Diteetil Gbɔŋku 12

TI-DINDAAN MARAB

1 Iwiin in kɔkɔ ni cáá kí kàl̄ kitiŋ kin ti-Dindaan ni-baabi Nimbɔtiu làá tīī-ni ní nīn yèe poonee, abɔkpaa nì marab bin ni máaǹ kí nīn ŋúb́ kí ŋá kii bi nín bí yii ní ŋá puee sɔ̀.

Mpaambaanti ŋun pu bi làá nīn jáaḿ Unimbɔtee

2 Ní kpēelikì iwaatootipaan in kɔkɔ bí ajoon nì ŋgbantamu puee nì isuboon taapu laakin anibul ŋin ni làá jà nee tòotī bi-waaŋee kí fá, bí taa ti ká ipaan gbanti. 3 Ní kpēelikì bi-saraafaŋyi, kí gbá kí wìil̀ ataŋkpee ŋin bi dūu cóoǹ ki tòotēe, ní kí wà bi-windɔi ŋŋmi. Gbámaan kí wìil̀ bi-waaŋi ŋin bi máńee binib ń taa ti béé yii tiba nìn bí ipaan gbanti pu. 4 Naa máaǹ kí jāam̀ ti-Dindaan ni-Nimbɔtiu kii bíǹ nín jáaḿ bi-waaŋi puee. 5 Ama ni-naakɔti kɔkɔ kansikin mpaan ŋun pu ní ti-Dindaan ni-Nimbɔtiu làá lēē bí nīn jáaḿ-uee baba ní ni dāa máaǹ kí cù kí jāam̀-u. 6 Niin ní ni dāa cāabìń ni-saraawɔkaabi nì mpèé saraabi nì ni-saalaatiiti nì ni-lammɔntiim wampɔkaati nì ipoon saraabi nì ni-lammɔntiim saraabi nì ni-naai nì ni-piii nì ni-ŋoobui biseemaliŋ. 7 Ti-Dindaan ni-Nimbɔtiu nimbiin niin ní ni nì ni-dicaŋŋi máaǹ kí jī tijin gbanti. Ní dāá nīn fàal̀ ti-Dindaan ni-Nimbɔtiu nín bīiǹ ni-tuuŋŋi kɔkɔ pu ki yāntì an bútì-nee pu.

8 Naa dāa máaǹ kí nīn ŋáań kii ti nín bíi ŋáań pu díǹ, báà ŋma ŋáań min u là nee. 9 Di sá yii taa láá bàn̄ kitiŋ kin ti-Dindaan ni-Nimbɔtiu làá dūú tīī-ni ní kàl̄ kí ŋùŋfèe ni. 10 Ama ni làá dùtī Jɔɔdan buŋŋu kí tin kɔ́ kitiŋ kin ti-Dindaan ni-Nimbɔtiu làá dūú tīī-ni ní nīn kíǹ ki yèe ni. Ú làá nyāntí-ni ni-nannanliibi bin māntìi tú-nee kɔkɔ ŋaan, ní kí tīī-ni diŋuŋfil ní kàl̄ kitiŋee ni nì ŋgbansɔŋfi. 11 Niin ní ti-Dindaan ni-Nimbɔtiu làá lēē mpaan ŋun pu bi làá nīn jáaḿ-uee. Niin ní ni dāa máaǹ kí cùnnì tin kɔkɔ m bālifì-nee, ni-saraawɔkaabi nì ni-pèéŋu saraabi nì ni-saalaatiiti nì ni-lammɔntiim wampɔkaati nì tin kɔkɔ ni pōoǹ yii ni làá tīī ti-Dindaanee. 12 Ti-Dindaan nimbiin niinee ní ní fàal̀, ni nì ni-jipɔmbi nì ni-bisalib nì ni-tɔntɔnliibi bininjab nì binimpoobi, nì Leefii yab bin bí ni-timmu poonee, kun puee bíǹ kaa fōō difakal kii nimbee^a.

13 Ní nīn nyíǹ ni-ba kí taa láa ŋá ni-saraabi laakin kamaa ní ni yaa pée kée. 14 Mpaan ŋun ti-Dindaan làá dāá lēē ni-naakɔti kansikin kubɔ poonee baba pu ní ni dāa máaǹ kí nīn ŋáań ni-saraabi. Niin baba ní ni máaǹ kí nīn ŋáań tin kɔkɔ m kpáafì-ni nee. 15 Ama kii ti-Dindaan ni-Nimbɔtiu nín bīiǹ ni-pu puee, ŋyunti ŋun ni yaa lèe, ni ŋūǹ kí kpɔ̀ kuwaŋkuluu laakin ni kóòyee kí ŋmɔ́ ku-nanti. Niinee un bí circiree nì un kaa bí circiree kɔkɔ ŋūǹ kí ŋmɔ́ tinan gbanti, kii bi nín kù ucaŋkpalim àá ukpiil kí ŋmɔ́ puee. 16 Ama naa máaǹ kí ŋmɔ́ tiwaŋkuti fatikuu^b. Ní kpáatí-u kí fá kitiŋ kii bi nín kpáatí nnyim kí fá puee.

