Diteetil Gbɔŋku 10

Ti-Dindaan pūǹ ikpiti

1 Niinee ní ti-Dindaan bí-mi yii: «Kpítí titaŋkpapilindi tili kii tipeepeekaalee. Míǹ boonee á kpáá ndɔ dakaau. A yaa ŋá míǹ ki dóòyee, á jɔ̄mìń m-cee dijool pu doo. 2 M làá ŋmà tipilindi gbanti pu anyɔɔbun ŋin nìn kā tipilimpeepeekaal pu a dūu lúkú ki wīīyee kí tīī-si á dūú ŋá dakaayee poon.» 3 Niinee ní m dū busubu bun bi yíì akasiyayee dɔŋu ki kpáá dakaa ní ki kpítì titaŋkpapilindi tili ní ki ŋúb́-tì m-ŋaan, ki cáa jɔ́m̀ dijool pu. 4 Kii ti-Dindaan nín nìn ŋmàn̄ pu mpeepeekaaminee, míǹ ní u tí fātìi ŋmàn̄ tipilindee pu marab saalaa bin pu u nìn sòon̄ dijool pu ŋŋmi poon ŋwiin ŋun ni nìn kóoǹ ki kpáfì dijool taapuee. U ŋmàn̄ míǹ ki dóòyee ní ki dū tipilindee ki tīī-mi. 5 M fōō tipilindee ní ki kpákatìń dijool pu ní ki dū-tì ki ŋá dakaa un m nìn kpááyee poon. Niin ní tipilindee gbíntìi kā kii ti-Dindaan nín nìn kpáafì-mi puee.

6 Míǹ boonee ní Isirayeel yab yíkì Beenee-Yaakan lɔkɔb cee ki cūtì Mooseela. Niin ní Aarɔn kpíì ní bi síb́-u ní u-jipɔɔn Eeleeyasaar fōō u-yil ki kpántì usaraaŋakpil^a. 7 Bi nyáń niinee, ní ki cūtì Guudigoodaa, ní ki nyáń Guudigoodaa ki nín cá Yootibata, kitiŋ kin cáá ibun tikpilee. 8 Ŋyunti gbanti ní ti-Dindaan lēē Leefii naakookun yab bí nīn tūntí ti-Dindaan poondi dakaau, kí nīn bí u-nimbiin ki tūǹ u-tundi ní kí nīn bìintí binib pu ti-Dindaan yindi pu. Ditundi din bi gbíntìi tūǹ ki dāa sāā díǹee dee^b. 9 An pu ní bi nín làá yàkatī kitiŋ kí tīī Isirayeel naakɔtee, baa nìn kpáaǹ Leefii naakookun yab. Bíǹ jandi di sá diyimɔɔl din bi cáá kí nīn tūǹ ti-Dindaan tundee, kii ti-Dindaan ni-Nimbɔtiu nín nìn tùkū-bi puee.

10 M nìn tí gbíntì dijool pu niin ki ŋá iwiin imuŋku ili ŋwiimpu nì kunyeeu kii m nín nìn ŋá pu mpeepeekaamee^c. Min bí nee muee, ti-Dindaan nìn tí pílifì m-wimmeem ní ki yāntì kaa nāaǹ-ni. 11 Ti-Dindaan nìn bí-mi yii: «Yīkìm̄! Lìntī binib nee nyɔkɔpu bí cùú já kí fōō kitiŋ kin ní m nìn pōoǹ bi-naanjab yii m làá tīī-bee!»

Nín̄ néeń ti-Dindaan kí nīn tɔ́-u

12 Kɔŋkɔnnee Isirayeel yab, ba ní ti-Dindaan ni-Nimbɔtiu baasii là yii ní ŋá ní? U là yii ní fàŋkì-u, kí nīn ŋáań u nín là puee, kí nīn néeń-u ní kí nīn tūǹ u-tundi nì ni-pɔbil kɔkɔ nì ni-fam kɔkɔ. 13 U là yii ní nīn ŋúb́ u-marab nì u-bɔkpaaŋi ŋin m bíi cáa tìì-ni díǹ nee, án nín làá ŋá pu án nīn ŋān̄ ki tīī-nee! 14 Kpèè ti-Dindaan ni-Nimbɔtiu di yì yilpu fɔ́ŋŋŋ ki yì kitiŋ nì tin kɔkɔ bí ki-puee. 15 Ama, ti-Dindaan nìn dū u-ba ki nákáǹ ni-naanjab ŋmaniŋma ní, bíǹ ní u néeń. Kɔŋkɔnnee, nimbi bi-naantiibi ní u lēē anibul kɔkɔ kansikin, kii an nín bí pu díǹ nee. 16 Míǹ puee ní kpántímaan ni-pɔbiliŋ kí dū ni-ba kɔkɔ kí sú ti-Dindaan, kí gbèen̄ kí taa ti jáǹ-u. 17 Di sá yii úǹ di sá inimbɔti kɔkɔ Nimbɔtiu, ní ki sá bidindambi kɔkɔ Dindaan. U sá Unimbɔtikpaan, ki sá Mpɔŋkɔdaan ní ki sá Unimbɔti un cáá tifaandee. Waa pɔ̀ gandi^d, kaa fòol̄ ubɔ mun cee tiba kí pɔ̀-u. 18 U mɔ́tí ataŋkpiibil nì bikpiipoobi pu, ní ki néeń unicaan un kóò ni-puee ki tìì-u u jīǹ, ki pèentí-u. 19 Míǹ puee ni máaǹ kí nīn néeń binicambi bin kóò ni-puee, di sá yii nimbi ni-ba nìn sá binicambi ní Eejipiti tiŋkin.

20 Fàŋkìmaan ti-Dindaan ni-Nimbɔtiu kí nīn jáaḿ-u. Dūmaan ni-ba kɔkɔ kí tīī-u. Úǹ baba yindi pu ní ni máaǹ kí nīn pùtī. 21 Úǹ ní ni máaǹ kí nyɔ̄ŋkì. Úǹ baba di sá ni-Nimbɔtiu. Úǹ di ŋá atuŋkpaan nì maamaaci tuuŋŋi ki tīī-ni. Nimbi ni-ba ká míǹ. 22 Ni-naanjab nín dɔ́miń ki kɔ́ Eejipitee, bi nìn bí binib imuŋku ita nì saalaa ja ní. Ama kɔŋkɔnnee, ti-Dindaan ni-Nimbɔtiu yāntì ni būtì kii iŋmalbijaa in bí kutaa puee^e.