Diteetil Gbɔŋku 11

Unimbɔti nín ŋá tin ki tīī Isirayeelee

1 Nín̄ néeḿmaan ti-Dindaan ni-Nimbɔtiu kí nīn ŋáań u nín bí yii ní ŋá puee, kí nīn ŋúb́ u-bɔkpaaŋi nì u-koobiliŋ nì u-marab baabadal. 2 Nimbi bin sí díǹ nee, ní béé yii an kaa sá ni-biyaamu mun kaa nyí kaa ká ti-Dindaan ni-Nimbɔtiu dàkatam nì u-pɔŋŋu nì u-tuŋkpaaŋŋee ní m bíi sòoǹ. 3 Múǹ di kaa nìn ká maamaacib nì atuun ŋin ní u nìn ŋá Eejipiti tiŋkin ki dàkā Eejipiti bɔtiu Faaroo nì u-tiŋki nib kɔkɔee^a. 4 Muaa nìn tí ká ti-Dindaan nín nìn yāntì Tikati mɔɔl nyim gbí ki léeǹ Eejipiti yab janjaliibi nì bi-taamui nì bi-janjatɔrɔkub pu, ki kūū ki céetì-bi kɔkɔ múb ŋyunti ŋun bi nìn bíi jìń ni-boonee ^b 5 An kaa nìn tí sá ni-biyaamu di nìn ká tin kɔkɔ u ŋá ki tīī-ni kuteeun, ki yāntì ni bāań laakin ni bí nee. 6 Múǹ di kaa nìn tí ká u nín nìn ŋá Eeliyaab jipɔmbi Datan nì Abiiram bin nìn sá Rubeen naakookunee puee. U nìn yāntì kitiŋ cúu cōotì laakin bi nìn sée, ní bíǹ nì bi-dicaŋŋi nì bi-tantib nì bin kɔkɔ nìn yú bi-boonee jéetì poon ní kitiŋ fātìi dūu ŋéeb́ bi-pu Isirayeel yab kɔkɔ nimbiin^c. 7 Ni-nimbilaaliyin ní ti-Dindaan túń atuŋkpaan gbanti kɔkɔ. 8 Míǹ puee nín̄ ŋúb́maan marab bin kɔkɔ m tīī-ni díǹ nee. Ni yaa ŋá mimmee, ni làá ŋmā kí ká mpɔn kí kɔ́ kitiŋ kin ni bíi dùtī Jɔɔdan buŋŋu kí tin fōō kí nīn kíǹ ki yì nee poon, 9 ní kí ŋmā kí kàl̄ kitiŋ kin ti-Dindaan nìn pōoǹ kí tīī ni-naanjab nì bi-naantiibee poon kí yúntí. Kitiŋ gbanti poonee, tisiil nì nnaabiim còol̀ ní^d.

Kitiŋ kin ti-Dindaan kpèé tiŋanee

10 Kitiŋ kin ni làá cùú fōō kí nīn kíǹ ki yì nee kaa bí kii Eejipiti tiŋki kin poon ni nyánní nee nín bí puee. Niinee, ni yaa nìn kùn̄ ki búĺ ni-wambooliiyee, ni nìn yàantí-i nnyim ní, kii bi nín yàantí tikuŋfaal kpaabu puee. 11 Ama kitiŋ kin ni làá dùtī Jɔɔdan buŋŋu kí tin fōō nee sá ajoon nì atantaka tiŋki ní, ní utaa nì ki-pu. 12 Kì sá kitiŋ kin pu ti-Dindaan ni-Nimbɔtiu wúńee ní. Ti-Dindaan ni-Nimbɔtiu nimbil pée cɔ́ ki-pu ní baabadal, kí yòon̄ dibindi kíltam kí cáá sāā di-kúntitam.

13 Míǹ puee ni yaa tɔ́^e marab bin m tīī-ni díǹ nee, ki néeń ti-Dindaan ni-Nimbɔtiu, ki nóó-u nì ni-pɔbil kɔkɔ nì ni-naŋki kɔkɔee, 14 u làá yàntī utaa ń nīn nì ŋyunti ŋun ní an máaǹee, ukpaasiitaa nì useetaa kɔkɔ. Mimmee ni-bileeu nì ni-fiinyib nì ni-ɔliifib làá nīn lòoǹ tiŋan ní. 15 U làá yàntī ni-naakpaapɔɔku ń nīn cáá timɔsɔn kí tīī ni-waŋkuti, ní nimbi ni-ba ń jī kí díkí.

