Ooseeya 2

Jisirayeel wiŋkpaaŋŋu dal

1 Ama Isirayeel yab làá dāá nīn wīikí

kii tiŋku gbandi bul din baa ŋūǹ kí ŋmàntāaa,

kaa ŋūǹ kí kàaǹee ní.

Laakin ní Unimbɔti nìn tùkū-bi yii:

«Naa ti sá m-nibulee»,

niin ubaanti ní u làá dāá yíiń-bi yii:

«Dimaŋfal Nimbɔtiu biyaamu^a.»

2 Juuda beel yab nì Isirayeel beel yab

làá dāá fàtīí ŋá ubaanti.

Bi làá dāá lēē ubɔtibaanti ú nīn kpòotī-bi,

ní bí dāá bùtī kí gbí bi-tiŋki kɔkɔ.

Di sá yii an dāa sá Jisirayeel wiŋkpaaŋŋu dal ní.

3 Ní yíiń ni-mambi nì ni-naalib yii «M-nibul»

ní kí yíiń ni-niisalib yii «Bi là-mi».

Isirayeel, unimpu un nyáń u-cal boonee

4 Ní yíiń ni-na ibeeyiin,

ní yíiń-u tibuul.

Di sá yii waa ti sá m-nimpuu

ní ma mun kaa ti sá u-cal.

Ú lēē u-laakpaatuuŋŋi daanti u-nimbiin kí fá,

ní kí lēē u-laakpaati daanti u-biiŋi kansikin^b!

5 An yaa kaa sá mimmee,

m làá lòotī-u dicancaŋgbeel,

ú gítí kii u nín nìn bí pu

ŋwiin ŋun bi màl̄-uee.

M làá yàntī u-tiŋki ń kpántí kii kuteeuee,

ní kí dū-kì kí kpántí kitiŋkuliŋŋi.

M làá yàntī nnyinnyoo ń kpɔ̀-u.

6 Maa làá nīn là u-biyaamu bɔti,

di sá yii u ŋá tilaakpaal ní ki màl̄-mu.

7 Tiŋman, mu-na dū u-ba ki líì nì alaakpaatuun.

Un di màl̄-muee ŋá ticoobɔti.

Di sá u lī yii:

«M làá nóó m-bɔmbi

bin tìì-mi m-jinti nì m-nyɔkaati,

nì ipii kuti nì gulfamɔnti wampeeŋkaati

nì m-kpam nì m-daamee.»

8 «An pu ní m làá dū ikuŋkum kí

pìin̄-u nsan,

ní kí mā digundi kí màntīí tū-u

ú taa ti ká nsan kí nyā.

9 U làá dāá jà u-bɔmbi boon,

ama waa làá dāá ŋmā kí cúú-bi.

U làá dāá nyàab̀-bi,

ama kaa làá dāá ká-bi.

Niinee ní ú dāá lì yii:

<M làá fàtīí gítí m-taafaacal cee,

di sá yii m nín nìn bí u-ceeyee,

m nìn bí mmɔnni ki jítiǹ kɔŋkɔnnee.>

10 «Waa nìn béè yii

an sá man di nìn tìì-u

bilee nì ndaam nì ŋkpam.

Man di nìn tìì-u animbil nì sindaariya,

ama ní u dūu ŋá saraabi ki tīī diwaal Baal.

11 An puee bilee yuntiŋu yaa láa bàn̄ee,

m làá dāá fàtīí yòon̄ m-wanti,

ní ndapɔm mun yuntiŋu yaa láa bàn̄ee,

ḿ dāá fàtīí tí yòon̄ m-daam.

M làá dāá bìitī m-pikuti nì m-gulifau wampeeŋkaati

tin bīī u-cooi puee.

12 Tiŋman, m làá dāá bìitī u-cooi pu

kí dàkà u-bɔmbi,

ní báà ubɔ mun dāa kpá kí fōō-u m-ŋaan.

