Siitiim tantakalinb.
M bíi bɔ́ntí bi-kɔkɔ tafadaaldi.
3 «Mamee, m nyí Eefiraayiim naakookun yab tiŋan,
Isirayeel beel yab mun kaa lìkī m-nimbiin.
Eefiraayiim yab kɔ́ alaakpaatuun poon,
ní ki yāntì Isirayeel beel yab kɔkɔ kɔ́ tijɔkɔndin.»
4 Isirayeel beel yab tuŋkpitiŋ kaa pūǹ-bi nsan
bí ŋmā kí fàtīí gítí bi-Nimbɔtiu cee.
Di sá yii alaakpaatuun fam miba bí bi-ni,
ní baa nyí ti-Dindaan.
5 Isirayeel beel yab lambil di lèekī bi-pu mmɔ́ɔn.
Isirayeel beel yab nì Eefiraayiim naakookun yab
kpitii pu ní bi gbéetì ki lítì.
Bi nì Juuda beelin yab mun kpáfì ki gbéetì.
6 Bi làá dāá cáań bi-piii nì bi-naai
kí ŋá saraa kí nyàab̀ ti-Dindaan,
ama baa làá dāá ká-u.
Di sá yii u dū-bi ki fá.
7 Bi nyáń ti-Dindaan boon ki màl̄
mbiyaamu mun kaa sá u-yɔmuee.
Too, an kaa ti làá bà uŋmal,
án làá nàan̄ bi nì bi-tiŋki.
Juuda beel yab nì Isirayeel beel yab jaaku
8 Búḿmaan ŋyin Giibeeya jool pu,
búḿmaan dikantándi Raama tiŋkin!
Kpāafìmaan Beeti-Aween yab!
Beenjameen naakookun yab, bi bíi jáà nì ni ni-boon pú.
9 Ŋwiin ŋun m làá dāá dáaĺ Eefiraayiim naakooku tafalee,
kì làá dāá kpántí kuteeu ní.
Tin m bíi sòoǹ Isirayeel naakɔti pu nee
sá tibɔŋman ní.
10 Juuda beel kpootiliibi náań nì bin cóotí
bi-sati kpaanyɔmmu taŋkpeeŋi ki nìkèe níc.
An pu ní m làá kpáatí m-ŋuul kii
nnyimee kí sìtī bi-pu.
11 «Bi sāaǹ Eefiraayiimd yab,
ibɔsoon nàn̄-bi,
di sá yii bi sáń ki pá
tin kaa bí tibanee boon.
12 Too, m làá dāá kpántí kii dinalee ní
Eefiraayiim yab cee,
ní kí kpántí kii taagbunjaanjaanee
Juuda beel yab cee.
13 Ŋyunti ŋun Eefiraayiim yab ká yii bi būǹ
ní Juuda beel yab ká bi-bunsooŋyee,
ní Eefiraayiim yab nín cá Asuur tiŋkin
ní ki tú binib bí cùú ká ubɔtikpaane.
Ama u mun kaa ŋūǹ kí cáaǹ-naaa,
kaa tí cáá ni-bunsooŋyi nyɔkɔŋu.
14 Di sá yii m làá nīn sá kii gbikintee ní
Eefiraayiim yab cee,
ní kí nīn sá kii digbikintipɔmbilee
Juuda beel yab cee.
Mama m-ba di làá tɔ̀ntī-ni,
ní kí kpáaǹ-ni kí búntí,
ní ubɔ mun dāa kpá kí fīī-ni m-ŋaan.»
Unimbɔti fātì u-boon ki tīī u-nibul
15 «M làá búntí, m làá nīn gítí m-dumpu
kí dāá sāā ŋyunti ŋun bi làá béé
bi-bɔkpil kí nyàab̀-mee.
Bi-nimbinaamandi poonee,
bi làá dāá nyàab̀-mi.»