7
1 m yaa baa là kí cáaǹ Isirayeelee,ní Eefiraayiim yab kpitii
nì Samaarii yab tuŋkpitiŋ
ń nyā kí páań mpaampiin pu.
Di sá yii bi kíiĺ tɔb,
ní binaayub kóò adiinni ki yù,
ní digaŋgam daan bí adan pu ki bìlim̄.
2 Ama an kaa sòoǹ nì bi-pɔbiliŋin yii
m téetí bi-kpitii in bi ŋáańee kɔkɔ pu.
Kɔŋkɔnnee bi-kpitii gbanti di māntìi tú-bee.
I dɔ̄ m-nimbiin ní baabadal.
3 Bi cáá bi-tuŋkpitiŋ
ki kɔ̀ntī ubɔti nimbiliŋ,
ní ki cáá bi-nyimɔŋyi
ki kɔ̀ntī bikàliŋkpilib yaŋa.
4 Bi-kɔkɔ sá bilaakpaadambi ní.
Bi náań nì dikpɔnɔbubul din píĺ kpaŋkpam
ní ukpɔnɔŋal kaa ti bíi pàá án nyàtī
kí cáá sāā ŋyunti ŋun ní bukpɔnɔsaa
làá jɔ̄m̀ee ní.
5 Ubɔti maaliwiiŋŋu jiŋaaliu dalee,
abɔtibil nyù ndaam áli kí tin būŋkì.
Ubɔti tàntī u-ŋal ki tìì bin bèel̄-uee kuboou.
6 Di sá yii bi sútìń ki pìlìń-u
ki tùm̀ kpaŋkpam kii kipaai ŋmiŋuee.
Biibii di gbí bi-pɔbiliŋin.
Kunyeeu kɔkɔee, bi-ŋuul dɔ̄ ki gèeǹ,
ama kutaa yaa wúntèe,
dì fòol̄ bìlbil kii ŋŋmikpaanee ní.
7 Bi-kɔkɔ píĺ ní kpaŋkpam kii dikpɔnɔbubulee,
bi kù ki céetí bi-kpootiliibi.
Bi kpákatì bi-bɔtiibi kɔkɔ,
ama bi-kansikin báà ubɔ
mun kaa kúuǹ ki yíiń-mi.
8 «Eefiraayiim dū u-ba ki ŋmālim̀
anibul ŋin kíǹee poon.
U náań nì kalaa
un bi tɔ́ kaa lábitèe ní.
9 Binicambi fóofì u-pɔŋŋu,
ní waa kpáàa nyí gba.
Tiyikpipin nyáń u-yil pu
ní waa kpáàa béè.
10 Isirayeel beel yab badakal
di lèekī bi-pu mmɔ́ɔn.
Isirayeel beel yab kaa fātìi gítìń
man bi-Dindaan bi-Nimbɔtiu cee.
Min kamaa tin bí nee kɔkɔ jítèe,
baa nyàab̄-mi.
11 Eefiraayiim sá kii dibeenanjil
din kaa nyí tiba kaa dàkafēe ní.
U yíì Eejipiti tiŋki ń dāá jòoń-u,
ní ki sáń ki cá Asuur tiŋkin.
12 Ama ŋyunti ŋun u tú ki lábití mimmee,
ní ḿ dū m-laaŋku kí tɔ̄-u,
ní kí cúuń-u kii bi nín cútí inoon puee.
M làá dáaĺ u-tafal
kii m nín sòon̄ pu bi-kpafil poonee.
13 Mbusu dɔ̄ ki cí-bi, di sá yii bi sáǹ-mi!
Án làá nàan̄-bi, di sá yii bi yíkìi bíi jáà nì mi!
M bàà nyàab̄ kí fīī-bi dee,
ama ní bi bí ki sòoǹ m-pu tinyimɔmbɔti!
14 Baa kūuntí ki yíì-mi mbaamɔm,
ama ní bi dɔ̄ bi-dooŋu pu ki yáliŋkí.
Bi cáá njimu ki gífí bi-bab
kí ŋmā kí ká tijin nì ndaam.
Baa nyí yii bi yaa bíi ŋáań mimmee,
bi bíi jáà nì man dee.
15 Man di kpōotì-bi ki tīī-bi mpɔn,
ama nì míǹ kɔkɔee,
bi dàkafī m-pu ilandɔkɔkpiti ŋma ní.
16 Bi yaa gítìńaaa, an kaa sá man cee ní bi gítìń.
Bi náań nì butɔbu bun gíì ki gbàkēe ní.
Ama bi-kpilib nín sòoǹ ki bíiĺ-mi puee,
kujaaun ní bi làá kpú,
ní binib ń nīn bèel̄-bi Eejipiti tiŋkin.»