Krooniiki Gbɔnliliitiiku 1

Krooniiki

gbɔnliliitiiku

ISIRAYEEL BƆTIU SALOOMƆN BƆTI

1 Daafiidi jipɔɔn Saloomɔn nìn cúú u-beel pɔŋŋu ki báaǹ inyaan. Ti-Dindaan u-Nimbɔtiu nìn bí u-cee ní ki nìn yāntì u kpántì ubɔtikpaŋkpaan.

Saloomɔn mēē Unimbɔti yii ú tīī-u iciin ú dūú kàl̄ dibeel

(Kpèè 1 Bib 3.4-15)

2 Saloomɔn nìn sòon̄ nì Isirayeel yab kɔkɔ, cilinjee bijanjakpilib bin nìn sá bijanjaliibi kutuku kutuku kpilibee nì bin nìn sá dilaataal dilaataal kpilibee, nì bibɔsoonliibi nì Isirayeel tindaŋkpilib kɔkɔ, an dàkà yii adican kpilib. 3 Saloomɔn nì binib bin nìn kóoǹ ki kpáfì u-cee gbantee nìn táá ki cūtì Circir paaŋŋu ŋun bí Gabawɔn tiŋkinee. Di sá yii niin ní Unimbɔti kpafindi tantiu un ti-Dindaan tɔntɔnliu Mooyiisi nìn ŋá kuteeunee nìn bí^a.

4 Daafiidi nìn yōoǹ Unimbɔti Dakaau Kiiriyati-Yeeyariim^b tiŋkin ki cáa cūnnì Jeerusaleem tiŋkin. U nìn dū-u ki síiǹ mpaan ŋun u nìn bɔ́ntèe pu, tanti poon. 5 Ama ti-Dindaan circir kɔŋkooŋŋu nyɔkɔpu, Gabawɔn tiŋkin niin ní tasa saraafaŋŋu ŋun Uurii jipɔɔn, Uur naantiiu Beesaleel^c nìn máńee bí.

Niin ní Saloomɔn nì samaa nìn cūtì ki bālifì ti-Dindaan. 6 Saloomɔn nìn jɔ́m̀ tasa saraafaŋŋu ŋun nìn bí ti-Dindaan nimbiin, dikpafindi tantiu nyɔkɔpuee ki ŋá bisaraawɔkaabi. U nìn kūū tiwaŋkuti kutuku ní ki dū ti-kɔkɔ ki wùn̄ ŋŋmi. 7 Kunyeeu gbantee ní Unimbɔti lēē u-ba ki dàkā Saloomɔn ní ki bí-u yii: «Bàlifì kun ní a là ḿ tīī-see!» 8 Ní Saloomɔn kíí Unimbɔti yii: «Ti-Dindaan, a dàkā m-baa Daafiidi kulaŋŋaŋfitiiu tikpil, ki yāntì kɔŋkɔnnee m kpántì ubɔti ki fōō u-yil. 9 Ti-Dindaan Unimbɔti, a nín nìn pōoǹ m-baa Daafiidi puee, yàntī án ŋá míǹ. Di sá yii sii di dū-mi ki kāaǹ binib bin wīikí kii kitiŋ pu tam nee pu ubɔti^d. 10 Tīī-mi iciin nì dinyil ḿ dūú kpòotī a-nibul. An yaa sá fám, ŋma di ŋūǹ kí kpòotī a-nibul dikpaandi nee?»

11 Ní Unimbɔti kíí Saloomɔn yii: «Aa bālifì tigaajati àá tigaajawan àá tinyool àá a-nannanliibi kúm, ní kaa bālifì mun yii ḿ tīī-si mmaŋfafɔkɔn. Ama a bālifì kí nīn cáá iciin nì dinyil kí ŋmā kí dūú kpòotī m-nibul din pu m kāaǹ-si dibeelee. A nín bālifì mimmee puee, 12 m làá tīī-si iciin nì dinyil. M làá tīī-si tigaajati nì tigaajawan nì tinyool kí kūtì. A làá nīn cáá tíǹ gbanti kɔkɔ kí jītíǹ bibɔtiibi bin līntiǹ-see nì bin làá dāá páanní a-boonee.» 13 Niinee Saloomɔn yíkì Circir Paaŋŋu ŋun bí Gabawɔn tiŋkin, laakin ti-Dindaan kpafindi tantiu nìn bée. U nìn fātìi gítì Jeerusaleem tiŋkin ní ki kāl̀ Isirayeel tiŋki pu dibeel.

Saloomɔn gaajati

(Kpèè 1 Bib 10.26-26, 2 Kroo 9.25-28)

14 Saloomɔn nìn kóoǹ janjatɔrɔkub nì itaamu ki kpáfì. U nìn cáá janjatɔrɔkub kutuku ubɔ nì alaataa anaa, nì itaamu kutukub saalaa nì bili^e. Tijanjawan gbanti tiba nìn bí ntimu mun poon ní ajanjanaapaa bée, ní tin kíǹee bí u-cee Jeerusaleem. 15 Ubɔti nìn yāntì animbil nì sindaariya gbí Jeerusaleem tiŋkin kii ataŋkpeeyee^f, ní seedir dɔi wīikí kii Seefeelaa tiŋki sufii in bi yíì siikoomɔɔree. 16 Saloomɔn taamui nìn nyēeń Eejipiti nì Siisilii timmun ní. Niin ní ubɔti nyampoobi nìn dāań-i^g. 17 Bi yaa nìn cáań kujaau tɔrɔkuu Eejipiti tiŋkinee, u-nyampooku nìn sá animbil kúti jitɔmbi alaataa aluu ní, ní utaamu nyampooku sá animbil kúti jitɔmbi dilaataal nì imuŋku ili nì saalaa. Binyampoobi gbanti nìn cāabìń janjatɔrɔkub nì itaamu gbanti ki nyáfíǹ Eeti yab nì Siirii yab bɔtiibi mun.

Saloomɔn bɔ́ntì kí mā ti-Dindaan Diiku

(Kpèè 1 Bib 5.15-32, 7.13-14)

18 Saloomɔn nìn lēē yii u làá mā Kudii kí dūú sú ti-Dindaan, ní kí mā úǹ u-ba kubɔtinaakoou.