16 Ama ní nīn nyíǹ ni-ba an taa ŋmàtiǹ-ni ní fàtī ni-boon kí tīī-u, kí cùú nīn gbàantí awaa taapu ki jáaḿ-ŋi. 17 Ni yaa ŋá míǹ, ti-Dindaan làá gíí ni-pu diŋuul ní kí dū kutaa kí pìin̄ ní utaa ń taa ti nì. Ni-tiŋki kaa ti làá ŋmā kí lòoǹ tikpaajin. An yaa ŋá mimmee naa làá sūŋkì ní kí kpú kí céetí kitimmɔntii kin ti-Dindaan tīī-nee poon^f. 18 Dūmaan marab bin m tīī-ni díǹ nee kí ŋá ni-pɔbiliŋin nì ni-nammun. Dūmaan-bi kí fìn̄ ni-ŋalii nì ni-yigbeeŋi pu án nín làá ŋá pu ní taa súntí bi-puee. 19 Dūmaan-bi kí dàkà ni-biyaamu. Báà ni yaa bí ni-diikunaaa, ni tàkā nsanni ki còom̄ ki cáaa, ni dɔ̄ɔɔ, ni yúɔɔɔ, bí nīn kā ni-nyɔkɔn. 20 Ŋmàmaan-bi kí nákań ni-diiŋŋi punyɔmmu pu nì ni-timmu punuubi pu. 21 Ni yaa ŋá mimmee, ni nì ni-biyaamu làá kàl̄ kitiŋ kin ti-Dindaan pōoǹ kí tīī ni-naanjabee pu kí yúntí kii kutaa kun dàn̄ kitiŋ pu nee nín làá yúntí puee.

22 Tiŋman, ni yaa lafun ŋúb́ marab bin m tīī-ni díǹ nee kɔkɔ ki néeń ti-Dindaan ni-Nimbɔtiu ki ŋáań u nín là puee, ki dū ni-ba ki nákáǹ-uee, 23 ti-Dindaan làá jà anibul nee kɔkɔ kí tīī-ni ní ní fōō anibul ŋin sá akpaan ki pɔ̄ɔ̄ ki jítiǹ-ni nee timmu kí nīn yì. 24 Laakin kamaa ní ni-taal yaa tāāyee làá kpántí ni-wanti ní. Ni-tiŋki làá dāá nīn wāā kí yòon̄ kuteeu kí cáá sāā Leebanɔn, ní kí yòon̄ Eefiraati mɔɔl kí cáá sāā Meediiteeranee tiŋkuu ŋwìiń jeetilaŋki pú. 25 Báà ubɔ kaa dāa ŋūǹ kí sīĺ ni-nimbiin kí jáǹ-ni. Laakin kamaa ní ni yaa pée cūtèe, ti-Dindaan ni-Nimbɔtiu làá yàntī niin nib kɔkɔ ń fàŋkì-ni ní bi-wunti ń kpú kii u nín pōoǹ-ni puee^g.

26 Kpèèmaan, m dū dibiindi nì mbusu kí bíl̀ díǹ ni-nimbiin. 27 Ni yaa tɔ́ ti-Dindaan ni-Nimbɔtiu marab bin m tīī-ni díǹ neeyee, dibiindi dee. 28 Ama ni yaa kaa tɔ́ ti-Dindaan ni-Nimbɔtiu marab, ní ki yaa fātì ni-boon ki tīī tin kɔkɔ m kpáafì-ni díǹ nee ki cūtìi nóó awaa ŋin naa nyée, mbusu dee.

29 Ti-Dindaan ni-Nimbɔtiu yaa láa cáá-ni ki kɔ́ǹ kitiŋ kin ni bíi bɔ́ntí kí cù kí fōō nee poonee, ní tɔ́kɔń Geerisiim jool yilpu kí tīī dibiindi, ní kí tɔ́kɔń Eebaal jool yilpu kí tɔ̄ mbusu. 30 Kii ni nín nyí puee, ajoon gbanti bí ni yaa dūtì Jɔɔdan buŋŋu ki yōoǹ didandi din dɔ̄ ŋwìiń nyalaŋki púee, ní ki bí Kanaan yab bin kóò Arabaa tiŋki poonee, Giilgaal caŋin. An kaa dátiǹ Mooree sukpaaŋyi. 31 Ni làá dùtī Jɔɔdan buŋŋu kí cù kí fōō kitiŋ kin ti-Dindaan ni-Nimbɔtiu tīī-nee dee. Ní fōō kitiŋ gbanti kí nīn kíǹ ki kóò ki-ni. 32 Ní pɔ́ɔm̀maan ni-ba kí nīn tɔ́ abɔkpaa nì akoobil ŋin kɔkɔ m tīī-ni díǹ nee.