Krooniiki Gbɔnliliitiiku 2

1 U nìn fōō binib kutukub imuŋku ita nì saalaa bí nīn tūntí tiwan nì binib kutukub imuŋku inaa bí nīn bí dijool pu ki kpítí ataŋkpee, ní ki fōō binib kutukub bita nì alaataa aluu bí nīn kpèé bitɔntɔnliibi.

2 Saloomɔn nìn tú binib Tiir yab bɔtiu Yiiram cee bí tùkù-u yii: «A nìn tútúǹ m-baa Daafiidi ki tīiń-u seedir dɔi u dūu máń kudii kun poon u làá nīn kóòyee. M bàà là yii á ŋá míǹ mbaantiim kí tīī-mi. 3 Kpèè, m làá mā kudii kí tīī ti-Dindaan m-Nimbɔtiu tinyool. Isirayeel yab làá dū kudiiyee kí sú-u. Bi làá nīn tùutī talaalub ki tìì-u, ní kí nīn pāantí kpɔnɔb bin bi dūu sú-uee^a baabadal. Bi làá nīn ŋáań bisaraawɔkaabi kutaafaau nì kujoou, ki kpáaǹ iwiŋŋuŋfikaa dal nì uŋmal kamaa wimpeekaaŋu nì jiŋaalib wiiŋyi in ti jīǹ ki jáaḿ ti-Dindaan ti-Nimbɔtiuee saraabi. Unimbɔti nín nìn síiǹ Isirayeel yab yii bí nīn ŋáań míǹ ki cá jaanjaan. 4 Kudii kun m làá mēe máaǹ kí nīn sá kudikpaaŋŋu, di sá yii ti-Nimbɔtiu di sá ukpaan ki jítiǹ inimbɔti kɔkɔ. 5 Ama ŋma di ŋūǹ kí mā-u kudii? Di sá yii yilpu nì yilpu fɔ́ŋŋŋ kaa wāā ú ŋmā kí kɔ́^b. Ní ŋma ní m sá kí ŋmā kí mā-u kudii? Kun m pée là kí ŋée di sá ḿ mā mpaan ŋun pu bi làá nīn ŋáań-u saraabee. 6 Míǹ puee, á tīiń-mi unil un ŋūǹ kí tɔ̄ sindaariya nì animbil nì tasa nì tikúti tundi tiŋanee. Udaan máaǹ kí nīn nyí bi nín bɔ́ntí satab bí nīn cáá nnyim min máǹee nì nnyim min máǹ cínciŋee nì nnyim min máǹ gùŋgumee, ní kí nīn gíti nyí tikpiŋkpiil bɔti. Udaan làá kūtì man m-ba tɔntɔnliibi bin m-baa Daafiidi nìn lēē bi bí Jeerusaleem tiŋkin nì Juuda timmunee pu kí tɔ̄ ditundi. 7 Á tīiń-mi seedir nì siipreesi nì santaal dɔi in bí Leebanɔn jooŋŋi puee, di sá yii m nyí a-tɔntɔnliibi di ŋūǹ ki gà Leebanɔn sufii tiŋanee. M-tɔntɔnliibi làá dāá kūtì bi-pu. 8 Bi làá bɔ́ntí-mi idɔ an nīn náaǹ, di sá yii Unimbɔti diiku kun m làá mēe làá nīn sá kukpaaŋŋu ní kí nīn ŋān̄. 9 M làá tīī a-tɔntɔnliibi bin làá gāā isufee bilee yim tɔɔnib kutukub biluu nì ɔɔji yim tɔɔnib kutukub biluu nì ndamam liitirib kutukub alaataa anii nì ŋkpam liitirib kutukub alaataa anii.»

10 Tiir bɔtiu Yiiram ŋmàn̄ kugbɔŋu ki kíí Saloomɔn yii: «Ti-Dindaan néeń u-nibul. An pu ní u dū-si ki kāaǹ di-pu ubɔti.» 11 Ní Yiiram gíti kútì ki lī yii: «Tí jāam̀ ti-Dindaan, Isirayeel Nimbɔtiu un di náań kutagbɔŋu nì kitiŋee. Tiŋman u tīī ubɔti Daafiidi kibininjabiki kin cáá iciin nì dinyil nì nlandɔkɔee. U làá mā kudii kí tīī ti-Dindaan ní kí mā úǹ u-ba diiku. 12 Too, m làá dū Uram-Abii kí tīiń-si. U sá utɔntɔnli un nyí ditundi tiŋan ki yáb̀ee. 13 U-na sá Daani naakookun ní u-baa sá utiirja. U nyí sindaariya nì animbil nì tasa nì tikúti nì ataŋkpee nì idɔ tundi tiŋan. U gíti ŋūǹ kí bɔ́ntí satab bí nīn cáá nnyim min máǹee nì nnyim min máǹ cínciŋee nì nnyim min máǹ gùŋgumee nì satab bin bí fálfalee. U gíti tí ŋūǹ kí kpítí tikpiŋkpiil kí lēē kunaŋu ataŋkpee pu. Ditundi din a yaa pée dūu ŋúbiǹ-uee, u làá bɔ́ntí kí tīī-si ní. U nì sii a-ba tɔntɔnliibi nì a-baa ubɔti Daafiidi tɔntɔnliibi di làá kpāfì kí tɔ̄ ditundi. 14 Bilee nì ɔɔji nì ŋkpam nì ndamam min bɔti a nìn sòon̄ee, dūú tīiń man a-tɔntɔnliu kɔŋkɔnnee. 15 Ti làá cùú gāań isufi Leebanɔn kii a nín pée là puee, ní kí bóob́ kí dūú tɔ̄ń tiŋkun kí cáań-si Jafaa tiŋkin. Niinee ní á dāá yòon̄-i kí cùnnì Jeerusaleem.»

16 Saloomɔn nìn kàan̄ binicambi bin kɔkɔ nìn bí Isirayeel tiŋki puee, kii u-baa Daafiidi nín nìn kàan̄-bi pu ŋyunti ŋun u nìn sá ubɔtee^c. Bi nìn nyáń binib kutukub dilaataal nì imuŋku ili nì saalaa nì bita nì binib alaataa aluu. 17 U nìn lēē bi-kansikin binib kutukub imuŋku ita nì saalaa bí nīn tūntí tiwan, ní ki lēē binib kutukub imuŋku inaa bí nīn kpítí ataŋkpee dijool pu, ní ki lēē binib kutukub bita nì alaataa aluu bí nīn kpèé bitɔntɔnliibi gbanti ditundi ń còom̀.