Diteetil Gbɔŋku 9

Isirayeel yab kaa sɔ́ǹ bin kíǹee

1 Isirayeel yab, Pīlifìmaan! Ni làá dùtī Jɔɔdan buŋŋu dee. Ni làá cù kí já nì anibul ŋin sá akpaan ki jítiǹ-ni ki pɔ̄ɔǹ-nee nib ní kí fōō bi-timmu mun sá ŋkpaamu bi máń agun ki māntìi tú an fɔ̀kɔ̀ ki tin tūū kutaayee. 2 Ni làá jà Anaaki yab tinikpaandi nì tinifɔkɔl bin kóò niinee. Nimbi ni-ba nyí-bi ní ki gbìl̄ bi sòon̄ bi-pu yii: «Ŋma di ŋūǹ kí sīĺ Anaaki yab nimbiin dee^a?» 3 Ama béémaan díǹ yii ti-Dindaan ni-Nimbɔtiu u-ba di līī ni-nyɔkɔpu kii ŋŋmi ŋun wù ki céetí tikɔkɔee. Úǹ di làá nàan̄-bi ní kí dū-bi kí ŋá ni-ŋaan ní ní jà-bi kí nyāntí bi-tiŋki pu, ní kí kpɔ̀ kí céetí-bi malaa kii ti-Dindaan nín nìn pōoǹ-ni puee.

4 Ama ti-Dindaan ni-Nimbɔtiu yaa láa jìn̄-bi ki dū bi-tiŋki ki tīī-nee, ní taa láa lì yii: «An sá ti nín bí deedeeyee pu ní ti-Dindaan cáań-ti tí fōō kitiŋ nee kí nīn kíǹ ki yì.» Aayee, an kaa sá ni nín bí deedeeyee pu, ama an sá anibul nee kpitii pu ní ti-Dindaan làá jà-bi kí fōō bi-tiŋki kí tīī-ni. 5 An puee, an kaa baasii sá yii ni bí deedee àá ni-baamɔŋyi pu ní ni làá fōō bi-tiŋki kí nīn kíǹ ki yì. Ama an sá anibul gbanti kpitii pu ní ti-Dindaan ni-Nimbɔtiu làá jà-bi kí fōō bi-tiŋki kí tīī-ni. U làá ŋá kii u nín nìn pōoǹ ni-naanjab Abraam nì Isaaki nì Jaakɔbee puee ní. 6 Míǹ puee, ní béémaan yii an kaa sá ni nín bí deedee fiii gba puee pu ní ti-Dindaan ni-Nimbɔtiu làá fōō kitimmɔntii nee kí tīī-ni ní nīn yì. Ibaamɔn poonee, ni sá dinibul din pɔbil tīlifèe ní.

Sindaariya nabil

7 Ní téetímaan tibɔti nee kí taa súntí-tì dalba dalba ni nín kɔ́ǹ ti-Dindaan ni-Nimbɔtiu diŋuul kuteeun puee. Kí yòon̄ ŋwiin ŋun ní ni nyáń Eejipitee kí cáá sāā ŋyunti ŋun ni bāań laakin ni bí neeyee, ni pée bí ní ki jáà nì Unimbɔti kaa gbèentí. 8 Ooreeb jool puee, ni nìn tí gbítì ti-Dindaan ŋuul ní ki yāntì u gíí diŋuul tikpil áli u bàà nìn là kí kpɔ̀ kí céetí-ni. 9 M nìn jɔ́m̀ dijool pu kí fōoń titaŋkpapilindi tin pu ti-Dindaan nìn ŋmàn̄ mpèé ŋun u nìn yóoǹ ni nì u kansikinee marab. M nìn ŋá dijool pu niin iwiin imuŋku ili ŋwiimpu nì kunyeeu, kaa jíń tibaaa, kaa nyùn̄ tiba mun^b. 10 Ti-Dindaan nìn dū titaŋkpapilindi tili tin pu u nìn dū úǹ u-ba ŋal ki ŋmàn̄ee ki tīī-mi. Tipilindi gbanti pu ní marab bin kɔkɔ ti-Dindaan nìn dūu tīī-ni dijool pu, ŋŋmi poon, ŋyunti ŋun ni nìn kóoǹ ki kpáfì dijool taapuee nìn kā.

