Diteetil Gbɔŋku 13

1 Ní nīn ŋúb́ marab bin kɔkɔ m tīī-ni nee. Ní taa gbéeǹ tiba, kí taa bàtī tiba^a.

Iwaatooti

2 Tí lì yii ubɔ yaa láa yíkì ni-kansikin dalba ní ki bí yii u sá ubɔnaatil àá ubɔɔ^b ní ki tùkū-ni yii kudaaŋŋu àá maamaacikpaan ubɔ làá nyā. 3 U nín lī puee yaa lafun ŋá míǹ, ní míǹ boonee u yaa tùkū-ni yii: «Dāam̄maan tí cù kí nóó awaa ŋin naa nyée kí tòotī-ŋee», 4 ní taa pīlifiǹ ubɔnaatil àá ubɔɔ gbanti. Di sá yii ti-Dindaan ni-Nimbɔtiu di bíi cɔ́ŋkí-ni kí kpèè yii ni lafun néeń-u nì ni-pɔbiliŋ kɔkɔ nì ni-naŋki kɔkɔɔɔ, naa néeń-u. 5 Ti-Dindaan ni-Nimbɔtiu baba ní ni máaǹ kí nīn nóó, ní kí nīn fàŋkí úǹ baba, kí nīn ŋúb́ u-marab, kí nīn tɔ́-u, kí nīn jáaḿ-u ní kí dū ni-ba kí nákáǹ-u. 6 Ama ubɔnaatil àá ubɔɔ gbantee, ní kpɔ̀-u. Di sá yii úǹ di sāal̀-ni ní yìntīǹ ti-Dindaan ni-Nimbɔtiu un di dá-ni ki nyántì kuyuŋun, Eejipiti tiŋkinee. Udaan bàà mākaǹ kí yàntī ní fá ti-Dindaan ni-Nimbɔtiu saŋŋu ŋun u kpáafì-ni yii ní nīn dēe dee. Míǹ ní ni máaǹ kí ŋá kí nyāntí ikpiti ni-kansikin.

7 Dalba a-maan àá a-naal sii nì un pēē dinabiilee, àá a-jipɔɔn àá a-bisal àá a-nimpuu un a néeńee, àá a-bɔɔmɔnti di yaa dɔ́miń a-cee dibalin ní ki tùkū-si yii: «Yàntī tí cùú tòotī awaa». Awaa gbanti muee, sii a-ba àá a-naanjab kaa pée nyí-ŋi ki ká. 8 An sá awaa ŋin anibul ŋin māntìi tú-nee nib tòotēe ní. Anibul gbanti aba bí ndan ní aba mun bí ki pìlīǹ-ni, ní aba mun bí kitiŋgbeennyɔkɔ kiba kí cáá sāā kin kíǹee. 9 Ní taa pée fàtīí kpèè udaan ní kaa nín pílifiǹ-u. Ní taa sɔ̄ udaan saai, kí taa mɔ̄tì u-pu kí fīī-u. 10 An pée sá ní kpɔ̀-u ní. Un ní u bàà bíi ŋmàtíǹee di máaǹ kí péé péé kí yā-u ditaŋkpal, ní bin kíǹee ń nín páań. 11 Yāŋkìmaan-u ataŋkpee kí kpɔ̀, di sá yii u bàà mākaǹ kí yàntī ní fá ti-Dindaan ni-Nimbɔtiu un nyántìń-ni kuyuŋun Eejipiti tiŋkinee ní. 12 Niinee, Isirayeel yab kɔkɔ làá gbìl̄ tin jítèe ní kí fàŋkì, ní ni-kansikin báà unil kaa dāa gíti ŋáań ikpiti gbanti juti.

13 Ni yaa tí gbìl̄ dalba yii ntimu mun ti-Dindaan ni-Nimbɔtiu tīī-ni ní nīn kóòyee kiba poon, 14 binib bin kaa pée bí tibanee sāal̀ kitiŋ gbantin nib ki yāntì bi cūtìi tōotì awaa ŋin naa pée nyí ki kée, 15 ní cɔ̄ŋkì tiŋan kí bàlifì kí kpèè yii an sá tiŋmanaaa, an kaa sá. Ama ni yaa cɔ́ŋkì ki bālifì ní ki ká yii tiŋman bi lafun ŋá ntimbiil tuuŋŋi gbanti ni-kansikinee, 16 ní kpɔ̀ kitiŋ gbanti nib kɔkɔ. Ní kpɔ̀ kí céetí-bi kí kpáaǹ bi-waŋkuti, ní kí gbá kí yàaǹ kitiŋ gbanti kɔkɔ nì tin kɔkɔ bí ki-nee. 17 Ní dāá kóoǹ ki-gaajawanti kɔkɔ kí bíĺ kitiŋ kansikin kí sēē ŋŋmi, ní kí wà kitiŋee kɔkɔ. Án dāa sá kii saraawɔkaa ní ni ŋá ki tīī ti-Dindaan ni-Nimbɔtiuee. Kitiŋ gbanti digbuŋkatiŋ làá nīn bí míǹ ní ki cá jaanjaan, di sá yii ubɔ gíti kpá kí mā niin. 18 Ní taa pée yòon̄ tin sá bí cáá wà ŋŋmee poon tiba, án nín làá ŋá pu ti-Dindaan ni-Nimbɔtiu ŋuul ń sɔ̀ŋkèe. U làá sɔ̄ ni-saai kí ŋá-ni tiŋan ní kí yàntī ní bùtī kii u nín nìn pōoǹ ni-naanjab puee. 19 Ni yaa ŋáań u nín bí yii ní ŋá puee, ki ŋúb́ u-marab bin kɔkɔ m tīī-ni díǹ nee, ní ki yaa ŋáań min kítì u-ceeyee, u làá lafun ŋá míǹ kí tīī-ni.