Diteetil Gbɔŋku 7

Bí nàan̄ Kanaan yab nì bi-waaŋi

1 Ti-Dindaan ni-Nimbɔtiu làá cáá-ni kí kɔ́ǹ kitiŋ kin ní ni làá fōō ki nìn kíǹ ki yèe poon. U làá jà anibul kupaau ni-nyɔkɔpu kí wàatī-ni. Anibul gbanti nyáń aluli ní ki sá akpaan ki pɔ̄ɔ̄ ki jítiǹ-ni. Ŋíǹ di sá: Eeti yab nì Giirgaasi yab nì Amɔɔr yab nì Kanaan yab nì Peeriisi yab nì Eefi yab nì Jeebusi^a yab. 2 Ti-Dindaan ni-Nimbɔtiu làá dū-bi kí ŋá ni-ŋaan, ní ní já kí pɔ̄ɔkiǹ-bi. Ama ni yaa jáń ki pɔ́ɔkiǹ-bee, ní kpɔ̀ kí céetí-bi. Ni nì bi ń taa ŋá mpèé, ní taa sɔ̄ bi-saai mun. 3 Ní taa nín̄ cāab̀ tɔb. Ní taa dū ni-bisalib kí tīī bi-jipɔmbi ticati, kí taa tí yòon̄ bi-bisalib kí tīī ni-jipɔmbi ticati. 4 An yaa kaa sá míǹ, bi làá yàntī ni-biyaamu ń dū ti-Dindaan kí fá kí nīn kíǹ ki tòotī awaa, ní ti-Dindaan ń tí gíí ni-pu diŋuul ní kí kpɔ̀ kí céetí-ni malaa. 5 Ni nín máaǹ kí ŋá-bi puee sɔ̀. Ní gbá kí wìil̀ bi-saraafaŋyi nì ataŋkpee ŋin bi dūu cóoǹ ki tòotēe, kí gàatì bi-windɔi ní kí wà bi-waakpitikaaŋi ŋŋmi. 6 Di sá yii ni sá dinibul din ti-Dindaan ni-Nimbɔtiu u-ba yèe ní. Ti-Dindaan ni-Nimbɔtiu di lēē-ni ki nyántì anibul ŋin kɔkɔ bí kitiŋ puee kansikin ki dū-ni ki ŋá u-nibul, u-gaajawammɔntiiti^b.

Ti-Dindaan ŋúb̀ u-poondi ní

7 Ti-Dindaan yaa dū u-ba ki nákáǹ-ni ki lēē-nee, an kaa sá yii ni nín wīikí ki jítiǹ anibul ŋin kíǹee pu ní u lēē-ni. Di sá yii ni-wíiŋŋu kaa pée dàbiǹ anibul ŋin kíǹee yɔŋu báà fiii. 8 Ama, ti-Dindaan yaa dū u-pɔŋkpaaŋŋu ki nyántìń-ni Eejipiti yab bɔtiu Faaroo ŋaan, ní ki dá-ni ki nyántì kuyuŋunee, an sá yii u néeń-ni, ní ki ŋúb́ dipoondi din u nìn pōoǹ ni-naanjabee.

9 Míǹ puee, ní béé yii ti-Dindaan ni-Nimbɔtiu baba di sá Unimbɔti, ibaamɔndaan. Bin tɔ́ u-marabee, u ŋúb̀ u-poondi din u pōoǹ-bee kí cáá sāā anaantitɔntɔkɔ kutuku. U néeń bin néeń-uee ní. 10 Ama bin ná-uee, u pée pà bi-paati ní dicilpu dicilpu niin, ní kí nàan̄-bi. Waa pée tàantí kí pà bin ná-uee bi-paati^c.

