Ooseeya 1

Kugbɔŋu kun sòoǹ

Ooseeya

puee

1 Ti-Dindaan nìn sòon̄ nì Beerii jipɔɔn Ooseeya iyunti in ní Oosiyasi nì Yootam nì Akaasi nì Eeseekiyaasi nìn kāl̀ kāl̀ Juuda beel pu dibeelee. Iyunti gbanti ibaanti poon ní Joowaasi jipɔɔn Jeerooboowaam mun nìn kāl̀ Isirayeel beel pu dibeel^a.

Ooseeya nimpuu nì u-biyaamu bɔti

2 Ti-Dindaan nín dī Ooseeya pu ki sòon̄ tibɔti tiŋyee sɔ̀. Ti-Dindaan nìn bí Ooseeya yii:

«Cùú cáab́ kinimpulaakpaai

ú màal̀-si kinimpulaakpaai biyaamu.

Di sá yii kitiŋ nee nib cūtìi bíi jáaḿ awaa

ki dū man bi-Dindaan ki fá

kii kinimpulaakpaai nín féeń u-cal puee.»

3 Niinee ní Ooseeya cáab́ Diibilayiim bisal Goomeer ní Goomeer cáá dipool ki màl̄-u kibininjabiki. 4 Ní ti-Dindaan tùkū Ooseeya yii:

«Pɔ̄ kibikee diyindi yii Jisirayeel,

di sá yii an kaa ti làá yúntí,

Jeewuu nín kūū binib bin Jisirayeel tantakalinee puee,

m làá dáaĺ u-naantiibi tafal ní kí kúntí Isirayeel beel.

5 Ŋwiin gbantee, m làá dāá kɔ̄fì

Isirayeel tɔbu Jisirayeel tantakalin.»

6 Ní Goomeer gíti cáá dipool ní ki màl̄ kibinimpubiki ní ti-Dindaan bí Ooseeya yii:

«Pɔ̄ kibikee diyindi yii Loo Ruwama,

taapu di sá yii, Baa Là-mi,

di sá yii maa ti làá dàkà

Isirayeel beel yab dineendi,

maa ti làá nīn pée néeń-bi.

7 Ama m làá nīn néeń Juuda yab. Man di sá bi-Dindaan bi-Nimbɔtiu, m làá fīī-bi, ama kaa sá nì butɔbu àá kitàataajiki àá tijanjawan tin kíǹee àá nì itaamu àá nì bitanjakaliibi.»

8 Goomeer gíí Loo-Ruwama dibiil boonee ní ki tí cáá dipool ki màl̄ kibininjabiki. 9 Ní ti-Dindaan bí Ooseeya yii:

«Pɔ̄ kibikee diyindi yii Loo-Amii,

an dàkà yii naa sá m-nibul.

Di sá yii naa ti sá m-nibul

ní ma mun kaa ti sá ni-Nimbɔtiu.»