13 M làá dāá kúntí u-faalii,

nì u-jiŋaalib nì u-jiŋaalib bin u jīǹ uŋmapɔɔn yaa páaǹee,

nì u-wiŋŋuŋfikaai nì u-jiŋaalib bin kɔkɔ pée kíǹ u jīǹee.

14 M làá dāá bīil̀ u-fiinyi nì u-fiigi sufii

in pu u nìn lì yii:

<Kpèè m-bɔmbi nín pàn̄-mi tipaal tiŋyee sèé.>

M làá yàntī an kpántí kupɔɔu

ní ipeel ń dūú kpántí i-jinti.

15 M làá dáaĺ u-tafal ŋyunti ŋun

u dūu nóó diwaal Baalee pu.

U nìn tùutī talaalub ki ŋáań saraabi.

U nìn cáá abɔmbil nì tiléeŋkaal ki nyāantí u-ba.

U nìn sáń ki pá u-bɔmbi boon,

ki nìn súntì man pu!

Ti-Dindaan di sòon̄ míǹ.

16 An pu ní m làá gíiǹní u-landɔkɔŋu m-cee.

M làá cáá-u kí cùnnì kuteeun

ní kí sòoǹ án kɔ́ u-pɔbilin.

17 M làá dāá fàtīí gíiǹ u-fiinyikpaaŋŋi kí tīī-u niin,

ní kí dāá yàntī Akɔɔr tantakal^c

ń kpántí dimákal punyɔkɔki.

Niinee u làá dāá tí táá-mi

kii ŋyunti ŋun u nìn dáá sá usapɔɔnee,

a lì kii ŋwiin ŋun u nìn nyáń Eejipiti tiŋkinee.»

Dimɔɔkil wiiŋŋu

18 «Ti-Dindaan di sòon̄ yii ŋwiin gbantee

u làá dāá yíiń-mi yii <m-cal>

ní kaa làá ti yíiń-mi yii <m-waal Baal,

an dàkà yii m-kpiliu>.

19 M làá lēē awaa Baal

yindi u-nyɔkɔn,

ní ubɔ gíti kpá kí téetí

diyindi gbanti pu.

20 Yaadalee, m-nibul puee,

m làá dāá pòon̄ kí ŋá mpèé

nì ipeel nì inoon nì tin fù ti-pooŋi puee.

M làá dāá kúntí butɔbu nì kitàataajiki nì kujaau,

kitiŋ nee poon.

M làá dāá yàntī bin kóò kitiŋ nee puee

ń gèeǹ nì ŋgbansɔŋfi.

21 M làá dāá mɔ̀nnì-si kí cáá-si kí nīn cáa cá jaanjaan.

M làá dāá dū ibaamɔn nì tin bí deedeeyee

nì dineendi nì disaasɔl kí pà a-cootiiku pu.

22 M làá dāá dū deedee ní kí pà a-cootiiku pu,

ní á béé yii m sá a-Dindaan.

23 Ti-Dindaan nín lī puee sɔ̀. Ŋwiin gbantee,

m làá dāá nīn sá Unimbɔti un fòol̄ ŋwimmeemee.

M làá dāá tīī kutagbɔŋu kun ku nyàab̀ m-ceeyee,

ní kutagbɔŋu mun ń dāá tīī kitiŋ

ntaanyim min kì nyàab̀ ku-ceeyee.

24 Ní kitiŋ ń yàntī bilee nì fiinyi nì fiigi

ń lòoǹ tiŋan

Jisirayeel tantakalin.

25 Man làá dāá yàaǹ iwambool kitiŋ nee pu.

M làá dāá nīn néeń 'Baa là-mi'

ní kí dāá tùkù 'Naa sá m-nibul' yii^d:

<A sá m-nibul>,

ní úǹ ń dāá kíí-mi yii: <M-Nimbɔtiu.>»