11 Míǹ puee nín̄ tɔ́maan marab nì abɔkpaa nì akoobil ŋin m tīī-ni díǹ nee kí ŋá ŋi nín bí yii ní ŋá puee.

12 Ni yaa pílifì akoobil gbanti ní ki yaa ŋá ŋi nín bí yii ní ŋá pueeyee, ti-Dindaan ni-Nimbɔtiu mun làá ŋá-ni tiŋan kí ŋúb́ dipoondi din u pōoǹ ni-naanjabee deedee. 13 Ni yaa láa kɔ́ kitiŋ kin u nìn pōoǹ ni-naanjab kí tīī-nee poonee, u làá dāá nīn néeń-ni kí bìin̄ ni-boon kí yàntī ní màal̀ kí bùtī, ní kí bìin̄ ni-kpaajinti kɔkɔ pu, an dàkà yii ni-bileeu nì ni-damam nì ni-kpam sufii, ní kí bìin̄ ni-naai nì ni-piii nì ni-ŋoobui pu. 14 Ti-Dindaan làá dāá bìin̄ ni-pu kí jītíǹ anibul ŋin kɔkɔ kíǹee. Ni-ninjab àá ni-nimpoobi báà ubɔ dāa kpá kí nīn sá uŋmaŋŋmanti, ki kpáaǹ ni-waŋkuti. 15 Ti-Dindaan làá kàkatī iween kɔkɔ kí wàatī-ni, ní kí kàkatī tiweeŋkpiil tin nìn jéetì Eejipiti tiŋki pu nimbi ni-ba nimbil kée kí wàatī-ni. Naa làá pée ká-i ni-cee, ama u làá cáá-i kí tɔ̄ bin kɔkɔ ná-nee pu ní.

16 Anibul ŋin kɔkɔ nib ti-Dindaan ni-Nimbɔtiu làá dūú ŋá ni-ŋaanee, ní kpɔ̀ kí céetí-bi. Ní taa sɔ̄ bi-saai kí taa tòotī bi-waaŋi mun. Di sá yii an dāa sá kutaliŋŋu ní ki tīī-ni.

17 An yaa yíì ni làá dàkafì yii: «Too anibul nee pɔ̄ɔ̄ ki jítiǹ-ti. Kin mana ní ti làá ŋmā kí já nì bi kí fōō bi-tiŋki kí ŋá ti-yaka ní?» 18 Ní taa fàŋkìmaan-bi, ama ní téetí ti-Dindaan ni-Nimbɔtiu nín ŋá Faaroo nì Eejipiti nib kɔkɔ puee. 19 Nimbi ni-ba ká nì ni-nimbiliŋ agìŋ́kpaan ŋin poon u kɔ́ǹ-bee. Ni ká atuŋkpaan nì mpɔŋkpaan tuuŋŋi ŋin ti-Dindaan ni-Nimbɔtiu ŋá ki nyántìń-ni kitiŋ gbanti poonee. Too, míǹ mbaantiim ní ti-Dindaan ni-Nimbɔtiu làá ŋá anibul ŋin ni fàŋkí nee kɔkɔ. 20 Ti-Dindaan ni-Nimbɔtiu làá dāá dū inaŋgbansii ní kí tɔ̄ bi-pu, áli gba bin nìn ŋmátì ki nyàab̀ kí sāǹ kí báĺ ní taa ká-bee kɔkɔ ń kpú múb. 21 Taa pée fàŋkìmaan-bi báà fiii pu, di sá yii ti-Dindaan ni-Nimbɔtiu un bí ni-ceeyee sá Unimbɔtikpaan nì Kunimbɔtiwambiiu ní. 22 Fiii fiii ní ti-Dindaan ni-Nimbɔtiu làá nīn jì anibul gbanti ki tìì-ni. Naa làá ŋmā kí kpɔ̀ kí céetí-bi dicilpu dicilpu niin, an yaa kaa sá míǹ ipeel làá bùtī ní kí nīn páb́-ni. 23 Ama ti-Dindaan ni-Nimbɔtiu làá dū-bi kí ŋá ni-ŋaan. U làá dū-bi kí tɔ̄ dinyoondi din làá nàan̄-bee poon ní. 24 U làá dū bi-bɔtiibi ki ŋá ni-ŋaan ní ní kpɔ̀-bi kí kpìtī bi-yiŋŋi kitiŋ pu. Bi-kansikin báà ubɔ kaa dāa ŋūǹ kí sīĺ ni-nimbiin. Ni làá dāá kpɔ̀ kí céetí-bi ní. 25 Ní dāá dū bi-waakpitikaaŋi kí wà ŋŋmi. Ní taa yàntī animbil kúti nì sindaariyab bin bí ŋi-puee ń cúú-ni nnimbitaataam. Ní taa pée yòon̄-ŋi, an yaa kaa sá míǹ, an làá kpántí kutaliŋŋu kí tīī-ni. Di sá yii ti-Dindaan ni-Nimbɔtiu ná tiwan gbanti ní. 26 Ní taa pée yòon̄ diwaal din bí mimmee kí kɔ́ǹ ni-diiŋŋin. Ni yaa ŋá mimmee, see bí kpɔ̀ kí céetí-ni kii bi nín máaǹ kí ŋá awaa gbanti puee. Ni máaǹ kí nīn ná awaa gbanti kí taa nyàab̀ kí wāl̀-ŋi gba, kun puee ŋi sá ntimbiil wanti ní.