11 Iwiin imuŋku ili kúntidalee ní ti-Dindaan dū dipoondi taŋkpapilinti tili gbanti ki dūu tīī-mi. 12 Míǹ boonee ní ti-Dindaan bí-mi yii: «Yīkì m-cee doo kí kpákatí malaa, kun puee dinibul din a nyántìń Eejipiti tiŋkinee kɔ́ tijɔkɔndin. Binibee kaa tāaǹ kí fàtī bi-boon kí tīī m-marab bin m tīī-bee. Bi dūntì tikúti ki dūu mɔ́ɔ́ diwaal.» 13 Niinee ní ti-Dindaan gíti bí-mi yii: «M nín kpēē dinibul neeyee, m ká yii di-pɔbil lafun gbìfì. 14 Pée yàntī-mi ḿ kpɔ̀ kí céetí-bi bí taa ti pée gbìl̄ bi-pu kitiŋ pu. Ama siiyee, m làá dī sii pu kí náań ditimbundi din cáá mpɔn ki wīikí ki jítiǹ-bee ní.» 15 Niinee ní m kíĺ nsan ki nín kpákatiń dijool pu. Ŋŋmi nìn dá láá bí dijool gbanti pu. M nìn ŋúb́ dipoondi taŋkpapilinti tilee m-ŋaan. 16 M kpēēyee ki lafun ká yii ni yīntiǹ ti-Dindaan ni-Nimbɔtiu. Ni nìn dūntì tikúti ki dūu mɔ́ɔ́ diwaal ki nántiǹ dinabil. Naa nìn pée tāaǹ ki fātì ni-boon ki tīī ti-Dindaan marab bin u tīī-nee. 17 An pu ní m nìn dū titaŋkpapilindi tili tin m nìn ŋúb́ee ki yá kitiŋ ní ki gbáń ki wīī-ŋi ni-nimbiin niin^c.

Mooyiisi gbāam̀ Unimbɔti Isirayeel yab pu

18 Míǹ boonee ní m tātìi dōoǹ dicincibil ti-Dindaan nimbiin, ki ŋá iwiin imuŋku ili ŋwiimpu nì kunyeeu, kii mpeepeekaam m nín nìn tí ŋá puee, kaa jíń tijinaaa, kaa nyùn̄ nnyim mun. M ŋá míǹ di sá ni nìn yīntiǹ ti-Dindaan ki ŋá min kaa kítì u-ceeyee ki gbítì u-ŋuul. 19 M nìn fāŋkì diŋuul din ti-Dindaan nìn gíí ni-puee. U-ŋuulee nìn pɔ̄ɔ̄ tikpil áli gba u nìn là kí kpɔ̀ kí céetí-ni. Ama min bí nee muee, ti-Dindaan nìn tí pílifiǹ-mi ki fōō m-wimmeem. 20 Ti-Dindaan nìn gíí Aarɔn mun pu diŋuul ki nìn là kí kpɔ̀-u. Niinee ní m mēē Aarɔn mun pu. 21 M nìn yōoǹ ikpiti in ni ŋée tundi, an dàkà yii dinabilee, ki tɔ́ ŋŋmin, ní ki gbáń ki mátì-dì ki nàn̄-dì dúsi dusi kii ntamee, ní ki dū ntamee ki sītì mbun ŋun nyēeń dijool pu ki pùub̀ ki sìntēe poon.

22 Ni nìn tí yāntì ti-Dindaan gíí diŋuul Tabeera nì Maasa nì Kiibirooti-Taafa timmun^d mun. 23 Míǹ mbaantiim ní Kadeesi-Baarneeya^e, ŋyunti ŋun ti-Dindaan nìn tú-ni ki lī yii: «Cùmaan kí fōō kitiŋ kin ní m dūu tīī-nee», ni nìn ŋá ntafapɔn kaa nìn fātìi tɔ́ ti-Dindaan ni-Nimbɔtiu nyɔɔbundi. Naa nìn cáá u-pu dimákal ní kaa nìn dū tin u sòon̄ee ki túń ditundi. 24 Doooo ŋwiin ŋun m béè-nee, ni pée sá bin jáà nì ti-Dindaanee ní.

25 Ti-Dindaan nìn bíikì ki lī yii u làá kpɔ̀ kí céetí-ni. An di yì-tì ní m nìn tātìi dōoǹ dicincibil ti-Dindaan nimbiin ki ŋá iwiin imuŋku ili ŋwiimpu nì kunyeeu. 26 M nìn mēē ti-Dindaan yii: «M-Dindaan Unimbɔti, taa kpɔ̀ kí céetí a-nibul nee. Sii di yì-bi ní ki dū a-pɔŋkpaaŋŋu nì a-ŋal pɔfiŋu ki fīī-bi ki nyántìń Eejipiti tiŋkin. 27 Téetí a-tɔntɔnliibi Abraam nì Isaaki nì Jaakɔb pu. Taa kpèè binib nee pɔɔpɔŋŋu nì bi-toonam nì bi-kpitii pu kí lì yii a làá ŋá-bi tiba. 28 Á taa yàntī kitiŋ kin poon a nyántìń-tee nib ń lì yii: <Bi-Dindaan kaa nìn pée ŋūǹ kí cáá-bi kí kɔ́ǹ kitiŋ kin u nìn pōoǹ kí tīī-bee ni,> àá kí gíti lì yii: <Waa nìn pée néeń-bee pu ní u nyántì-bi Eejipiti tiŋkin kí cáá-bi kí kpɔ̀ kuteeu pu.> 29 Ti-Dindaan, bi sá a-nib ní. Sii di yì-bi ní ki dū a-pɔŋkpaaŋŋu nì a-ŋal pɔfiŋu ki nyántìń-bi Eejipiti tiŋkin!»