Diteetil Gbɔŋku 8

Ti-Dindaan dàkā Isirayeel yab kuteeun

1 Ni máaǹ kí nīn ŋúb́ marab bin m tīī-ni díǹ nee ní kí ŋá bi nín bí yii ní ŋá puee. Ni yaa ŋá mimmee, ni làá nīn bí dimaŋfalin ní kí bùtī, ní kí kɔ́ kí fōō kitiŋ kin ti-Dindaan nìn pōoǹ kí tīī ni-naanjabee. 2 Ní téetí ti-Dindaan ni-Nimbɔtiu nín yāntì ni cōom̀ disaŋkindi din kuteeun abin imuŋku ilee pu. U nìn yāntì ni ká agìŋ́kpaan kí cɔ̄ŋkì-ni. U nìn ŋá míǹ kí kpèè yii, ni-pɔbiliŋ poonee, ni làá nīn tɔ́ u-marabaaa, naa làá nīn tɔ́-bi. 3 Agìń gbanti boonee, u yāntì ŋkùm cúú-ni, ní ki dū maana un nimbi nì ni-naanjab kaa nìn nyée ki kpíiǹ-ni. U nìn ŋá míǹ kí dàkà-ni yii an kaa sá tijin dijil ŋmaniŋma di yì unil maŋfal, ama anyɔɔbun ŋin kɔkɔ nyēeń ti-Dindaan nyɔkɔnee di yì unil maŋfal^a. 4 Abin imuŋku ili ŋin ni ŋá kuteeunee, ni-wampeeŋkaati kaa cátàaa, ni-taaŋi mun kaa díkí. 5 Míǹ puee, ni máaǹ kí béé tiŋan yii, kii unil nín dàkà u-biki puee, míǹ mbaantiim ní ti-Dindaan ni-Nimbɔtiu mun dàkà-ni. 6 Nín̄ ŋúb́maan ti-Dindaan ni-Nimbɔtiu marab, kí nīn ŋáań u nín là puee ní kí nīn fàŋkí-u.

7 Kun puee ti-Dindaan ni-Nimbɔtiu làá dū-ni kí kɔ́ǹ kitimmɔntii poon ní. Kitiŋ gbanti cáá ibun nì inyimbul nì nnyim min dɔ̄ kitiŋ taapu ki púǹ ditantakalin nì dijool pu ki pùub̀ee. 8 Kitiŋ gbanti puee, bilee nì ɔɔji lòoǹ abil ní tikpil ní fiinyi nì fiigi nì greenaadi sufii mun lòoǹ tiŋan, ní ɔliifi kpam nì tisiil gbí. 9 Kitiŋ gbanti poonee, dikpaasiil kpá ní tiba nì tiba kaa làá lóó-ni. Kitiŋ gbanti taŋkpeeŋi cáá tikúti ní ki-jooŋŋi sá tikúman. 10 Ni yaa láa jíń ki díkée, ní dāá jāam̀ ti-Dindaan ni-Nimbɔtiu, kitimmɔntii kin u tīī-nee pu.

11 Ama ní nīn nyíǹ ni-ba kí taa súntí ti-Dindaan ni-Nimbɔtiu pu kí dū u-marab nì u-bɔkpaaŋi nì u-koobiliŋ ŋin m tīī-ni díǹ nee kí fá. 12 Ni làá dāá jī kí díkí, ní kí dāá mā adimɔnti kí nīn kóò. 13 Ni làá dāá nīn cáá inaa nì ipii nì iŋoobu tikpil, kí dāá nīn cáá animbil nì sindaariyab tikpil, ní kí dāá nīn cáá tigaajawan kɔkɔ nì ti-bulifi. 14 Ama ní nīn nyí kí taa kpántí bilambidambi kí súntí ti-Dindaan ni-Nimbɔtiu un nyántìń-ni Eejipiti tiŋki kin poon ni nìn sá iyumbuee pu. 15 Úǹ di nìn līī ni-nyɔkɔpu ní ki cáá-ni ki jítì kuteeu kun wāā bàaa ki cáá tifaandi, ki sá ikoobu in cáá tiloolee^b nì inoom ŋmee pu. Kitiŋkuliŋŋi laakin nnyim kpée, u yāntì nnyim nyáń ditaŋkpal din pɔ̄ɔ̄yee poon ki tīī-ni. 16 Kuteeu gbanti poonee u kpíiǹ-ni, ki tīī-ni maana un ni-naanjab kaa nìn pée nyí ki kée. U yāntì ni ká agìń kí cɔ̄ŋkì-ni, ní boonee kí dāá ŋá-ni tiŋan ní^c. 17 Naa máaǹ kí lì yii: «An sá nì ti-pɔŋŋu nì ti-pɔɔndi pu ní ti ká tigaajawan nee kɔkɔ.» 18 Ama ní téetí ti-Dindaan ni-Nimbɔtiu pu. Di sá yii úǹ di tīī-ni mpɔn ní ni ŋúń ki túń ditundi ki ká tigaajati gbanti kɔkɔ. U ŋá míǹ kí dàkà yii u nín nìn pōoǹ ni-naanjab dipoondi diŋyee, u bíi ŋáań míǹ kii an nín bíi jītí pu díǹ nan ní.

19 Ama ni yaa pée súntì ti-Dindaan ni-Nimbɔtiu pu ní ki cūtì ki nóó awaa ki gbàantí ŋi-taapu ki jáaḿ-ŋee, ibaamɔn nì ibaamɔn ní m bíi sòoǹ nì ni díǹ yii ni làá dāá pée kpú ní kí céetí múb. 20 Ni yaa kaa tɔ́ ti-Dindaan ni-Nimbɔtiuee, kii ti-Dindaan nín bíi kù ki céetí anibul ŋin bí ni-nyɔkɔpu nee, míǹ mbaantiim ní u làá kpɔ̀ kí céetí ni-mun.