17 Naa cáá nsan kí kàl̄ ni-timmu poon kí dū ni-kpaajinti nì ni-dapɔm nì ni-kpam saalaatiiti kí jī, àá ní kpɔ̀ ni-naai nì ni-piii nì ni-ŋoobui biseemaliŋ kí ŋmɔ́. Naa tí cáá nsan mun kí kàl̄ ni-timmu poon kí dū tin kamaa ni pōoǹ yii ni làá tīī ti-Dindaanee àá nlammɔntiim saraabi àá ni nín lēē ni-pɔbiliŋ poon kí tīī tiŋyee tiba kí jī. 18 Ti-Dindaan ni-Nimbɔtiu baba nimbiin, laakin u làá dāá lēēyee ní ni dāa máaǹ kí jī-tì, nimbi nì ni-jipɔmbi nì ni-bisalib nì ni-tɔntɔnliibi bininjab nì binimpoobi kɔkɔ nì Leefii yab bin kóò ni-timmunee. Ni dāa máaǹ kí nīn bí mmɔŋkpaan poon ní ti-Dindaan ni-Nimbɔtiu nimbiin, tin u ŋá ki tīī-nee pu. 19 Iwiin in kɔkɔ ni cáá kí kàl̄ ni-tiŋki poonee, ní nīn nyíǹ ni-ba kí taa súntí Leefii yab pu.

20 Ti-Dindaan ni-Nimbɔtiu yaa láa wāaǹ ni-tiŋki kii u nín pōoǹ-ni puee, ní tinan neeliŋu yaa láa cúú-nee, ni dāa pée ŋūǹ kí ŋmɔ́ tinan kii ni nín là puee. 21 Mpaan ŋun ti-Dindaan ni-Nimbɔtiu lēē ní nīn jáaḿ-uee yaa dátiǹ-nee, ní dāá lēē ni-naai àá ni-piii àá ni-ŋoobui in ti-Dindaan ni-Nimbɔtiu tīī-nee kansikin tin ni lèe kí kpɔ̀ nimbi ni-ba timmu poon kí pée ŋmɔ́ ni nín là puee, kí nóó nì m nín kpáafì-ni puee. 22 Niinee ni pée ŋmóò-tì kii bi nín kù ucaŋkpalim àá ukpiil pu kí ŋmɔ́-uee ní. Un bí circiree nì un kaa bí circiree kɔkɔ ŋūǹ kí ŋmɔ́ tinan gbanti. 23 Ama ní nīn nyí kí taa ŋmɔ́ fatiku. Di sá yii fatiku sá dimaŋfal^c ní. Míǹ puee naa máaǹ kí ŋmɔ́ kuwaŋkuluu nanti kí kpáaǹ kun yì ku-maŋfalee. 24 Naa máaǹ kí ŋmɔ́ fatiku. Ní kpáatí-u kí fá kitiŋ kii bi nín kpáatí nnyim kí fá puee. 25 Ní taa pée ŋmɔ́ fatiku, án nín làá ŋá pu án nīn ŋān̄ kí tīī ni nì ni-biyaamuee. Di sá yii ŋyunti gbantee, ni bíi ŋáań min kítì ti-Dindaan nimbiinee dee.

26 Ama ni-wanti tin ni dūu sú ti-Dindaan nì ni-pooŋyi saraabee, ní yòon̄ kí cáá cùnnì mpaan ŋun ti-Dindaan làá dāá lēēyee pu. 27 An yaa sá saraawɔkaayee, ní yòon̄ tinan kɔkɔ nì fatiku kí cáá ŋá saraa ti-Dindaan ni-Nimbɔtiu saraafaŋŋu pu. Ama an yaa sá saraabi bin kíǹeeyee, ní kpáatí bi-fatikuu kí pɔ̀l̄ ti-Dindaan ni-Nimbɔtiu saraafaŋŋu pu, ní kí ŋmɔ́ tinan.

28 Ní pīlifì tiŋan kí nīn ŋúb́ abɔkpaa ŋin m tīī-ni nee, ní án bútí ni nì ni-biyaamu mun làá páanní ni-boonee kí nīn cáa cá jaanjaan. Kun puee ni yaa ŋá mimmee, ni ŋá min kítì ti-Dindaan ni-Nimbɔtiu nimbiinee dee.

Ní nīn nyíǹ ni-ba nì Kanaan yab waaŋi

29 Ti-Dindaan ni-Nimbɔtiu làá nàan̄ anibul ŋin kóò kitiŋ kin poon ni cá kí kɔ́ nee. Ni làá dāá jà-bi ní kí fōō bi-tiŋki kí nīn kíǹ ki kóò niin. 30 Ti-Dindaan yaa láa nāaǹ-bi míǹ ki dóòyee, ní dāá nīn nyí nì ni-ba kí taa píĺ ni-ba kutaliŋŋu kí bàlifì bi-waaŋi pu, kí lì yii: «Mana ní anibul nee nib nìn tòotī bi-waaŋi ní? Ti-mun bàà là kí ŋá míǹ mbaantiim deeyaa!» 31 Ní taa pée jāam̀ ti-Dindaan ni-Nimbɔtiu kii bíǹ nín tòotī bi-waaŋi ki ŋáań puee. Bíǹ yaa bíi jáaḿ bi-waaŋee, bi ŋáań atuun ŋin ti-Dindaan kaa néeńee nì ti-bulifi ní. Bi ŋūǹ gba kí dū bi-jipɔmbi nì bi-bisalib kí wà ŋŋmi kí ŋá saraa kí tīī bi-waaŋi.