6
1 Niinee ní ni lī yii:«Dāam̄maan, tí gítímaan ti-Dindaan cee.
Úǹ di ŋá-ti tiweendi,
úǹ di làá cáaǹ-ti.
Úǹ di gbáń-ti,
úǹ di làá tí póob́ ti-buuŋyi.
2 Nì iwiin ili boonee, u làá tīī-ti dimaŋfal,
iwiin ita poonee, u làá yáatí-ti kí yóoń
ní tí nīn bí dimaŋfalin u-nimbiin.
3 Tí béé yii ti-Dindaan di sá Unimbɔti.
Tí nyàab̀ kí béé-u.
U-dāantam sá mbaamɔn kii
ku nín yaa mɔ́ ku wúntí puee ní.
U làá dāan̄ ti-cee kii utaayee ní,
kii utaajoolkaa nín nì
ki sɔ̀ŋkī kitiŋ puee ní.»
4 Ama ní ti-Dindaan kíí yii:
«Ḿ ŋá-si mana ní, Eefiraayiim?
A là ḿ ŋá-si mana ní, Juuda?
Dineendi din ni cáá m-puee
bí kii ditaafaapɔ̀ńdee ní,
a lì kii ditaafaamalindee,
an kaa pée súŋkí ní kí wāŋkì.
5 An pu ní m dī m-bɔnaatiliibi pu
ki jáń nì ni,
m dū anyɔɔbun ŋin nyáń m-nyɔkɔnee pu
ki pɔ̄fì-ni.
M-bɔsooŋyi tòoń kii ŋwalifee ní.
6 Kun fáatiǹ-mee di sá dineendi,
kaa sá saraabia.
Kí nīn nyí man Unimbɔtee
jítiǹ bisaraawɔkaabi.»
Ntimbiil tuuŋŋi Isirayeel tiŋkin
7 «Ama kii Adamee,
ni nyáń m-poondi boon,
naa yúl̀ nì mi deedee.
8 Giilaadi sá binikpitib tiŋki ní,
fatiku daanti gbí ki-poon.
9 Kii digaŋgam dambi nín bāal̀ nsan caŋin
ki cí binib kí kpɔ̀ puee,
míǹ ní bisaraaŋaliibi kitil diba
kù binib Siikeem saŋŋu pu.
Ntimbiil tuuŋŋi ŋin bi tūǹee dee!
10 M ká ntimbiil tuuŋŋi
Isirayeel beel tiŋkin.
Niin ní Eefiraayiim naakookun yab
ŋáań alaakpaatuun
ní ki yāntì Isirayeel yab kɔ́ tijɔkɔndin.
11 «Nimbi Juuda beel yab mun,
m bíi bɔ́ntí ni-bɔsooŋyi yuntiŋu kí cīití-ni.»
Fikil fikil nì nnaabu ŋun dòońee
«Ŋyunti ŋun m làá dāá gíiǹní
m-nibul din bi nìn cúú kuyuŋuee,